Uthibitisho wa wokovu wa Sayuni

¹Kwa ajili ya Sayuni sitanyamaza, na kwa ajili ya Yerusalemu sitatulia, hata haki yake itakapotokea kama mwangaza, na wokovu wake kama taa iwakayo.

²Na mataifa wataiona haki yako, na wafalme wote watauona utukufu wako; nawe utaitwa jina jipya, litakalotajwa na kinywa cha BWANA.[#Isa 65:15; Ufu 3:12]

³Nawe utakuwa taji la uzuri katika mkono wa BWANA, na kilemba cha kifalme mkononi mwa Mungu wako.[#Zek 9:16]

⁴Hutaitwa tena Aliyeachwa, wala nchi yako haitaitwa tena, Ukiwa; bali utaitwa Hefziba; na nchi yako Beula; kwa kuwa BWANA anakufurahia, na nchi yako itaolewa.[#Hos 1:10; 1 Pet 2:10; #62:4 maana yake ni ‘namfurahia.’; #62:4 maana yake ni ‘ameolewa.’]

⁵Maana kama vile kijana amwoavyo mwanamwali, ndivyo wana wako watakavyokuoa wewe; na kama vile bwana arusi amfurahiavyo bibi arusi, ndivyo Mungu wako atakavyokufurahia wewe.

⁶Nimeweka walinzi juu ya kuta zako, Ee Yerusalemu; hawatanyamaza mchana wala usiku; ninyi wenye kumkumbusha BWANA, msiwe na kimya;[#Wim 3:3; Isa 52:8; Eze 3:17; Ebr 13:17]

⁷wala msimwache akae kimya, mpaka atakapouimarisha Yerusalemu, na kuufanya usifike kote duniani.[#Isa 61:11; Sef 3:20]

⁸BWANA ameapa kwa mkono wake wa kulia, na kwa mkono wa nguvu zake, Hakika sitawapa adui zako nafaka yako tena kuwa chakula chao; wala wageni hawatakunywa divai yako, uliyoifanyia kazi.[#Kum 28:31; Yer 5:17]

⁹Lakini walioivuna, ndio watakaoila, na kumhimidi BWANA; na walioichuma, ndio watakaoinywa, ndani ya nyua za patakatifu pangu.[#Kum 12:12]

¹⁰Piteni, piteni, katika malango;

Itengenezeni njia ya watu;

Tutieni, tutieni barabara; toeni mawe yake;

Twekeni bendera kwa ajili ya makabila ya watu.

¹¹Tazama, BWANA ametangaza habari mpaka mwisho wa dunia,[#Zek 9:9; Mt 21:5; Yn 12:15; Isa 40:10; 49:4; Ufu 22:12]

Mwambieni binti Sayuni,

Tazama, wokovu wako unakuja;

Tazama, thawabu yake iko pamoja naye,

Na malipo yake yako mbele zake.

¹²Nao watawaita, Watu watakatifu,

Waliokombolewa na BWANA;

Nawe utaitwa, Aliyetafutwa,

Mji usioachwa.