Mwana wa Isaya kuwa ishara ya uvamizi wa Ashuru

¹BWANA akaniambia, Ujipatie ubao mkubwa ukaandike juu yake kwa hati ya kawaida, Kwa Maher-shalal-hash-bazi;[#8:1 Kwa maana ya ‘kuteka kasi, kupokonya upesi’.]

²nami nitajipatia mashahidi waaminifu ili kuandika habari, yaani, Uria, kuhani, na Zekaria, mwana wa Yeberekia.[#2 Fal 16:10]

³Nami nikalala na nabii mwanamke, naye akapata mimba, akazaa mtoto wa kiume. Kisha BWANA akaniambia, Mwite jina lake Maher-shalal-hash-bazi.

⁴Kwa maana kabla mtoto huyo hajaweza kujua kusema, Baba yangu, na Mama yangu, hazina za Dameski na mateka ya Samaria yatachukuliwa mbele ya mfalme wa Ashuru.[#Isa 7:16]

⁵Kisha BWANA akasema nami mara ya pili, akaniambia,

⁶Kwa sababu watu hawa wameyakataa maji ya Shiloa yapitayo polepole, na kufurahi kwa ajili ya Resini na huyo mwana wa Remalia,[#Neh 3:15; Yn 9:7]

⁷basi sasa angalia; Bwana aleta juu yao maji ya huo Mto, yenye nguvu, mengi sana, nayo ni mfalme wa Ashuru na utukufu wake wote; naye atakuja, na kupita juu ya mifereji yake yote, atafurika juu ya kingo zake zote;

⁸naye atapita, atapita kwa kasi na kuingia Yuda; atafurika na kupita katikati, atafika hadi shingoni; na kule kuyanyosha mabawa yake kutaujaza upana wa nchi yako, Ee Imanueli.[#Isa 7:14; Mt 1:23]

⁹Ungameni pamoja, enyi makabila ya watu,

Nanyi mtavunjwa vipande vipande;

Tegeni masikio, ninyi nyote wa nchi zilizo mbali;

Jitahidini, nanyi mtavunjwa vipande vipande;

Jitahidini, nanyi mtavunjwa vipande vipande.

¹⁰Fanyeni shauri pamoja, nalo litabatilika;[#Ayu 5:12; Kum 20:1; Yos 1:5; Zab 46:7,11; Isa 9:6; Mt 1:23; Rum 8:31]

Semeni neno, lakini halitasimama;

Kwa maana Mungu yu pamoja nasi.

¹¹Maana BWANA aliniambia hivi, kwa mkono hodari, akanifundisha nisiende katika njia ya watu hawa, akisema,

¹²Msiseme, Ni njama, kuhusu mambo yote ambayo watu hawa watasema, Ni njama; msihofu kwa hofu yao, wala msiogope.[#1 Pet 3:14-15]

¹³BWANA wa majeshi ndiye mtakayemtakasa; na awe yeye hofu yenu, na awe yeye utisho wenu.[#Hes 20:12; Lk 12:5]

¹⁴Naye atakuwa ni mahali patakatifu; bali ni jiwe la kujikwaza na mwamba wa kujikwaa kwa nyumba za Israeli zote mbili, na mtego na tanzi kwa wenyeji wa Yerusalemu.[#Eze 11:16; Lk 2:24; Rum 9:33; 1 Pet 2:8]

¹⁵Na wengi watajikwaa juu yake, na kuanguka na kuvunjika, na kunaswa na kukamatwa.[#Lk 20:18]

Wafuasi wa Isaya

¹⁶Ufunge huo ushuhuda, ukaitie mhuri sheria kati ya wanafunzi wangu.[#Dan 12:4]

¹⁷Nami nitamngojea BWANA, awafichaye uso wake nyumba ya Yakobo, nami nitamtazamia.[#Hab 2:3; Lk 2:25; Ebr 2:13]

¹⁸Angalieni, mimi na watoto hawa niliopewa na BWANA tu ishara na ajabu katika Israeli, zitokazo kwa BWANA wa majeshi, yeye akaaye katika mlima Sayuni.[#Zek 3:8; Ebr 2:13]

¹⁹Na wakati watakapokuambia, Tafuta habari kwa watu wenye pepo na kwa wachawi; waliao kama ndege na kunong'ona; je! Haiwapasi watu kutafuta habari kwa Mungu wao? Je! Waende kwa watu waliokufa kwa ajili ya watu walio hai?[#Zab 106:28]

²⁰Na waende kwa sheria na ushuhuda; ikiwa hawasemi kulingana na neno hili, bila shaka kwa hao hakuna asubuhi.

²¹Nao watapita katikati yake, wamedhikika sana na kuwa na njaa; na itakuwa watakapoona njaa, watalalamika na kuapa kwa mfalme wao, na kwa Mungu wao, na kuelekeza nyuso zao juu;

²²nao wataiangalia nchi, na, tazama, shida na giza; hapatakuwa changamko kwa sababu ya dhiki; nao watafukuzwa na kuingia katika giza kubwa.