¹Mwimbieni Mungu wangu kwa matari;

Mwimbieni Bwana wangu kwa matoazi;

Mwimbieni zaburi na nyimbo za shangwe;

Mtukuzeni, mliitieni jina lake.

²Maana BWANA ndiye Mungu azivunjaye silaha za vita;

Alipokaa kambini miongoni mwa watu

Aliniokoa mkononi mwao walionitesa.

³Ashuru alitoka katika milima ya kaskazini;

Alikuja na askari zake makumi elfu.

Kwa wingi wao waliiziba mito,

Na wapanda farasi wao waliifunika milima.

⁴Alisema ataziteketeza nchi zangu

Na kuwaua vijana wangu kwa upanga;

Atawatupa chini watoto wangu wanyonyao,

Na kuwatoa wana wangu wawe mateka,

Na wanawali wangu wawe nyara.

⁵BWANA Mwenyezi aliwaangamiza

Kwa mkono wa mwanamke.

⁶Shujaa wao hakuanguka kwa pigo la vijana,

Wala kuuawa na wana wa majitu,

Wala kushambuliwa na majitu ya juu.

Ila Yudithi binti Merari alimdhoofisha

Kwa uzuri wa sura yake.

⁷Alivua nguo zake za ujane

Ili walioteswa katika Israeli wainuliwe;

Alijipaka marhamu usoni.

⁸Akasuka nywele zake kwa mapambo,

Akavaa nguo ya kitani ambembeleze.

⁹Kiatu chake kilimfurahisha jicho lake;

Uzuri wake ukaiteka nyara roho yake;

Jambia likamchoma shingoni.

¹⁰Waajemi waliutetemekea ujasiri wake;

Wamedi walitishwa na ushupavu wake.

¹¹Ndipo wanyenyekevu wangu walipiga kelele za shangwe,

Wanyonge wangu walilia kwa sauti kuu.

Adui walijikunyata kwa hofu,

Walilalamika wakakimbia.

¹²Wana wa wajakazi wakawachoma,

Waliwajeruhi kama wana wa watoro,

Wakauawa na jeshi la BWANA wangu.

¹³Nitamwimbia Mungu wangu wimbo mpya.[#Zab 144:9]

Ee BWANA, Wewe ndiwe mkuu, mwenye fahari;

Wa ajabu katika uweza wako, hakuna kama Wewe.

¹⁴Viumbe vyako vyote vikutumikie,

Maana ulisema vikafanyika,

Ulitoa Roho yako vikaumbwa,

Wala hakuna atakayeshindana na sauti yako.

¹⁵Milima husukasuka katika misingi yake kama maji

Miamba huyeyuka kama nta mbele yako;

Lakini u mwenye rehema kwao wanaokucha.

¹⁶Dhabihu zote hazitoshi kwa harufu ya manukato;[#1 Sam 15:22; Zab 51:16-17; Hos 6:6]

Wala shahamu yote kwa sadaka ya kuteketezwa kwako.

Lakini yeye amchaye BWANA ni mkuu daima.

¹⁷Ole wa mataifa wainukao juu ya taifa langu,

BWANA Mwenyezi atawapatiliza siku ya hukumu,

Akitia nyama yao moto na funza,

Nao watalia na kuumia daima.

¹⁸Ikawa walipofika Yerusalemu walimwabudu Mungu; watu wakatakaswa, wakatoa sadaka nzima za kuteketezwa, na sadaka za hiari, na matoleo yao.

¹⁹Yudithi akaiweka wakfu mali yote ya Holofene aliyopewa na watu, akakitoa na chandarua alichokitwaa mwenyewe katika chumba chake cha kulalia, kiwe sadaka kwa BWANA.

²⁰Watu wakazidi kula karamu Yerusalemu kwa muda wa miezi mitatu mbele ya patakatifu, naye Yudithi akakaa nao.

Adhama na kifo cha Yudithi

²¹Na baada ya siku hizo kila mtu alikwenda kwao, na Yudithi alikwenda Bethulia akakaa shambani mwake, akastahiwa katika zamani zake katika nchi yote.

²²Wengi walimtamani, lakini hakuna aliyemjua siku zote za maisha yake tangu siku aliyokufa mumewe Manase akakusanywa kwa watu wake.

²³Sifa yake ikazidi sana. Akazeeka katika nyumba ya mumewe hata kupata umri wa miaka mia moja na mitano. Akamweka mjakazi wake huru. Akafa Bethulia, wakamzika katika pango la mumewe Manase.

²⁴Waisraeli wakamwomboleza siku saba. Naye, kabla ya kufa kwake, aligawa mali yake kwa jamaa za karibu wa mumewe Manase, na kwa jamaa zake wa karibu.

²⁵Ikawa hakuna aliyewatia wana wa Israeli hofu tena katika siku zake Yudithi, wala kwa siku nyingi baada ya kufa kwake.