Yuda katika tahadhari

¹Na wana wa Israeli waliokaa Yuda walisikia habari za Holofene, jemadari mkuu wa Nebukadreza, mfalme wa Waashuri, jinsi alivyowatenda mataifa, na jinsi alivyoyaharibu mahekalu yao yote na kuyaangamiza kabisa;

²wakaona hofu nyingi juu yake, na kufadhaika sana kwa ajili ya Yerusalemu na hekalu la BWANA Mungu wao.

³Maana ilikuwa ndiyo kwanza warudi kwao baada ya uhamisho wa Babeli, na watu wa Yuda kukusanyika pamoja, na vyombo na madhabahu na nyumba yenyewe kutakaswa baada ya kule kutiwa unajisi.

⁴Wakapeleka kwenye kila mtaa wa Samaria, na Kone, na Beth-horoni, na Belmaimu, na Yeruko, na Choba, na Esoro, na bonde la Salemu,

⁵wakavishika upesi vilele vya milima mirefu, wakaitia nguvu miji yake na kuweka akiba ya chakula kwa matumizi ya vita, maana wakati huo mashamba yalikuwa yamekwisha vunwa.

⁶Naye Yoakimu, kuhani mkuu, aliyekuwako Yerusalemu siku zile, aliwaandikia watu waliokaa Bethulia na Betomesthaimu, karibu na Esdreloni penye uwanda ulio karibu na Dothaimu,

⁷kuwaagiza wazishike njia za kupandia katika nchi ya milima. Maana njia hizo ni mlango wa kuingilia Yuda, tena ni rahisi kuzuia watu wasipite kwa sababu njia hizo ni nyembamba, za kupitisha mtu mmoja mmoja tu, au mwisho wawili.

Sala na toba

⁸Nao wana wa Israeli walifanya kama Yoakimu, kuhani mkuu, alivyowaagiza, yeye na baraza ya Waisraeli waliokaa Yerusalemu.

Kusihi kukubwa

⁹Na Waisraeli wote walimlilia Mungu kwa bidii sana, na kujinyenyekeza mbele zake kwa bidii.

¹⁰Wao, pamoja na wake zao na watoto, na wanyama wao, na kila mgeni aliyekuwako kwao, na kila mtu wa mshahara, na kila mtumwa aliyenunuliwa kwa fedha, walijivika magunia viunoni.[#Yon 3:7-8; Est 4:1-3]

¹¹Na Waisraeli wote, wanaume kwa wanawake, hata watoto wadogo, pamoja na wenyeji wa Yerusalemu, walianguka kifudifudi mbele ya hekalu, wakajitia majivu vichwani na kunyosha mavazi yao ya magunia mbele za Mungu.

¹²Wakatanda magunia juu ya madhabahu. Na wote kwa sauti moja walimsihi Mungu wa Israeli kwa bidii asiwatoe watoto wao wawe mateka, na wake zao wawe nyara, wala wasiitoe miji ya urithi wao iharibiwe, na patakatifu pake patiwe unajisi na aibu na kudhihakiwa na mataifa.

¹³BWANA akaisikia sauti yao akaiangalia dhiki yao, na watu wakaendelea katika kufunga muda wa siku nyingi, katika Yuda yote na Yerusalemu, mbele ya patakatifu pa BWANA Mwenyezi.[#Est 4:16]

¹⁴Na Yoakimu, kuhani mkuu, na makuhani wote waliosimama mbele za BWANA, nao waliomhudumia BWANA, walikuwa wamejifunga magunia viunoni; wakatoa sadaka za kuteketezwa za kila siku, pamoja na nadhiri na sadaka za hiari, nao walikuwa wamejitia majivu juu ya kofia zao.[#Yoe 2:17]

¹⁵Wakamlilia BWANA kwa nguvu zao zote apate kuiangalia nyumba ya Israeli kwa wema.