Mkutano juu ya Waisraeli

¹Basi, Holofene, jemadari mkuu wa jeshi la Ashuru, alipata habari ya kuwa wana wa Israeli wamejiweka tayari kwa vita, tena wamezifunga njia za milimani na kuvitia nguvu vilele vya milima mirefu na kuweka mapingamizi uwandani.

²Naye akakasirika mno, akawaita wakuu wote wa Moabu, na maakida wa Amoni, na viongozi wa pwani ya bahari,

³akawaambia: Enyi, wana wa Kanaani, niambieni: Watu hawa wanaokaa katika nchi yenye milima ni nani, na miji yao ni ya namna gani? Watu wa jeshi lao ni wangapi, na nini asili ya uwezo wao na nguvu zao? Mfalme awatawalaye na kuliongoza jeshi lao yu nani?

⁴Na kwa nini wamenipa kisogo wasije kunilaki kama wote wengine wakaao pande za magharibi?

Ripoti ya Akioro

⁵Ndipo Akioro, mkuu wa Bani Amoni, akamwambia: BWANA wangu na alisikie neno litokalo katika kinywa changu mimi mtumishi wako, nami nitakueleza yaliyo kweli juu ya watu hawa wakaao katika nchi hii yenye milima, karibu na mahali unapokaa; wala hakuna uongo utakaotoka kinywani mwangu, mimi mtumishi wako.

⁶Watu hao ni wa ukoo wa Wakaldayo,

⁷lakini zamani walifanya makazi yao Mesopotamia, kwa sababu hawakutaka kuifuata miungu ya baba zao katika nchi ya Wakaldayo,

⁸bali waliiacha njia ya wazee wao wakamwabudu Mungu wa mbinguni, Mungu waliyemjua. Nao waliwafukuza katika nchi ya miungu yao, wakakimbilia Mesopotamia, wakakaa huko siku nyingi.

⁹Kisha, Mungu wao aliwaamuru waondoke pale walipokuwa wakikaa, waende katika nchi ya Kanaani. Wakakaa huko, wakaongezewa dhahabu na fedha na wanyama wengi mno.[#Mwa 11:31—12:5]

¹⁰Wakashukia Misri kwa sababu njaa kubwa iliiangukia nchi yote ya Kanaani, wakafanya makao yao huko walikopata chakula, wakaongezeka kuwa wengi sana, hata hakuna awezaye kulihesabu taifa lao.[#Mwa 42:1-5; Kut 1:7]

¹¹Mfalme wa Misri akawainukia akawafanyia hila, akawadhilisha akiwatumikisha kazi ya matofali, akawafanya watumwa.[#Kut 1:8-14]

¹²Wakamlilia Mungu wao, naye akaipiga nchi yote ya Misri kwa mapigo yasiyoponyeka, hata Wamisri walipowaondoa machoni pao.[#Kut 7:1-12; 29:46]

¹³Mungu akaikausha Bahari ya Shamu mbele yao,[#Kut 14:21-22]

¹⁴akawaongoza katika njia ya Sinai na Kadesh-barnea, wakawaondoa wote waliokuwa wakikaa jangwani.

¹⁵Wakafanya makao yao katika nchi ya Waamoni, wakawaharibu watu wote wa Heshboni kwa nguvu yao. Wakavuka Yordani wakaimiliki nchi yote yenye milima,

¹⁶wakafuwakuza mbele yao Wakanaani na Waperizi na Wayebusi na Washekemu na Wagirgashi wote, wakakaa katika nchi yenye milima siku nyingi.

¹⁷Hata muda wote walioishi bila dhambi mbele ya Mungu wao walistawi, maana Mungu achukiaye maovu alikuwa pamoja nao.[#Kum 28:1-68]

¹⁸Lakini walipoiacha njia aliyowaagiza waliangamizwa katika vita vingi vikali mno, wakachukuliwa mateka katika nchi ya kigeni. Nalo hekalu la Mungu wao liliangushwa hata nchi, na miji yao ilishikwa na adui zao.

¹⁹Na sasa wamemrudia Mungu wao na kutoka katika nchi ya uhamisho wao walipotawanywa; wamerudi Yerusalemu, palipo patakatifu pao, na kuikalia nchi yenye milima, maana ilikuwa haina watu.

²⁰Basi, sasa, bwana wangu na mkuu wangu, kama likiwapo kosa katika watu hao, wakitenda dhambi juu ya Mungu wao, tuliangalie jambo hili lililowakwaza, tukapande na kuwashinda.

²¹Lakini kama hakuna maasi katika taifa lao, basi, bwana wangu na awaambae, isiwe kama BWANA wao atawalinda, na Mungu wao awe upande wao, nasi tutakuwa dhihaka mbele ya ulimwengu wote.

²²Ikawa, Akioro akiisha kusema maneno hayo, watu wote waliolizunguka lile hema na kusimama kandokando yake walinung'unika, na wakuu wa Holofene na wote waliokaa pwani ya bahari na katika nchi ya Moabu walitoa shauri auawe.

²³Wakasema, Sisi hatuwezi kuwaogopa wana wa Israeli, maana, tazameni! Ni taifa lisilo na uwezo wala nguvu ya kufanya vita vikali.

²⁴Kwa hiyo tutapanda, nao watakuwa nyara ya kutekwa na jeshi lako lote, Ee Bwana Holofene.