BETHULIA UNAZINGWA

Juhudi na mipango juu ya Bethulia

¹Asubuhi yake, Holofene alitoa amri kwa jeshi lake lote, na kwa watu wote waliokuja kujiunga naye, wahamishe kambi lao kuendea Bethulia, wakashike upesi njia za kupandia katika nchi yenye milima na kupigana na wana wa Israeli.

²Basi, siku ile, kila mtu hodari aliondoka, hata hesabu ya watu wa vita ilikuwa askari wa miguu elfu mia moja na sabini, na wapanda farasi elfu kumi na mbili, licha ya wenye mizigo na watu waliofuatana nao kwa miguu, watu wengi mno.

³Wakapiga kambi bondeni karibu na Bethulia, karibu na kisima, wakajieneza katika nchi ya Dothaimu hata Belmaimu kwa upana, na toka Bethulia hata Kiamoni, karibu na Esdreloni, kwa urefu.

⁴Nao wana wa Israeli, walipoona wingi wao, walifadhaika mno, wakasemezana kila mtu na jirani yake, Sasa watu hawa wataulamba uso wote wa ardhi; milima mirefu na mabonde na vilima havitaweza kustahimili uzito wao.

⁵Kila mtu akatwaa silaha zake, wakawasha mioto juu ya minara yao, wakakaa tayari, wakikesha usiku kucha.[#1 Mak 12:28-29]

⁶Basi, siku ya pili, Holofene aliwatoa askari zake wapanda farasi wote machoni pa wana wa Israeli waliokuwako Bethulia,

⁷akazipeleleza njia za kuupandia mji wao; akavivumbua visima vya maji akavishika, akaweka vikosi vya askari kuvilinda; akaondoka yeye akarudi kwake.

⁸Wakamjia wakuu wa Bani Esau, na viongozi wote wa watu wa Moabu, na viongozi wa nchi ya pwani, wakasema:

⁹Bwana wetu na asikilize neno moja, kusudi jeshi lako lisipatwe na hasara.

¹⁰Watu hawa, wana wa Israeli, hawaitumainii mikuki yao, ila huutumainia urefu wa milima wanakokaa, maana si rahisi kuvifikia vilele vyake.

¹¹Basi sasa, bwana wangu, usipigane nao kama watu wapiganavyo wakifungana vita; hivyo hakuna hata mmoja wa watu wako atakayekufa.

¹²Kaeni kambini, watu wote wa jeshi lako wawe salama, uwaagize watumsihi wako waikamate chemchemi ya maji yatokayo chini ya milima,

¹³maana wote wakaao Bethulia hupata maji huko. Hivyo watakufa kwa kiu, na kuutoa mji wao. Nasi, pamoja na watu wetu, tutapanda juu ya milima iliyo karibu, na kufanya kambi letu huko, tuwavizie, asitoke mjini hata mtu mmoja.

¹⁴Watadhoofu kwa njaa, wao na wake zao na watoto wao hata kabla upanga haujawapata wataanguka katika njia za mji wao.

¹⁵Nawe utajilipiza kisasi juu yao kwa sababu walikuasi, wala hawakuja kukulaki kwa amani.

¹⁶Maneno yao yakapendeza machoni pa Holofene, na machoni pa watumishi wake wote, akatoa amri ifanywe kama walivyosema.

¹⁷Basi, jeshi la wana wa Amoni likaondoka, na pamoja nao watu elfu tano wa wana wa Ashuru, wakapiga kambi bondeni, wakazishika chechemi za maji ya wana wa Israeli.

¹⁸Wana wa Esau wakapanda pamoja na wana wa Amoni, wakafanya kambi katika nchi ya milima karibu na Dothaimu. Wakapeleka wengine upande wa kusini, na wengine upande wa mashariki, kuelekea Ekrebeli, karibu na Chusi, kando ya kijito Mokmuri. Na waliobaki wa jeshi la Waashuri wakatua uwandani, wakaenda katika uso wa nchi, hata mahema yao na mizigo yao ilisongana sana kotekote, nao walikuwa watu wengi mno.

Udhia wa Israeli

¹⁹Wana wa Israeli wakamlilia BWANA Mungu wao, maana roho zao zilizimia kwa sababu ya adui zao waliowazunguka pande zote hata hakuna njia ya kutoka katikati yao.

²⁰Jeshi lote la Ashuru likawazunguka hivi, askari wao na magari yao na wapanda farasi wao, muda wa siku thelathini na nne,

²¹hata maji yalikwisha katika vyombo vyote vya watu wa Bethulia. Mabirika yakapungua maji, wala hawakushiba maji hata siku moja, ila walipewa kwa kipimo.

²²Watoto wadogo wakalegea, na wanawake na vijana walizimia kwa kiu, wakaanguka katika njia za mji na penye milango, wala haikuwamo tena nguvu ndani yao.

²³Watu wote wakajikusanya juu ya Uzia, na juu ya wakuu wa mji, vijana, wanawake na watoto, wakalia kwa sauti kubwa, wakasema mbele ya wakuu wote:

²⁴Mungu aamue kati ya ninyi na sisi, maana mmetudhulumu sana kwa kutowapa wana wa Ashuru maneno ya amani.

²⁵Sasa hatuna msaidizi, ila Mungu ametuuza mikononi mwao kuangushwa mbele yao kwa kiu na maangamizo makubwa.

²⁶Basi, waiteni, mtoe mji wote mateka kwa watu wa Holofene na jeshi lake lote.

²⁷Maana ni afadhali kwetu tuwe mateka yao, kwa kuwa hivi tutakuwa watumwa na roho zetu zitaishi; wala hatutaona watoto wetu wachanga wakifa machoni petu, wala wake zetu na wana wetu wakizimia kufani.

²⁸Twawashuhudiza mbingu na nchi, na Mungu wetu, BWANA wa baba zetu, anayetupatiliza dhambi zetu na dhambi za baba zetu, asifanye kama tulivyosema leo.

²⁹Kukatokea kilio kikuu katika mkutano, watu wote wakiomboleza pamoja; wakamlilia BWANA kwa sauti kubwa.

³⁰Uzia akawaambia, Ndugu zangu, jipeni moyo. Tustahimili siku tano tena, ili kwa muda huo BWANA Mungu wetu atuoneshe rehema zake, kwa maana yeye hatatutupa kabisa.

³¹Na kama siku hizi zikipita, wala hatuletewi msaada, basi, nitafanya kama mlivyosema.

³²Akawapa watu ruhusa, kila mtu aende mahali pake, wakaenda kwenye makuta na minara ya mji wao. Akawapeleka wanawake na watoto nyumbani kwao, na wote wa mjini walidhilika kabisa.