Ayubu alalamikia udhalimu duniani

¹Mbona nyakati zisiwekwe na Mwenyezi?[#Mdo 1:7]

Na hao wamjuao mbona hawazioni siku zake?

²Wako waziondoao alama za mipaka;[#Kum 19:14]

Huyachukua makundi na kuyalisha.

³Huwanyang'anya yatima punda wao,[#Kum 24:6,10,12,17]

Humtwaa rehani ng'ombe wake mwanamke mjane.

⁴Humgeuza mhitaji aiache njia;[#Mit 28:28]

Maskini wa nchi hujificha pamoja.

⁵Tazama, kama punda mwitu jangwani

Wao hutoka kwenda kazini mwao, wakitafuta chakula kwa bidii;

Jangwa huwapa chakula cha watoto wao.

⁶Hukata nafaka zao mashambani;

Na kuokota zabibu za waovu.

⁷Hujilaza usiku kucha uchi bila nguo,[#Kut 22:26; Kum 24:12; Isa 58:7]

Wala hawana cha kujifunika baridi.

⁸Hutota kwa manyunyu ya milimani,[#Omb 4:5]

Na kugandamania kwa jabali ili kujikinga,

⁹Wako wamwondoao matitini kwa nguvu huyo asiye na baba,

Na kutwaa rehani kwa maskini;

¹⁰Hata wazunguke uchi bila mavazi,

Nao wakiwa na njaa huchukua miganda;

¹¹Hushindika mafuta ndani ya kuta za watu hao;

Wakanyaga mashinikizo, nao wana kiu.

¹²Watu huugua toka mji ulio na watu wengi,[#Mhu 8:11]

Na roho yake aliyejeruhiwa hupiga ukelele;

Wala Mungu hauangalii upumbavu.

¹³Hawa ni katika hao waliouasi mwanga;

Hawazijui njia zake,

Wala hawakai katika mapito yake.

¹⁴Mwuaji huamka asubuhi kukipambazuka, huwaua maskini na wahitaji;

Tena wakati wa usiku yu kama mwizi.

¹⁵Tena jicho lake mzinifu hungojea wakati wa gizagiza,

Akisema, Hapana jicho litakaloniona;

Naye huuficha uso wake.

¹⁶Wao hutoboa nyumba gizani;[#Yn 3:20]

Hujifungia ndani wakati wa mchana;

Hawaujui mwanga.

¹⁷Maana asubuhi kwao wote ni kama giza tupu;

Maana wao wavijua vitisho vya hiyo giza tupu.

¹⁸Mwasema, Yeye ni mwepesi juu ya uso wa gharika;

Sehemu yao inalaaniwa duniani;

Hageuki kwenda njia ya mizabibuni.

¹⁹Ukame na joto hukausha maji ya theluji;

Kama kuzimu kuwafanyavyo watenda dhambi.

²⁰Tumbo lililomzaa litamsahau; buu litamla na kuona tamu;[#Mit 10:7]

Hatakumbukwa tena;

Na udhalimu utavunjwa kama mti.

²¹Naam, yeye huwala walio tasa wasiozaa;

Wala hamtendei mema mwanamke mjane.

²²Lakini Mungu huwadumisha wenye uwezo kwa nguvu zake;

Huinuka, wasiokuwa na tumaini la kuishi.

²³Huwapa usalama, nao wapumzika kwao;

Na macho yake yako juu ya njia zao.

²⁴Wao wametukuzwa; lakini kitambo kidogo hutoweka;[#Zab 37:35,36]

Naam, hushushwa, na kuondolewa njiani kama wengine wote,

Nao hukatwa kama vile masuke ya ngano.

²⁵Na kama sivyo sasa, ni nani atakayenihukumu mimi kuwa ni mwongo,

Na kuyafanya maneno yangu kuwa si kitu?