Hekima inapopatikana

¹Hakika kuna shimo wachimbako fedha,

Na mahali wapatapo dhahabu waisafishayo.

²Chuma hufukuliwa katika ardhi,

Na shaba huyeyushwa katika mawe.

³Binadamu hukomesha giza;[#Mit 2:4; Mhu 1:13]

Huyatafutatafuta hata katika maeneo ya mbali,

Mawe ya madini katika giza, giza kuu.

⁴Hufukua shimo mbali na makao ya watu;

Husahauliwa na nyayo zipitazo;

Huning'inia mbali na watu, huyumbayumba huku na huko.

⁵Katika ardhi ndimo kitokeamo chakula;

Na chini yake hupinduliwa kama kwa moto.

⁶Mawe yake ni mahali zipatikanapo yakuti;

Nayo ina mchanga wa dhahabu.

⁷Njia ile hapana ndege mkali aijuaye,

Wala jicho la tai halijaiona;

⁸Wanyama wakali wajivunao hawajaikanyaga,

Wala simba mkali hajaipita.

⁹Huunyoshea mwamba wa gumegume mkono wake;

Huipindua milima hata misingi yake.

¹⁰Hukata mifereji kati ya majabali;

Na jicho lake huona kila kito cha thamani.

¹¹Hufunga vijito visichuruzike;

Na kitu kilichositirika hukifunua.

¹²Bali hekima itapatikana wapi?[#Ayu 11:7,8; Zab 139:6; Mhu 7:24]

Na mahali pa ufahamu ni wapi?

¹³Mwanadamu hajui thamani yake,[#Mit 3:15]

Wala haionekani katika nchi ya walio hai.

¹⁴Vilindi vyasema, Haimo ndani yangu;[#Rum 11:33]

Na bahari yasema, Haiko kwangu.

¹⁵Haipatikani kwa dhahabu,[#Mit 3:13,14]

Wala fedha haitapimwa iwe thamani yake.

¹⁶Haiwezi kutiwa thamani kwa dhahabu ya Ofiri,

Wala kwa shohamu ya thamani nyingi, wala kwa yakuti samawi.

¹⁷Dhahabu na vioo haviwezi kulinganishwa nayo;

Wala kubadili kwake hakutakuwa kwa vyombo vya dhahabu safi.

¹⁸Havitatajwa fedhaluka wala bilauri;

Naam, kima cha hekima chapita marijani.

¹⁹Yakuti ya rangi ya manjano ya Kushi haitasawazishwa nayo,

Wala haitatiwa kima kwa dhahabu safi.

²⁰Basi hekima yatoka wapi?

Na mahali pa ufahamu ni wapi?

²¹Kwa kuwa imefichwa mbali na macho ya wote walio hai,

Na kusitirika na ndege wa angani.

²²Uharibifu na Mauti husema,

Tumesikia habari zake kwa masikio yetu.

²³Mungu ndiye aijuaye njia yake,[#Mdo 15:18; Ebr 4:13]

Naye anajua mahali pake.

²⁴Maana anatazama hata miisho ya nchi,[#Mit 15:3]

Na kuona chini ya mbingu nzima.

²⁵Apate kuufanyia upepo uzito wake;[#Zab 135:7]

Naam, anayapima maji kwa kipimo.

²⁶Hapo alipoiwekea mvua amri,[#Ayu 38:25; Zab 148:8; Yer 14:22]

Na njia kwa umeme wa radi.

²⁷Ndipo alipoiona na kuitangaza;

Aliithibitisha, naam, na kuichunguza.

²⁸Kisha akamwambia mwanadamu,[#Zab 111:10; Mit 1:7; 9:10; Kum 29:29; 4:6]

Tazama, kumcha Bwana ndiyo hekima,

Na kujitenga na uovu ndio ufahamu.