Ayubu amalizia hoja zake

¹Kisha Ayubu akaendelea na hoja yake, na kusema,

²Laiti ningekuwa kama nilivyokuwa katika miezi ya zamani,

Kama katika siku hizo Mungu aliponilinda;

³Hapo taa yake ilipomulika juu yangu kichwani,[#Ayu 18:6; Zab 18:28]

Nami nilitembea gizani kwa njia ya mwanga wake;

⁴Kama nilivyokuwa katika siku zangu za kukomaa,[#Zab 25:14; Mit 3:32]

Hapo siri ya Mungu ilipokuwa hemani mwangu;

⁵Wakati Mwenyezi alipokuwa angali pamoja nami,

Nao watoto wangu walipokuwa wakinizunguka;

⁶Wakati hatua zangu zilipokuwa zikioshwa kwa siagi,[#Mwa 49:11; Kum 32:13; Zab 81:16]

Nalo jabali liliponimiminia mito ya mafuta!

⁷Wakati nilipotoka kwenda mjini, kupitia langoni,

Nilipokitengeza kiti changu katika njia kuu,

⁸Hao vijana waliniona wakanipisha,

Nao wazee wakasimama kwa heshima;

⁹Wakuu wakanyamaa wasinene,

Na kuweka mikono yao vinywani mwao;

¹⁰Sauti yao wakuu ilinyamaa,[#Zab 137:6]

Na ndimi zao zilishikamana na makaakaa yao.

¹¹Maana sikio liliponisikia, ndipo likanibarikia;

Na jicho liliponiona, likanishuhudia.

¹²Kwa sababu nilimwokoa maskini aliyenililia;[#Zab 72:12; Mit 21:13]

Yatima naye, na yule asiyekuwa na mtu wa kumsaidia.

¹³Baraka yake yeye aliyekuwa karibu na kupotea ilinijia;

Nikaufanya moyo wa mjane kuimba kwa furaha.

¹⁴Nilijivika haki, ikanifunika,[#Zab 132:9; Rum 13:14; Efe 6:14]

Adili yangu ilikuwa kama joho na kilemba.

¹⁵Nilikuwa macho kwa kipofu,[#Hes 10:31]

Nilikuwa miguu kwa aliyechechemea.

¹⁶Nilikuwa baba kwa mhitaji,[#Mit 29:7]

Na kesi ya mtu nisiyemjua niliichunguza.

¹⁷Nami nilizivunja taya za wasio haki,

Na kumpokonya mawindo katika meno yake.

¹⁸Ndipo niliposema, Nitakufa ndani ya kiota changu,[#Zab 30:6]

Nami nitaziongeza siku zangu kama mchanga;

¹⁹Shina langu limeenea hata kufika majini,[#Zab 1:3; Yer 17:8]

Na umande hukaa usiku kucha katika matawi yangu;

²⁰Utukufu wangu utakuwa mpya kwangu,[#Mwa 49:24]

Na uta wangu hurejeshwa upya mkononi mwangu.

²¹Watu walitega masikio kunisikiliza, na kungoja,

Wakanyamaza kimya wapate kusikia mashauri yangu.

²²Hawakunena tena baada ya kusikia maneno yangu;

Matamko yangu yakadondoka juu yao.

²³Walikuwa wakiningojea kama kungojea mvua;

Wakafunua vinywa vyao sana kama mvua ya masika.

²⁴Walipokata tamaa nikacheka nao;

Na mwanga wa uso wangu hawakuuangusha.

²⁵Niliwachagulia njia, nikakaa kama mkuu wao.

Nikakaa kama mfalme katika jeshi la askari,

Mfano wa awafarijiye hao waombolezao.