Elihu atangaza haki ya Mungu

¹Tena Elihu akajibu na kusema,

²Sikilizeni maneno yangu, enyi wenye hekima;

Tegeni masikio kwangu, ninyi mlio na maarifa.

³Kwa kuwa sikio huyajaribu maneno,

Kama vile kaakaa lionjavyo chakula.

⁴Na tujichagulie yaliyo ya uelekevu;

Na tujue wenyewe yaliyo mema.

⁵Kwani Ayubu amesema, Mimi ni mwenye haki,[#Ayu 33:9; 27:2]

Naye Mungu ameniondolea haki yangu;

⁶Nijapokuwa mwenye haki, nimehesabiwa kuwa mwongo;[#Ayu 9:17]

Jeraha langu haliponyeki, nijapokuwa sina makosa.

⁷Je! Ni mtu gani mfano wa Ayubu,

Anywaye mzaha kama maji?

⁸Atembeaye na hao watendao uovu,

Na kwenda pamoja na watu wabaya.

⁹Kwa kuwa amenena, Haimfai mtu lolote[#Ayu 9:22]

Kujifurahisha na Mungu.

¹⁰Kwa hiyo nisikilizeni, enyi wenye fahamu;[#Mwa 18:25; Kum 32:4]

Mungu asidhaniwe kutenda udhalimu;

Wala Mwenyezi kufanya uovu.

¹¹Kwani atamlipa binadamu kwa kazi yake,[#Zab 62:12; Mit 24:12; Mt 16:27; Ufu 22:12]

Naye atamfanya kila mtu kuona kulingana na njia zake.

¹²Naam, hakika, Mungu hatatenda mabaya,

Wala Mwenyezi hatapotosha hukumu.

¹³Ni nani aliyemwagiza kuiangalia dunia?

Au ni nani aliyemwekea ulimwengu huu wote?

¹⁴Kama akimwekea mtu moyo wake,[#Mhu 12:7]

Akijikusanyia roho yake na pumzi zake;

¹⁵Wenye mwili wote wangeangamia pamoja,

Nao wanadamu watarejea tena kuwa mavumbi.

¹⁶Ikiwa una ufahamu, sikia neno hili;

Isikilize sauti ya maneno yangu.

¹⁷Je! Atatawala mtu aichukiaye haki hata mmoja?[#Mwa 18:25]

Nawe, je! Utamhukumia mkosa aliye na haki na mwenye nguvu?

¹⁸Je! Inafaa kumwambia mfalme, Wewe u mwovu?

Au kuwaambia wakuu, Ninyi ni wabaya?

¹⁹Sembuse yeye huwajali nyuso za wakuu,[#Kum 10:17]

Wala hawajali matajiri kuliko maskini?

Kwani wote ni kazi ya mikono yake,

²⁰Hufa ghafla, hata usiku wa manane;

Watu hutikisika na kwenda zao,

Nao mashujaa huondolewa pasipo mkono wa mtu.

²¹Kwani macho yake yako juu ya njia za mtu,

Naye huziona hatua zake zote.

²²Hapana hofu ya giza kuu,

mahali wawezapo kujificha watendao udhalimu.

²³Kwani yeye hana haja ya kumfikiria mtu zaidi,[#Ezr 9:13]

ili aende mbele za Mungu ahukumiwe.

²⁴Yeye huwavunjavunja mashujaa pasipo kuwachunguza,

Na kuwaweka wengine mahali pao.

²⁵Kwa sababu hiyo yeye huyatafiti matendo yao;

Naye huwapindua usiku, wakaangamia.

²⁶Yeye huwapiga kwa sababu ya uovu wao,

Waziwazi mbele ya macho ya wengine;

²⁷Kwa sababu walikengeuka, wasimfuate yeye,

Wasikubali kuzishika njia zake hata moja;

²⁸Hata wakafanya kilio cha maskini kumfikia,[#Mhu 5:8; Yak 5:4; Kut 22:23; Zab 34:17; Mhu 3:16,17]

Naye akasikia kilio cha hao wateswao.

²⁹Akitoa utulivu yeye, ni nani awezaye kuhukumia makosa?

Akificha uso wake, ni nani awezaye kumtazama?

Kama hufanyiwa taifa, au mtu mmoja, ni sawasawa;

³⁰Ili huyo mpotovu asitawale,[#Mit 29:2-12; 1 Fal 12:28-30]

Wala pasiwe na wa kuwatega watu.

³¹Kwani kuna mtu aliyemwambia Mungu,

Mimi nimevumilia kurudiwa, ingawa sikukosa;

³²Nisiyoyaona nifundishe wewe;

Kama nimefanya uovu sitafanya tena?

³³Je! Malipo yake yatakuwa kama upendavyo wewe, hata ukayakataa?

Kwani yakupasa wewe kuchagua, si mimi;

Kwa sababu hiyo sema uyajuayo.

³⁴Watu walio na akili wataniambia,

Naam, kila mtu mwenye hekima anisikiaye;

³⁵Huyo Ayubu amesema pasipo maarifa,[#Ayu 38:2]

Na maneno yake hayana hekima.

³⁶Laiti Ayubu angejaribiwa hadi mwisho,

Kwa kuwa amejibu kama watu waovu.

³⁷Maana huongeza uasi juu ya dhambi zake,

Apiga makofi kati yetu,

Na kuongeza maneno yake kinyume cha Mungu.