Ayubu ajibu: Hakuna mpatanishi

¹Ndipo Ayubu akajibu, na kusema,

²Kweli najua kuwa ndivyo hivyo;[#Ayu 4:17; Zab 143:2; Rum 3:20]

Lakini mtu huwaje mwenye haki mbele za Mungu?

³Kama akipenda kushindana naye,

Hawezi kumjibu neno moja katika elfu.

⁴Yeye ni mwenye hekima moyoni, na mwenye uwezo katika nguvu;

Ni nani aliyejifanya kuwa mgumu juu yake, naye akafanikiwa?

⁵Aiondoaye milima, nayo haina habari,

Akiipindua katika hasira zake.

⁶Aitikisaye dunia itoke mahali pake,[#Isa 2:19-21; Hag 2:6,21; Ebr 12:26]

Na nguzo zake hutetemeka.

⁷Aliamuruye jua, nalo halichomozi;

Nazo nyota huzipiga mhuri.

⁸Ambaye peke yake ni mwenye kuzitandika mbingu,

Na kuyakanyaga mawimbi ya bahari.

⁹Yeye afanyaye hizo nyota za Dubu, na Orioni, na hicho Kilimia,[#Ayu 38:31; Amo 5:8; Mwa 1:16]

Na makundi ya nyota ya kusini.

¹⁰Atendaye mambo makuu yasiyochunguzika;

Naam, mambo ya ajabu yasiyohesabika.

¹¹Tazama, yuaenda karibu nami, nisimwone;[#Ayu 23:8]

Tena yuapita kwenda mbele, nisimtambue.

¹²Tazama, yuanyakua, ni nani awezaye kumzuia?[#Isa 45:9; Yer 18:6]

Ni nani awezaye kumwuliza, Wafanya nini?

¹³Mungu haondoi hasira zake;

Hao wamsaidiao Rahabu huinama chini yake.

¹⁴Je! Mimi nitamjibuje,

Na kuyachagua maneno yangu kuhojiana naye?

¹⁵Ambaye, nijapokuwa mimi ni mwenye haki, siwezi kumjibu;[#Ayu 10:15]

Ni lazima nimwombe mshitaki wangu anihurumie.

¹⁶Kama ningemwita, naye akaniitikia;

Hata hivyo singeamini kuwa amesikiza sauti yangu.

¹⁷Yeye anipondaye kwa dhoruba,[#Ayu 2:3; Zab 25:3; Yn 9:3]

Na kuyaongeza majeraha yangu pasipokuwa na sababu.

¹⁸Haniachi nipate kuvuta pumzi,

Lakini hunijaza uchungu.

¹⁹Kama tukitaja nguvu za mashujaa, tazama yupo hapo!

Kama tukitaja hukumu, ni nani atakayemwita mahakamani?

²⁰Ingawa mimi ni mwenye haki, kinywa changu mwenyewe kitanihukumu;

Ingawa mimi ni mkamilifu, kitanishuhudia kuwa mimi ni mpotovu.

²¹Mimi ni mkamilifu; siangalii nafsi yangu;

Naudharau uhai wangu.

²²Hayo yote ni mamoja; kwa hiyo nasema,[#Mhu 9:1,2; Eze 21:3; Lk 13:2-4]

Yeye huangamiza wakamilifu na waovu pia.

²³Kama hilo pigo likiua ghafla,

Atayadhihaki majaribu yake asiye na kosa.

²⁴Dunia imetiwa mkononi mwa waovu;[#2 Sam 15:30; Yer 14:4]

Yeye hufunika nyuso za waamuzi wake;

Kama si yeye, ni nani basi?

²⁵Basi siku zangu zina mbio kuliko tarishi;

Zakimbia, wala hazioni mema.

²⁶Zimepita kama merikebu ziendazo mbio;

Mfano wa tai ayashukiaye mawindo.

²⁷Nikisema, Mimi nitasahau kuugua kwangu,

Nitaacha kununa uso nikachangamke moyo;

²⁸Mimi ninayaogopa mateso yangu yote,[#Kut 20:7; Zab 130:3]

Najua kuwa hutanihesabu kuwa sina hatia.

²⁹Nitahukumiwa kuwa ni mkosa;

Ya nini basi nitaabike bure?

³⁰Ingawaje najiosha kwa maji ya theluji,

Na kuitakasa mikono yangu kwa sabuni;

³¹Lakini utanitupa shimoni,

Nami hata nguo zangu zitanichukia.

³²Maana yeye si mtu, kama mimi, hata nimjibu,[#Mhu 6:10; Isa 45:9; Yer 49:19]

Hata tuwe mahakamani pamoja.

³³Hapana mwenye kuamua katikati yetu,[#1 Sam 2:25]

Awezaye kutuwekea mkono sote wawili.

³⁴Na aniondolee fimbo yake,

Na utisho wake usinitie hofu;

³⁵Hapo Ndipo ningeweza kusema, pasipo kumwogopa;

Maana najua sivyo nilivyo nafsini mwangu.