Tubuni au muangamie

¹Na wakati uo huo walikuwapo watu waliompasha habari ya Wagalilaya wale ambao Pilato alichanganya damu yao na dhabihu zao.[#Mdo 5:37]

²Akawajibu akawaambia, Je! Mwadhani ya kwamba Wagalilaya hao walikuwa wenye dhambi kuliko Wagalilaya wote, hata wakapatwa na mambo hayo?[#Yn 9:2]

³Nawaambia, Sivyo; lakini msipotubu, ninyi nyote mtaangamia vivyo hivyo.[#Zab 7:12]

⁴Au wale kumi na wanane, walioangukiwa na mnara huko Siloamu, ukawaua, mwadhani ya kwamba wao walikuwa wakosaji kuliko watu wote waliokaa Yerusalemu?

⁵Nawaambia, Sivyo; lakini msipotubu, ninyi nyote mtaangamia vivyo hivyo.

Mfano wa mtini usiozaa matunda

⁶Akanena mfano huu; Mtu mmoja alikuwa na mtini umepandwa katika shamba lake la mizabibu; akaenda akitafuta matunda juu yake, asipate.[#Lk 3:9; Mt 3:10; 21:19; Mk 11:13]

⁷Akamwambia mtunzaji wa shamba la mizabibu, Tazama, miaka mitatu hii nimekuja kutafuta matunda juu ya mtini huu, nisipate kitu; uukate, mbona hata nchi unaiharibu?

⁸Akajibu akamwambia, Bwana, uuache mwaka huu nao, hata niupalilie, niutilie samadi;[#2 Pet 3:9,15]

⁹nao ukizaa matunda baadaye, vema! La, usipozaa, ndipo uukate.

Yesu amponya mwanamke mlemavu

¹⁰Siku ya sabato alikuwa akifundisha katika sinagogi mojawapo.

¹¹Na tazama, palikuwa na mwanamke aliyekuwa na pepo wa udhaifu muda wa miaka kumi na minane, naye amepindana, hawezi kujinyosha kabisa.

¹²Yesu alipomwona alimwita, akamwambia, Mama, umefunguliwa katika udhaifu wako.

¹³Akaweka mikono yake juu yake, naye akanyoka mara hiyo, akamtukuza Mungu.[#Mk 7:32]

¹⁴Basi mkuu wa sinagogi alikasirika kwa sababu Yesu amemponya mtu siku ya sabato, akajibu, akawaambia mkutano, Kuna siku sita zifaazo kufanya kazi, basi njoni mponywe katika siku hizo, wala si katika siku ya sabato.[#Kut 20:9-10; Kum 5:13-14]

¹⁵Lakini Bwana akajibu akasema, Enyi wanafiki, kila mmoja wenu, je! Hamfungui ng'ombe wake au punda wake siku ya sabato katika zizi, aende naye kumnywesha?[#Lk 14:5]

¹⁶Na huyu mwanamke, aliye wa uzao wa Abrahamu, ambaye Shetani amemfunga miaka kumi na minane hii, haikupasa afunguliwe kifungo hiki siku ya sabato?[#Lk 19:9; Mdo 3:25]

¹⁷Aliposema haya wakatahayari wote walioshindana naye; mkutano wote wakafurahi kwa sababu ya mambo matukufu yaliyotendwa na yeye.

Mfano wa punje ya haradali

¹⁸Kisha alisema, Ufalme wa Mungu umefanana na nini? Nami niufananishe na nini?[#Mt 13:31-33; Mk 4:30-32]

¹⁹Umefanana na punje ya haradali aliyotwaa mtu akaitupa katika shamba lake; ikamea, ikawa mti; ndege wa angani wakakaa katika matawi yake.[#Dan 4:12,21; Eze 17:23; 31:6]

Mfano wa chachu

²⁰Akasema mara ya pili, Niufananishe na nini ufalme wa Mungu?

²¹Umefanana na chachu aliyotwaa mwanamke akaisitiri ndani ya pishi tatu za unga, hata ukachacha wote pia.

Mlango ulio mwembamba

²²Naye alikuwa akipita katika miji na vijiji, akifundisha, katika safari yake kwenda Yerusalemu.

²³Mtu mmoja akamwuliza, Je! Bwana, watu wanaookolewa ni wachache? Akawaambia,

²⁴Jitahidini kuingia katika mlango ulio mwembamba, kwa maana nawaambia ya kwamba wengi watataka kuingia, wasiweze.[#Mt 7:13,14; Flp 3:12; 1 Tim 6:12]

²⁵Wakati mwenye nyumba atakaposimama na kuufunga mlango, nanyi mkaanza kusimama nje na kuubisha mlango, mkisema, Ee Bwana, tufungulie; yeye atajibu na kuwaambia, Siwajui mtokako;[#Mt 25:11,12]

²⁶ndipo mtakapoanza kusema, Tulikula na kunywa mbele yako, nawe ulifundisha katika njia zetu.[#Mt 7:22,23]

²⁷Naye atasema, Nawaambia, Siwajui mtokako; ondokeni kwangu ninyi nyote mlio wafanyaji wa udhalimu.[#Zab 6:8]

²⁸Ndipo kutakapokuwa na kilio na kusaga meno, mtakapomwona Abrahamu na Isaka na Yakobo na manabii wote katika ufalme wa Mungu, nanyi wenyewe mmetupwa nje.[#Mt 8:11-12; #Mt 22:13; 25:30]

²⁹Nao watakuja watu toka mashariki na magharibi, na toka kaskazini na kusini, nao wataketi chakulani katika ufalme wa Mungu.[#Mal 1:11; Isa 49:12; 59:19; Zab 107:3; Lk 14:15]

³⁰Na tazama, wako walio wa mwisho watakaokuwa wa kwanza, na wa kwanza watakaokuwa wa mwisho.[#Mt 19:30; 20:16; Mk 10:31]

Maombolezo juu ya Yerusalemu

³¹Saa ile ile Mafarisayo kadhaa walimwendea, wakamwambia, Toka hapa, uende mahali pengine, kwa sababu Herode anataka kukuua.

³²Akawaambia, Nendeni, mkamwambie yule mbweha, Tazama, leo na kesho natoa pepo na kuponya wagonjwa, siku ya tatu nakamilisha kazi yangu.

³³Pamoja na hayo imenipasa kushika njia yangu leo na kesho na kesho kutwa; kwa kuwa haiwezekani nabii aangamie nje ya Yerusalemu.

³⁴Ee Yerusalemu, Yerusalemu, uwauaye manabii na kuwapiga kwa mawe waliotumwa kwako, mara ngapi nimetaka kuwakusanya watoto wako kama vile kuku awakusanyavyo vifaranga wake chini ya mbawa zake, wala hamkutaka.[#Mt 23:37-39]

³⁵Angalieni, mmeachiwa nyumba yenu! Nami nawaambia, Hamtaniona tena kamwe, hadi mtakaposema, Amebarikiwa ajaye kwa jina la Bwana.[#Zab 69:25; 118:26; Yer 12:7; 22:5]