Baadhi ya maneno ya Yesu

¹Akawaambia wanafunzi wake, Vikwazo havina budi kuja, lakini ole wake mtu yule ambaye vinakuja kwa sababu yake!

²Ingemfaa zaidi mtu huyo jiwe la kusagia lifungwe shingoni mwake, akatupwe baharini, kuliko kumkosesha mmojawapo wa wadogo hawa.[#Mt 18:6,7]

³Jilindeni; kama ndugu yako akikosa, mwonye; akitubu msamehe.[#Mt 18:15]

⁴Na kama akikukosea mara saba katika siku moja, na kurudi kwako mara saba, akisema, Nimetubu, msamehe.[#Mt 18:21,22]

⁵Mitume wakamwambia Bwana, Tuongezee imani.[#Mk 9:24]

⁶Bwana akasema, Kama mngekuwa na imani kiasi cha chembe ya haradali, mngeuambia mkuyu huu, Ng'oka, ukapandwe baharini, nao ungewatii.[#Mt 17:20; 21:21]

⁷Lakini, ni nani kwenu mwenye mtumwa alimaye au achungaye ng'ombe, atakayemwambia mara arudipo kutoka shambani, Njoo upesi, keti, ule chakula?

⁸Je! Hatamwambia, Nitayarishie chakula, nile; jifunge unitumikie, hata niishe kula na kunywa, ndipo nawe utakapokula na kunywa?

⁹Je! Atampa asante yule mtumwa, kwa sababu ameyafanya aliyoagizwa?

¹⁰Vivyo hivyo nanyi, mtakapokwisha kuyafanya yote mliyoagizwa, semeni, Sisi tu watumwa wasio na faida; tumefanya tu yaliyotupasa kufanya.

Yesu awaponya watu kumi wenye ukoma

¹¹Ikawa walipokuwa njiani kwenda Yerusalemu, alikuwa akipita katikati ya Samaria na Galilaya.[#Lk 9:51; 13:22]

¹²Na alipoingia katika kijiji kimoja, alikutana na watu kumi wenye ukoma; wakasimama mbali,[#Law 13:45,46]

¹³wakapaza sauti wakisema, Ee Yesu, Bwana mkubwa, uturehemu!

¹⁴Alipowaona aliwaambia, Nendeni, mkajioneshe kwa makuhani. Ikawa walipokuwa wakienda walitakasika.[#Law 13:49; 14:1-32; Lk 5:14]

¹⁵Na mmoja wao alipoona kwamba amepona, alirudi, huku akimtukuza Mungu kwa sauti kuu;

¹⁶akaanguka kifudifudi miguuni pake, akamshukuru; naye alikuwa Msamaria.

¹⁷Yesu akajibu, akanena, Hawakutakaswa wote kumi? Wale tisa wako wapi?

¹⁸Je! Hawakuonekana waliorudi kumpa Mungu utukufu ila mgeni huyu?

¹⁹Akamwambia, Inuka, nenda zako, imani yako imekuokoa.[#Lk 7:50]

Kuja kwa ufalme

²⁰Na alipoulizwa na Mafarisayo, Ufalme wa Mungu utakuja lini? Aliwajibu akawaambia, ufalme wa Mungu hauji kwa kuuchunguza;[#Yn 18:36; 3:3]

²¹wala hawatasema, Tazama, upo huku, au, kule, kwa maana, tazama, ufalme wa Mungu umo ndani yenu.[#Mt 24:23; Yn 1:26; 12:35]

²²Akawaambia wanafunzi, Siku zitakuja mtakapotamani kuona siku moja katika siku zake Mwana wa Adamu, msiione.

²³Tena watawaambia, Tazama, kule! Tazama, huku! Msiondoke mahali mlipo, wala msiwafuate;[#Lk 21:8]

²⁴kwa kuwa, kama vile umeme umulikavyo toka upande huu chini ya mbingu hata upande huu chini ya mbingu, ndivyo atakavyokuwa Mwana wa Adamu katika siku yake.[#Mt 24:26,27]

²⁵Lakini kwanza, hana budi kupata mateso mengi, na kukataliwa na kizazi hiki.[#Lk 9:22]

²⁶Na kama ilivyokuwa siku za Nuhu, ndivyo itakavyokuwa katika siku zake Mwana wa Adamu.[#Mwa 6:5-8; Mt 24:37-39]

²⁷Walikuwa wakila na kunywa, walikuwa wakioa na kuolewa, hata siku ile Nuhu aliyoingia katika safina, gharika ikashuka ikawaangamiza wote.[#Mwa 7:6-24]

²⁸Na kadhalika, kama ilivyokuwa katika siku za Lutu, walikuwa wakila na kunywa, walikuwa wakinunua na kuuza, wakipanda na kujenga;[#Mwa 18:20—19:25]

²⁹lakini siku ile Lutu aliyotoka Sodoma kulinyesha moto na kibiriti kutoka mbinguni vikawaangamiza wote.[#Mwa 19:24,25]

³⁰Hivyo ndivyo itakavyokuwa siku ile atakayofunuliwa Mwana wa Adamu.

³¹Katika siku ile, aliye juu ya dari, na mali yake imo ndani ya nyumba, asishuke ili kuitwaa; na kadhalika, aliye shambani asirejee nyuma.[#Mt 24:17-18; Mk 13:15-16; Mwa 19:26]

³²Mkumbukeni mkewe Lutu.[#Mwa 19:26]

³³Mtu yeyote atakaye kuiponya nafsi yake, ataiangamiza; na yeyote atakayeiangamiza ataiponya.[#Mt 10:39; 16:25; Mk 8:35; Lk 9:24; Yn 12:25]

³⁴Nawaambia, usiku huo watu wawili watakuwa katika kitanda kimoja; mmoja atatwaliwa, mmoja ataachwa.

³⁵Wanawake wawili watakuwa wakisaga pamoja; mmoja atatwaliwa, mmoja ataachwa. [[#Mt 24:40,41]

³⁶Watu wawili watakuwa shambani, mmoja atatwaliwa, mmoja ataachwa.]

³⁷Wakajibu, wakamwuliza, Wapi, Bwana? Akawaambia, Ulipo mzoga, ndipo watakapokusanyika tai.[#Ayu 39:30; Mt 24:28]