Yesu na Zakayo

¹Naye alipoingia Yeriko alipita katikati yake.

²Na tazama, palikuwa na mtu, jina lake Zakayo, mkubwa mmoja katika watoza ushuru, naye ni tajiri.

³Huyu alikuwa akitafuta kumwona Yesu ni mtu wa namna gani, asiweze kwa sababu ya umati wa watu, maana ni mfupi wa kimo.

⁴Akatangulia mbio, akapanda juu ya mkuyu apate kumwona, kwa kuwa atakuja kuipitia njia ile.

⁵Na Yesu, alipofika mahali pale, alitazama juu, akamwambia, Zakayo, shuka upesi, kwa kuwa leo imenipasa kushinda nyumbani mwako.

⁶Akafanya haraka, akashuka, akamkaribisha kwa furaha.

⁷Hata watu walipoona, walinung'unika wote, wakisema, Ameingia kukaa kwa mtu mwenye dhambi.[#Lk 15:2]

⁸Zakayo akasimama, akamwambia Bwana, Tazama, Bwana, nusu ya mali yangu nawapa maskini, na ikiwa nimenyang'anya mtu kitu kwa hila namrudishia mara nne.[#Kut 22:1; Hes 5:6,7]

⁹Yesu akamwambia, Leo wokovu umefika nyumbani humu, kwa sababu huyu naye ni mwana wa Abrahamu.[#Lk 13:16; Mdo 3:25; 16:31]

¹⁰Kwa kuwa Mwana wa Adamu alikuja kutafuta na kuokoa kile kilichopotea.[#Mt 18:11; Eze 34:16; Yn 3:17; Lk 5:32; 1 Tim 1:15]

Mfano wa mafungu kumi ya fedha

¹¹Waliposikia hayo, aliongeza kusema mfano, kwa sababu alikuwa karibu na Yerusalemu, na wao walidhani ya kuwa ufalme wa Mungu utaonekana mara moja.[#Mt 25:14-30; #Lk 24:21; Mdo 1:6]

¹²Basi akasema, Mtu mmoja, kabaila, alisafiri kwenda nchi ya mbali, ili ajipatie ufalme na kurudi.[#Mk 13:34]

¹³Akaita watu kumi katika watumwa wake, akawapa mafungu kumi ya fedha, akawaambia, Fanyeni biashara hadi nitakaporudi.

¹⁴Lakini watu wa mji wake walimchukia, wakatuma wajumbe kumfuata na kusema, Hatumtaki huyu atutawale.[#Yn 1:11]

¹⁵Ikawa aliporudi, ameupata ufalme wake, aliamuru waitwe wale watumwa aliowapa fedha, ili ajue faida aliyopata kila mtu kwa biashara yake.

¹⁶Akaja wa kwanza, akasema, Bwana, fungu lako limeleta faida ya mafungu kumi zaidi.

¹⁷Akamwambia, Vema, mtumwa mwema; kwa vile ulivyokuwa mwaminifu katika neno lililo dogo, uwe na mamlaka juu ya miji kumi.[#Lk 16:10]

¹⁸Akaja wa pili, akasema, Bwana, fungu lako limeleta mafungu matano faida.

¹⁹Akamwambia huyu naye, Wewe uwe juu ya miji mitano.

²⁰Akaja mwingine akasema, Bwana, hili ndilo fungu lako, ambalo nililiweka salama katika kitambaa.

²¹Kwa maana nilikuogopa kwa kuwa u mtu mgumu; wachukua usichoweka, wavuna usichopanda.

²²Akamwambia, Nitakuhukumu kwa kinywa chako, mtumwa mwovu wewe. Ulinijua kuwa ni mtu mgumu, nichukuaye nisichoweka, na kuvuna nisichopanda;

²³basi, mbona hukuiweka fedha yangu kwa watoao riba, ili nijapo niipate pamoja na faida yake?

²⁴Akawaambia waliosimama karibu, Mnyang'anyeni hilo fungu, mkampe yule mwenye mafungu kumi.

²⁵Wakamwambia, Bwana, anayo mafungu kumi.

²⁶Nawaambia, Kila aliye na kitu atapewa, bali yule asiye na kitu atanyang'anywa hata alicho nacho.[#Mt 13:12; Mk 4:25; Lk 8:18]

²⁷Tena, wale adui zangu, wasiotaka niwatawale, waleteni hapa muwachinje mbele yangu.

Yesu aingia Yerusalemu kwa shangwe

²⁸Na alipokwisha kusema hayo, alitangulia mbele akipanda kwenda Yerusalemu.

²⁹Ikawa alipokaribia Bethfage na Bethania, kwenye mlima uitwao wa Mizeituni, alituma wawili katika wale wanafunzi,[#Mt 21:1-9; Mk 11:1-10; Yn 12:12-16]

³⁰akisema, Nendeni mpaka katika kijiji kile kinachowakabili, na mtakapoingia ndani mtaona mwanapunda, amefungwa, ambaye hajapandwa na mtu yeyote bado, mfungueni mkamlete hapa.

³¹Na kama mtu akiwauliza, Mbona mnamfungua? Semeni hivi, Bwana anamhitaji.

³²Na wale waliotumwa wakaenda wakaona kama alivyowaambia.

³³Na walipokuwa wakimfungua mwanapunda, wenyewe waliwaambia, Mbona mnamfungua mwanapunda?

³⁴Wakasema, Bwana anamhitaji.

³⁵Wakampeleka kwa Yesu, wakatandika nguo zao juu ya mwanapunda, wakampandisha Yesu.

³⁶Na alipokuwa akienda walitandaza nguo zao njiani.[#2 Fal 9:13]

³⁷Na alipokuwa amekaribia mteremko wa mlima wa Mizeituni, kundi zima la wanafunzi wake walianza kufurahi na kumsifu Mungu kwa sauti kuu, kwa ajili ya matendo yote ya uwezo waliyoyaona,

³⁸wakasema, Ndiye mbarikiwa Mfalme ajaye kwa jina la Bwana; amani mbinguni, na utukufu huko juu.[#Zab 118:26; Lk 2:14]

³⁹Baadhi ya Mafarisayo waliokuwa katika mkutano wakamwambia, Mwalimu, uwakanye wanafunzi wako.

⁴⁰Akajibu, akasema, Nawaambia ninyi, wakinyamaza hawa, mawe yatanena kwa sauti kuu.

Yesu aulilia Yerusalemu

⁴¹Alipofika karibu aliuona mji, akaulilia,[#2 Fal 8:11; Yn 11:35]

⁴²akisema, Laiti ungalijua, hata wewe katika siku hii, yapasayo amani! Lakini sasa yamefichwa machoni pako.[#Kum 32:29; Mt 13:14; Yn 12:38]

⁴³Kwa kuwa siku zitakuja, adui zako watakapokujengea boma, likuzunguke; watakuzingira na kukuhusuru pande zote;

⁴⁴watakuangusha chini wewe na watoto wako ndani yako, wasikuachie jiwe juu ya jiwe, kwa sababu hukutambua majira ya kujiwa kwako.[#Lk 21:6; Zab 137:9]

Yesu atakasa hekalu

⁴⁵Akaingia hekaluni, akaanza kuwatoa wale waliokuwa wakifanya biashara,[#Mt 21:12-16; Mk 11:15-18; Yn 2:13-16]

⁴⁶akiwaambia, Imeandikwa, Nyumba yangu itakuwa nyumba ya sala; lakini ninyi mmeifanya kuwa pango la wanyang'anyi.[#Isa 56:7; Yer 7:11]

⁴⁷Naye akawa akifundisha kila siku hekaluni. Lakini wakuu wa makuhani, na waandishi, na wakuu wa watu walikuwa wakitafuta njia ya kumwangamiza;[#Lk 21:37; 22:53; Yn 18:20]

⁴⁸wasione la kutenda, kwa kuwa watu wote walikuwa wakiandamana naye, wakimsikiliza.