Kuzaliwa kwa Yesu

¹Siku zile amri ilitoka kwa Kaisari Augusto ya kwamba iandikwe orodha ya majina ya watu wote wa ulimwengu.

²Orodha hii ndiyo ya kwanza iliyoandikwa hapo Kirenio alipokuwa mtawala wa Shamu.

³Watu wote wakaenda kuandikwa, kila mtu mjini kwao.

⁴Yusufu naye aliondoka Galilaya, toka mji wa Nazareti, akapanda kwenda Yudea mpaka katika mji wa Daudi, uitwao Bethlehemu, kwa kuwa yeye ni wa ukoo na jamaa ya Daudi;

⁵ili aandikwe pamoja na Mariamu mkewe, ambaye amemposa, naye ana mimba.[#Lk 1:27]

⁶Ikawa, katika kukaa huko, siku zake za kuzaa zikatimia,

⁷akamzaa mwanawe, kifungua mimba, akamvika nguo za kitoto, akamlaza katika hori ya kulia ng'ombe, kwa sababu hawakupata nafasi katika nyumba ya wageni.[#Mt 1:25]

Wachungaji na malaika

⁸Na katika nchi ile ile walikuwako wachungaji wakikaa makondeni na kulinda kundi lao kwa zamu usiku.

⁹Malaika wa Bwana akawatokea ghafla, utukufu wa Bwana ukawang'aria pande zote, wakaingiwa na hofu kuu.

¹⁰Malaika akawaambia, Msiogope; kwa kuwa mimi ninawaletea habari njema ya furaha kuu itakayokuwa kwa watu wote;

¹¹maana leo katika mji wa Daudi amezaliwa, kwa ajili yenu, Mwokozi, ndiye Kristo Bwana.

¹²Na hii ndiyo ishara kwenu; mtamkuta mtoto mchanga amevikwa nguo za kitoto, amelala katika hori ya kulia ng'ombe.

¹³Mara walikuwapo pamoja na huyo malaika, wingi wa jeshi la mbinguni, wakimsifu Mungu, na kusema,[#Dan 7:10]

¹⁴Atukuzwe Mungu juu mbinguni,[#Lk 19:38; Isa 57:19; Efe 2:14,17]

Na duniani iwe amani kwa watu aliowaridhia.

¹⁵Ikawa, malaika hao walipoondoka kwenda zao mbinguni, wale wachungaji waliambiana, Haya, na twendeni mpaka Bethlehemu, tukalione hilo lililofanyika, alilotujulisha Bwana.

¹⁶Wakaenda kwa haraka wakamkuta Mariamu na Yusufu, na yule mtoto mchanga amelala horini.

¹⁷Walipomwona wakatoa habari waliyoambiwa juu ya huyo mtoto.[#Lk 2:10-12]

¹⁸Wote waliosikia wakastaajabu kwa hayo waliyoambiwa na wachungaji.

¹⁹Lakini Mariamu akayaweka maneno hayo yote, akiyafikiri moyoni mwake.[#Lk 2:51]

²⁰Wale wachungaji wakarudi, huku wanamtukuza Mungu na kumsifu kwa mambo yote waliyosikia na kuyaona, kama walivyoambiwa.

Yesu apewa Jina

²¹Hata zilipotumia siku nane za kumtahiri, aliitwa jina lake Yesu; kama alivyoitwa na malaika kabla hajachukuliwa mimba.[#Law 12:3; Lk 1:31,59]

Yesu apelekwa hekaluni

²²Kisha, zilipotimia siku za kutakasika kwao, kama ilivyo Torati ya Musa walikwenda naye hata Yerusalemu, wamweke kwa Bwana,[#Law 12:6-8]

²³(kama ilivyoandikwa katika sheria ya Bwana, Kila mtoto wa kiume aliye kifungua mimba wa mamaye na aitwe mtakatifu kwa Bwana),[#Kut 13:2,12,15]

²⁴wakatoe na sadaka, kama ilivyonenwa katika sheria ya Bwana, Hua wawili au makinda ya njiwa wawili.[#Law 5:11; 12:8]

²⁵Na tazama, pale Yerusalemu palikuwa na mtu, jina lake Simeoni, naye ni mtu mwenye haki, mcha Mungu, akiitarajia faraja ya Israeli; na Roho Mtakatifu alikuwa juu yake.[#Isa 40:1; 49:13]

²⁶Naye alikuwa ameonywa na Roho Mtakatifu ya kwamba hataona mauti kabla ya kumwona Kristo wa Bwana.

²⁷Basi akaja hekaluni ameongozwa na Roho; na wale wazazi walipomleta mtoto Yesu ndani, ili wamfanyie kama ilivyokuwa desturi ya sheria,

²⁸yeye mwenyewe alimpokea mikononi mwake, akamshukuru Mungu, akisema,

²⁹Sasa, Bwana, wamruhusu mtumishi wako,[#Mwa 46:30]

Kwa amani, kama ulivyosema;

³⁰Kwa kuwa macho yangu yameuona wokovu wako,[#Isa 40:5; 52:10]

³¹Uliouweka tayari machoni pa watu wote;

³²Nuru ya kuwa mwangaza wa Mataifa,[#Isa 42:6; 49:6; 52:10]

Na kuwa utukufu wa watu wako Israeli.

³³Na babaye na mamaye walikuwa wakiyastaajabia hayo yaliyonenwa juu yake.

³⁴Simeoni akawabariki, akamwambia Mariamu mama yake, Tazama, huyu amewekwa kwa kuanguka na kuinuka wengi walio katika Israeli, na kuwa ishara itakayonenewa.[#Isa 8:14; Mt 21:42; 1 Kor 1:23; 1 Pet 2:8]

³⁵Nawe mwenyewe, upanga utaingia moyoni mwako, ili yafunuliwe mawazo ya mioyo mingi.

³⁶Palikuwa na nabii mwanamke, jina lake Ana, binti Fanueli, wa kabila la Asheri, na umri wake ulikuwa miaka mingi, alikuwa amekaa na mume miaka saba baada ya uanawali wake.

³⁷Naye ni mjane wa miaka themanini na minne; haondoki katika hekalu, ila huabudu usiku na mchana kwa kufunga na kuomba.[#1 Tim 5:5]

³⁸Huyu alitokea saa ile ile akamshukuru Mungu, na wote waliokuwa wakiutarajia ukombozi katika Yerusalemu akawatolea habari zake.[#Isa 52:9]

Kurudi huko Nazareti

³⁹Basi, walipokwisha kuyatimiza yote kama yalivyoagizwa katika sheria ya Bwana, walirejea Galilaya mpaka mjini kwao, Nazareti.[#Mt 2:23]

⁴⁰Yule mtoto akakua, akaongezeka nguvu, amejaa hekima, na neema ya Mungu ilikuwa juu yake.[#Lk 1:80; 2:52]

Kijana Yesu hekaluni

⁴¹Basi, wazee wake huenda Yerusalemu kila mwaka, wakati wa sikukuu ya Pasaka.[#Kut 12:1-27; 23:14-17; Kum 16:1-8]

⁴²Na alipofikisha umri wa miaka kumi na miwili, walipanda kama ilivyokuwa desturi ya sikukuu;

⁴³na walipokwisha kuzitimiza siku, wakati wa kurudi kwao, yule mtoto Yesu alibaki nyuma huko Yerusalemu, na wazee wake walikuwa hawana habari.[#Kut 12:18]

⁴⁴Nao wakadhani ya kuwa yumo katika msafara; wakaenda mwendo wa kutwa, wakawa wakimtafuta katika jamaa zao na wenzao;

⁴⁵na walipomkosa, wakarudi Yerusalemu, huku wakimtafuta.

⁴⁶Ikawa baada ya siku tatu wakamwona hekaluni, ameketi katikati ya waalimu, akiwasikiliza na kuwauliza maswali.

⁴⁷Nao wote waliomsikia walistaajabia fahamu zake na majibu yake.

⁴⁸Na walipomwona walishangaa, na mama yake akamwambia, Mwanangu, mbona umetutenda hivi? Tazama, baba yako na mimi tulikuwa tukikutafuta kwa huzuni.

⁴⁹Akawaambia, Kwa nini mnitafute? Hamkujua ya kuwa imenipasa kuwamo katika nyumba ya Baba yangu?[#Yn 2:16]

⁵⁰Nao hawakuelewa neno hilo alilowaambia.

⁵¹Akashuka pamoja nao mpaka Nazareti, naye alikuwa akiwatii; na mamaye aliyaweka hayo yote moyoni mwake.[#Lk 2:19]

⁵²Naye Yesu akazidi kuendelea katika hekima na kimo, akimpendeza Mungu na wanadamu.[#1 Sam 2:26; Mit 3:4]