Swali kuhusu mamlaka ya Yesu

¹Ikawa siku moja, alipokuwa akiwafundisha watu hekaluni, na kuihubiri Habari Njema, wakuu wa makuhani na waandishi pamoja na wazee walimtokea ghafla;[#Mt 21:23-27; Mk 11:27-33]

²wakamwambia, wakisema, Tuambie, unatenda mambo hayo kwa mamlaka gani? Tena, ni nani aliyekupa mamlaka haya?

³Akajibu akawaambia, Nami nitawauliza ninyi neno moja; niambieni,

⁴Ubatizo wa Yohana, je! Ulitoka mbinguni au kwa wanadamu?

⁵Wakaulizana wao kwa wao, wakisema, Kama tukisema ulitoka mbinguni, atasema, Basi, mbona hamkumwamini?

⁶Na tukisema ulitoka kwa wanadamu, watu wote watatupiga kwa mawe, kwa kuwa wamemkubali Yohana kuwa ni nabii.

⁷Wakajibu, kwamba, Hatujui ulikotoka.

⁸Yesu akawaambia, Wala mimi siwaambii ninyi ni kwa mamlaka gani ninatenda mambo haya.

Mfano wa wakodishaji shamba waovu

⁹Akaanza kuwaambia watu mfano huu; Mtu mmoja alipanda shamba la mizabibu; akakondisha wakulima, akaenda akakaa katika nchi nyingine muda mrefu.[#Mt 21:33-46; Mk 12:1-12; #Isa 5:1]

¹⁰Na wakati wa mavuno alituma mtumwa kwa wale wakulima ili wampe baadhi ya matunda ya mizabibu; wakulima wakampiga wakamfukuza mikono mitupu.[#2 Nya 36:15,16]

¹¹Akatuma na mtumwa mwingine. Wakampiga huyu naye, wakamwaibisha wakamfukuza mikono mitupu.

¹²Akamtuma na wa tatu; huyu naye wakamtia jeraha, wakamtupa nje.

¹³Basi, bwana wa shamba la mizabibu alisema, Nifanyeje? Nitamtuma mwanangu, mpendwa wangu; yamkini watamheshimu yeye.

¹⁴Lakini, wale wakulima walipomwona, walishauriana wao kwa wao, wakisema, Huyu ndiye mrithi; haya, na tumwue, ili urithi uwe wetu.

¹⁵Wakamtupa nje ya shamba la mizabibu, wakamwua. Basi, bwana wa shamba la mizabibu atawatendaje?

¹⁶Atakuja na kuwaangamiza wakulima wale, na lile shamba la mizabibu atawapa wengine. Waliposikia hayo walisema, Hasha! Yasitukie haya!

¹⁷Akawakazia macho akasema, Maana yake nini basi neno hili lililoandikwa,[#Zab 118:22]

Jiwe walilolikataa waashi,

Hilo limekuwa jiwe kuu la pembeni?

¹⁸Kila mtu aangukaye juu ya jiwe hilo atavunjikavunjika; na yeyote ambaye litamwangukia litamsaga kabisa.[#Isa 8:14]

¹⁹Nao waandishi na wakuu wa makuhani walitaka kumkamata saa iyo hiyo, wakawaogopa watu, maana walitambua ya kwamba mfano huu amewanenea wao.[#Lk 19:48]

Swali kuhusu kulipa kodi

²⁰Wakamviziavizia, wakatuma wapelelezi waliojifanya kuwa watu wa haki, ili wamnase katika maneno yake, wapate kumtia katika enzi na mamlaka ya mtawala.[#Mt 22:15-22; Mk 12:13-17; #Lk 11:54]

²¹Wakamwuliza, wakisema, Mwalimu, twajua ya kwamba wasema na kufundisha yaliyo ya haki, wala hujali cheo cha mtu, bali unafundisha njia ya Mungu kwa kweli.

²²Je! Ni halali tumpe Kaisari kodi, au sivyo?

²³Lakini yeye alitambua hila yao, akawaambia,

²⁴Nionesheni dinari. Ina sura na anwani ya nani? Wakamjibu, Ya Kaisari.

²⁵Akawaambia, Basi, vya Kaisari mpeni Kaisari, na vya Mungu mpeni Mungu.

²⁶Wala hawakuweza kumshitaki kwa maneno yake mbele ya watu; wakastaajabia majibu yake, wakanyamaza.

Swali kuhusu ufunuo

²⁷Kisha baadhi ya Masadukayo wakamwendea, wale wasemao ya kwamba hakuna ufufuo, wakamwuliza,[#Mt 22:23-33,46; Mk 12:18-27,34; #Mdo 23:8]

²⁸wakisema, Mwalimu, Musa alituandikia ya kuwa, mtu akifiwa na ndugu yake mwenye mke, lakini hana mtoto na amtwae huyu mke, ampatie ndugu yake mzao.[#Kum 25:5,6]

²⁹Basi, kulikuwa na ndugu saba. Wa kwanza alioa mke, akafa hana mtoto;

³⁰na wa pili [akamtwaa yule mke, akafa hana mtoto;]

³¹hata wa tatu akamwoa, na kadhalika wote saba, wakafa, wasiache watoto.

³²Mwisho akafa yule mke naye.

³³Basi, katika ufufuo atakuwa mke wa yupi? Maana aliolewa na wote saba.

³⁴Yesu akawaambia, Wana wa ulimwengu huu huoa na kuolewa;

³⁵lakini, wale wahesabiwao kuwa wamestahili kuupata ulimwengu ule, na kule kufufuka katika wafu, hawaoi wala hawaolewi;

³⁶wala hawawezi kufa tena; kwa sababu huwa sawasawa na malaika, nao ni wana wa Mungu, kwa vile walivyo wana wa ufufuo.[#1 Yoh 3:1,2]

³⁷Lakini, ya kuwa wafu hufufuliwa, hata na Musa alionesha katika sura ya Kichaka, hapo alipomtaja Bwana kuwa ni Mungu wa Abrahamu, na Mungu wa Isaka, na Mungu wa Yakobo.[#Kut 3:2,6]

³⁸Naye si Mungu wa wafu, bali wa walio hai; kwa maana kwake wote wanaishi.[#Rum 14:8]

³⁹Waandishi wengine wakajibu wakamwambia, Mwalimu, umesema vema;

⁴⁰wala hawakuthubutu kumwuliza neno baada ya hayo.

Suala kuhusu u-Wana wa Daudi

⁴¹Akawaambia, Wasemaje watu kwamba Kristo ni Mwana wa Daudi?[#Mt 22:41-45; Mk 12:35-37]

⁴²Maana, Daudi mwenyewe asema katika kitabu cha Zaburi,[#Zab 110:1; Yn 7:42]

Bwana alimwambia Bwana wangu,

Uketi mkono wangu wa kulia,

⁴³Hadi niwaweke adui zako

Kuwa kiti cha kuwekea miguu yako.

⁴⁴Basi Daudi amwita Bwana; amekuwaje mwana wake?

Yesu awakana waandishi

⁴⁵Na watu wote walipokuwa wakimsikiliza, aliwaambia wanafunzi wake,[#Mt 23:1,5-7,14; Mk 12:38-40; #Lk 11:43]

⁴⁶Jihadharini na waandishi, wapendao kutembea wakiwa wamevaa mavazi marefu, na kusalimiwa masokoni, na kuketi mbele katika masinagogi, na viti vya mbele karamuni.

⁴⁷Wanakula nyumba za wajane, na kwa unafiki husali sala ndefu. Hao watapata hukumu iliyo kuu.