Wanafunzi kumi na wawili

¹Akawaita wanafunzi wake kumi na wawili, akawapa amri juu ya pepo wachafu, wawatoe, na kuponya magonjwa yote na udhaifu wa kila aina.[#Mk 6:7-13; Lk 9:1-5]

²Na majina ya hao mitume kumi na wawili ni haya; Wa kwanza Simoni aliyeitwa Petro, na Andrea nduguye; Yakobo wa Zebedayo, na Yohana nduguye;[#Mk 3:14-19; Lk 6:13-16; Yn 1:40-49]

³Filipo, na Bartholomayo; Tomaso, na Mathayo mtoza ushuru; Yakobo wa Alfayo, na Thadayo;

⁴Simoni Mkananayo, na Yuda Iskarioti, naye ndiye aliyemsaliti.

Wajibu wa hao kumi na wawili

⁵Hao Kumi na Wawili Yesu aliwatuma, akawaagiza, akisema, Katika njia ya Mataifa msiende, wala katika mji wowote wa Wasamaria msiingie.

⁶Bali shikeni njia kuwaendea kondoo waliopotea wa nyumba ya Israeli.[#Mt 15:24; Mdo 13:46; Yer 50:6]

⁷Na katika kuenda kwenu, hubirini, mkisema, Ufalme wa mbinguni umekaribia.[#Lk 10:4-12; #Mt 4:17; Lk 10:9]

⁸Ponyeni wagonjwa, fufueni wafu, takaseni wenye ukoma, toeni pepo; mmepata bure, toeni bure.[#Mdo 20:33]

⁹Msichukue dhahabu, wala fedha, wala pesa mishipini mwenu;

¹⁰wala mkoba wa safari, wala kanzu mbili, wala viatu, wala fimbo; maana mfanyakazi astahili posho yake.[#1 Kor 9:14; 1 Tim 5:18; Lk 10:4; Hes 18:31]

¹¹Na mji wowote au kijiji chochote mtakachoingia, tafuteni ni nani humo aliye mtu mwaminifu; mkae kwake hadi mtakapotoka.

¹²Nanyi mkiingia katika nyumba isalimuni.[#Lk 10:5,6]

¹³Na nyumba ile ikistahili, amani yenu na iifikie; la, kwamba haistahili, amani yenu na iwarudie ninyi.

¹⁴Na mtu asipowakaribisha wala kuyasikiliza maneno yenu, mtokapo katika nyumba ile, au mji ule, kung'uteni mavumbi ya miguuni mwenu.[#Mdo 13:51; 18:6; Lk 10:10-12]

¹⁵Amin, nawaambia, itakuwa rahisi nchi ya Sodoma na Gomora kustahimili adhabu ya siku ya hukumu, kuliko mji ule.[#Mt 11:24; Mwa 19:24-28; Lk 20:47]

Mateso yajayo

¹⁶Angalieni, mimi nawatuma kama kondoo kati ya mbwamwitu; basi iweni na busara kama nyoka, na kuwa watu wapole kama hua.[#Lk 10:3; Yn 10:12; Mdo 20:29; Rum 16:19; Efe 5:15]

¹⁷Jihadharini na wanadamu; kwa maana watawapeleka mabarazani, na katika masinagogi yao watawapiga;[#Mk 13:9-11; Lk 12:11-12; 21:12-15; #Mt 24:9]

¹⁸nanyi mtachukuliwa mbele ya watawala na wafalme kwa ajili yangu, kuwa ushuhuda kwao na kwa mataifa.[#Mt 24:14; Mdo 25:23; 27:24]

¹⁹Lakini hapo watakapowapeleka, msifikirifikiri jinsi mtakavyosema; maana mtapewa saa ile mtakayosema.[#Lk 12:11,12]

²⁰Kwa kuwa si ninyi msemao, bali ni Roho wa Baba yenu asemaye ndani yenu.[#Yn 14:26; 1 Kor 2:4]

²¹Na ndugu atamsaliti nduguye ili auawe, na baba atamsaliti mwana, na wana watawainukia wazazi wao, na kuwaua.[#Mk 13:12; Lk 21:16; Mt 10:35; Mik 7:6]

²²Nanyi mtakuwa mkichukiwa na watu wote kwa ajili ya jina langu; lakini mwenye kuvumilia hata mwisho, ndiye atakayeokoka.[#Mt 24:9,13; Mk 13:13; Lk 21:17; Yn 15:21]

²³Lakini watakapowafukuza katika mji huu, kimbilieni mwingine; kwa maana ni kweli nawaambia, Hamtaimaliza miji ya Israeli, hata ajapo Mwana wa Adamu.[#Mt 16:28]

²⁴Mwanafunzi hampiti mwalimu wake, wala mtumwa hampiti bwana wake.[#Lk 6:40; Yn 13:16; 15:20]

²⁵Yamtosha mwanafunzi kuwa kama mwalimu wake, na mtumwa kuwa kama bwana wake. Ikiwa wamemwita mwenye nyumba Beelzebuli, je! Si zaidi wale walio wa nyumbani mwake?[#Mt 9:34; 12:24; Mk 3:22; Lk 11:15]

Astahiliye kuogopewa

²⁶Basi, msiwaogope, kwa maana hakuna neno lililositirika, ambalo halitafunuliwa; wala lililofichwa, ambalo halitajulikana.[#Lk 12:2-9; #Mk 4:22; Lk 8:17]

²⁷Niwaambialo ninyi katika giza, lisemeni katika nuru; na msikialo kwa siri, lihubirini juu ya nyumba.

²⁸Msiwaogope wauuao mwili, wasiweze kuiua na roho; afadhali mwogopeni yule awezaye kuangamiza mwili na roho pia katika Jehanamu.[#Yak 4:12]

²⁹Je! Mashomoro wawili hawauzwi kwa senti moja? Wala hata mmoja haanguki chini asipojua Baba yenu;

³⁰lakini ninyi, hata nywele za vichwa vyenu zimehesabiwa zote.

³¹Msiogope basi; bora ninyi kuliko mashomoro wengi.[#Mt 12:12]

³²Basi, kila mtu atakayenikiri mbele ya watu, nami nitamkiri mbele za Baba yangu aliye mbinguni.

³³Bali mtu yeyote atakayenikana mbele ya watu, nami nitamkana mbele za Baba yangu aliye mbinguni.[#2 Tim 2:12; Lk 9:26]

Si Amani, bali upanga

³⁴Msidhani ya kuwa nimekuja kuleta amani duniani; la! Sikuja kuleta amani, bali upanga.[#Lk 12:51-53]

³⁵Kwa maana nilikuja kumfitini mtu na babaye, na binti na mamaye, na mkwe na mkwe mtu;[#Mik 7:6]

³⁶na adui za mtu ni wale wa nyumbani mwake.

³⁷Apendaye baba au mama kuliko mimi, hanistahili; wala apendaye mwana au binti kuliko mimi, hanistahili.[#Kum 33:9; Lk 14:26,27]

³⁸Wala mtu asiyechukua msalaba wake akanifuata, hanistahili.[#Mt 16:24; Mk 8:34; Lk 9:23]

³⁹Mwenye kuiona nafsi yake ataipoteza; naye mwenye kuipoteza nafsi yake kwa ajili yangu ataiona.[#Mt 16:25; Mk 8:35; Lk 9:24; 17:33; Yn 12:25]

Thawabu

⁴⁰Awapokeaye ninyi, anipokea mimi; naye anipokeaye mimi, ampokea yeye aliyenituma.[#Mk 9:37; Lk 9:48; 10:16; Yn 12:44; 13:20; Mt 18:5]

⁴¹Ampokeaye nabii kwa kuwa ni nabii, atapata thawabu ya nabii; naye ampokeaye mwenye haki kwa kuwa ni mwenye haki, atapata thawabu ya mwenye haki.

⁴²Na mtu awaye yote atakayemnywesha mmojawapo wa wadogo hawa angaa kikombe cha maji baridi, kwa kuwa ni mwanafunzi, amin, nawaambia, haitampotea kamwe thawabu yake.[#Mt 25:40; Mk 9:41]