Kuuawa kwa Yohana Mbatizaji

¹Wakati ule mfalme Herode alisikia habari za Yesu, akawaambia watumishi wake,[#Mk 6:14,17-30; Lk 9:7-9; #Lk 3:19,20]

²Huyo ndiye Yohana Mbatizaji; amefufuka katika wafu; na kwa hiyo nguvu hizo zinatenda kazi ndani yake.

³Maana Herode alikuwa amemkamata Yohana, akamfunga, akamtia gerezani, kwa ajili ya Herodia, mke wa Filipo nduguye.[#Lk 3:19-20; Mt 11:2]

⁴Kwa sababu Yohana alimwambia, Si halali kwako kuwa naye.[#Law 18:16; 20:21]

⁵Naye alipotaka kumwua, aliwaogopa watu, maana walimwona Yohana kuwa nabii.[#Mt 21:26]

⁶Hata ilipofika sikukuu ya kuzaliwa kwake Herode, binti ya Herodia alicheza mbele ya watu, akampendeza Herode.

⁷Hata akaahidi kwa kiapo ya kwamba atampa lolote atakaloliomba.

⁸Naye, huku akichochewa na mamaye, akasema, Nipe hapa katika kombe kichwa cha Yohana Mbatizaji.

⁹Naye mfalme akasikitika; lakini kwa ajili ya viapo vyake, na kwa ajili ya wale walioketi karamuni pamoja naye, akaamuru apewe;

¹⁰akatuma mtu, akamkata kichwa Yohana mle gerezani.[#Mt 17:12]

¹¹Kichwa chake kikaletwa katika kombe, akapewa yule msichana; akakileta kwa mamaye.

¹²Wanafunzi wake wakaenda, wakamchukua yule maiti, wakamzika; kisha wakaenda wakampasha Yesu habari.

Kulishwa kwa watu elfu tano

¹³Naye Yesu aliposikia hayo, aliondoka huko katika mashua, akaenda mahali pasipo watu, faraghani. Na makutano waliposikia, walimfuata kwa miguu kutoka mijini mwao.[#Mk 6:31-44; Lk 9:10-17; Yn 6:1-13]

¹⁴Yesu akatoka, akaona mkutano mkuu, akawahurumia, akawaponya wagonjwa wao.[#Mt 9:36]

¹⁵Hata kulipokuwa jioni, wanafunzi wake walimwendea, wakasema, Mahali hapa ni nyika tupu, na saa imekwisha pita; uwaage makutano, waende zao vijijini, wakajinunulie vyakula.

¹⁶Yesu akawaambia, Hawana haja kwenda zao, wapeni ninyi vyakula.

¹⁷Wakamwambia, Hamna kitu hapa ila mikate mitano na samaki wawili.

¹⁸Akasema, Nileteeni hapa.

¹⁹Akawaagiza makutano waketi katika majani; akaitwaa ile mikate mitano na wale samaki wawili, akatazama juu mbinguni, akabariki, akaimega ile mikate, akawapa wanafunzi, wanafunzi wakawapa makutano.

²⁰Wakala wote wakashiba; wakayaokota mabaki ya vipande vya mikate, vikapu kumi na viwili, vimejaa.[#2 Fal 4:44]

²¹Nao waliokula walikuwa wanaume wapatao elfu tano, bila kuhesabu wanawake na watoto.

Yesu atembea juu ya maji

²²Mara akawalazimisha wanafunzi wake wapande katika mashua na kutangulia mbele yake kwenda ng'ambo, wakati yeye alipokuwa akiwaaga mkutano.[#Mk 6:45-56; Yn 6:15-21]

²³Naye alipokwisha kuwaaga makutano, alipanda mlimani faraghani, kwenda kuomba. Na kulipokuwa jioni, alikuwako huko peke yake.[#Lk 6:12; 9:18]

²⁴Na ile mashua imekwisha kufika katikati ya bahari, inapigwa sana na mawimbi; maana upepo ulikuwa unawakabili.

²⁵Hata wakati wa zamu ya nne ya usiku Yesu akawaendea, akienda kwa miguu juu ya bahari.

²⁶Wanafunzi walipomwona akitembea juu ya bahari, wakafadhaika, wakisema, Ni mzimu; wakapiga yowe kwa hofu.[#Lk 24:37]

²⁷Mara Yesu alinena, akawaambia, Jipeni moyo, ni mimi; msiogope.

²⁸Petro akamjibu, akasema, Bwana, ikiwa ni wewe, niamuru nije kwako juu ya maji.

²⁹Akasema, Njoo. Petro akashuka katika mashua, akatembea juu ya maji, ili kumwendea Yesu.

³⁰Lakini alipouona upepo, akaogopa; akaanza kuzama, akapiga yowe, akisema, Bwana, niokoe.

³¹Mara Yesu akanyosha mkono wake, akamshika, akamwambia, Ewe mwenye imani haba, mbona uliona shaka?[#Mt 8:26]

³²Nao walipopanda katika mashua, upepo ulikoma.

³³Nao waliokuwamo ndani ya mashua wakamsujudia, wakisema, Hakika wewe u Mwana wa Mungu.

Yesu awaponya wagonjwa katika Genesareti

³⁴Na walipokwisha kuvuka, walifika nchi ya Genesareti.

³⁵Na watu wa mahali pale walipomtambua, walituma watu kwenda nchi zile zilizo kandokando, wakamletea wote waliokuwa wagonjwa;

³⁶nao wakamsihi waguse hata pindo la vazi lake tu; na wote waliogusa wakaponywa kabisa.[#Mt 9:21; Lk 6:19]