Wafanya kazi katika shamba la mizabibu

¹Kwa maana ufalme wa mbinguni unafanana na mtu aliyetoka alfajiri kwenda kuwaajiri wafanya kazi awapeleke katika shamba lake la mizabibu.[#Mt 21:33]

²Naye alipokwisha kupatana na wafanya kazi kuwapa kutwa dinari, aliwapeleka katika shamba lake la mizabibu.

³Akatoka mnamo saa tatu, akaona wengine wamesimama sokoni wasiokuwa na kazi;

⁴na hao nao akawaambia, Nendeni nanyi pia katika shamba langu la mizabibu, na iliyo haki nitawapa. Wakaenda.

⁵Akatoka tena mnamo saa sita na saa tisa, akafanya vile vile.

⁶Hata kama saa kumi na moja akatoka, akakuta wengine wamesimama, akawaambia, Mbona mmesimama hapa mchana kutwa bila kazi?

⁷Wakamwambia, Kwa sababu hakuna mtu aliyetuajiri. Akawaambia, nanyi pia nendeni katika shamba la mizabibu.

⁸Kulipokuchwa, yule bwana wa shamba akamwambia msimamizi wake, Waite wafanya kazi, uwalipe ujira wao, ukianzia wa mwisho hadi wa kwanza.[#Law 19:13; Kum 24:15]

⁹Na walipokuja wale wa saa kumi na moja, walipokea kila mtu dinari.

¹⁰Na wale wa kwanza walipokuja, walidhani kwamba watapokea zaidi; na hao pia wakapokea kila mtu dinari.

¹¹Basi wakiisha kuipokea, wakamnung'unikia mwenye nyumba,

¹²wakisema, Hao wa mwisho wamefanya kazi saa moja tu, nawe umewasawazisha na sisi tuliostahimili taabu na joto la mchana kutwa.

¹³Naye akamjibu mmoja wao, akamwambia, Rafiki, sikudhulumu; hukupatana nami kwa dinari?

¹⁴Chukua iliyo yako, uende zako; napenda kumpa huyu wa mwisho sawa na wewe.

¹⁵Si halali yangu kutumia vilivyo vyangu kama nipendavyo? Au jicho lako limekuwa ovu kwa sababu ya mimi kuwa mwema?[#Rum 9:16,21; Mt 6:23]

¹⁶Vivyo hivyo wa mwisho watakuwa wa kwanza, na wa kwanza watakuwa wa mwisho.[#Mt 19:30; Mk 10:31; Lk 13:30]

Yesu asema juu ya kifo chake na kufufuka kwake

¹⁷Yesu alipokuwa akipanda kwenda Yerusalemu, aliwachukua wale wanafunzi kumi na wawili faraghani; na njiani akawaambia,[#Mk 10:32-34; Lk 18:31-33]

¹⁸Angalieni, tunapanda kwenda Yerusalemu; na Mwana wa Adamu atatiwa mikononi mwa wakuu wa makuhani na waandishi; nao watamhukumu afe;[#Mt 16:21; 17:22,23]

¹⁹kisha watampeleka kwa Mataifa wapate kumdhihaki, na kumpiga mijeledi, na kumsulubisha; na siku ya tatu atafufuka.

Ombi la mama wa Yakobo na Yohana

²⁰Ndipo mama yao wana wa Zebedayo akamwendea pamoja na wanawe, akamsujudia, na kumwomba kitu.[#Mk 10:35-45; #Mt 10:2]

²¹Akamwambia, Wataka nini? Akamwambia, Agiza kwamba hawa wanangu wawili waketi mmoja mkono wako wa kulia, na mmoja mkono wako wa kushoto, katika ufalme wako.[#Mt 19:28]

²²Yesu akajibu akasema, Hamjui mnaloliomba. Je! Mwaweza kunywea kikombe nitakachonywea mimi? Wakamwambia, Twaweza.[#Mt 26:39; Yn 18:11; Lk 12:50]

²³Akawaambia, Hakika mtakinywea kikombe changu; lakini kuketi mkono wangu wa kulia na mkono wangu wa kushoto, sina amri kuwapa, bali watapewa waliowekewa tayari na Baba yangu.

²⁴Na wale kumi waliposikia, waliwakasirikia wale ndugu wawili.[#Lk 22:24-26]

²⁵Lakini Yesu akawaita, akasema, Mwajua ya kuwa wakuu wa Mataifa huwatawala kwa nguvu, na wakubwa wao huwatumikisha.[#Lk 22:25-26]

²⁶Lakini haitakuwa hivyo kwenu; bali mtu yeyote anayetaka kuwa mkubwa kwenu, na awe mtumishi wenu;[#Mt 23:11; Mk 9:35; Lk 22:26]

²⁷na mtu yeyote anayetaka kuwa wa kwanza kwenu na awe mtumwa wenu;

²⁸kama vile Mwana wa Adamu asivyokuja kutumikiwa, bali kutumika, na kutoa nafsi yake iwe fidia ya wengi.[#Lk 22:27; Flp 2:7; 1 Tim 2:6]

Yesu aponya vipofu wawili

²⁹Walipokuwa wakitoka Yeriko mkutano mkubwa wakamfuata.[#Mk 10:46-52; Lk 18:35-43]

³⁰Na tazama, vipofu wawili walikuwa wameketi kando ya njia, nao waliposikia ya kwamba Yesu anapita, walipaza sauti, wakisema, Uturehemu, Bwana, mwana wa Daudi![#Mt 15:22]

³¹Mkutano wakawakaripia, wanyamaze. Lakini wao wakazidi kupaza sauti, wakisema, Uturehemu, Bwana, mwana wa Daudi!

³²Yesu akasimama, akawaita, akasema, Mnataka niwafanyie nini?

³³Wakamwambia, Bwana, twataka macho yetu yafumbuliwe.

³⁴Yesu akawahurumia, akawagusa macho yao; mara wakapata kuona, wakamfuata.