Majaribu ya Yesu

¹Kisha Yesu alipandishwa na Roho nyikani, ili ajaribiwe na Ibilisi.[#Mk 1:12,13; Lk 4:1-13; #Ebr 2:18; 4:15]

²Akafunga siku arubaini mchana na usiku, mwishowe akaona njaa.[#Kut 34:28; 1 Fal 19:8]

³Mjaribu akamjia akamwambia, Ikiwa ndiwe Mwana wa Mungu, amuru mawe haya yawe mikate.[#Mwa 3:1-7]

⁴Naye akajibu akasema, Imeandikwa, Mtu hataishi kwa mkate tu, ila kwa kila neno litokalo katika kinywa cha Mungu.[#Kum 8:3]

⁵Kisha Ibilisi akamchukua mpaka mji mtakatifu, akamweka juu ya kinara cha hekalu,[#Mt 27:53]

⁶akamwambia, Ukiwa ndiwe Mwana wa Mungu, jitupe chini; kwa maana imeandikwa,[#Zab 91:11-12]

Atakuagizia malaika zake;

Na mikononi mwao watakuchukua;

Usije ukajikwaa mguu wako katika jiwe.

⁷Yesu akamwambia, Tena imeandikwa, Usimjaribu Bwana Mungu wako.[#Kum 6:16]

⁸Kisha Ibilisi akamchukua mpaka katika mlima mrefu mno, akamwonesha milki zote za ulimwengu, na fahari yake,

⁹akamwambia, Haya yote nitakupa, ukiinama na kunisujudia.

¹⁰Ndipo Yesu alipomwambia, Nenda zako, Shetani; kwa maana imeandikwa, Mwabudu Bwana Mungu wako, na umtumikie yeye peke yake.[#Kum 6:13]

¹¹Kisha Ibilisi akamwacha; na tazama, wakaja malaika wakamtumikia.[#Yn 1:51; Ebr 1:6,14]

Yesu aanza huduma yake katika Galilaya

¹²Basi Yesu aliposikia ya kwamba Yohana amefungwa, alikwenda zake mpaka Galilaya;[#Mk 1:14,15; Lk 4:14,15; #Mt 14:3; Mk 6:17; Lk 3:19-20]

¹³akatoka Nazareti, akaja akakaa Kapernaumu, mji ulioko pwani, mipakani mwa Zabuloni na Naftali;[#Yn 2:12]

¹⁴ili litimie neno lililonenwa na nabii Isaya, akisema,[#Isa 9:1-2]

¹⁵Nchi ya Zabuloni na nchi ya Naftali,[#Isa 9:1-2]

Njia ya bahari, ng'ambo ya Yordani,

Galilaya ya mataifa,

¹⁶Watu wale waliokaa katika giza

Wameona mwanga mkuu,

Nao waliokaa katika nchi na uvuli wa mauti

Mwanga umewazukia.

¹⁷Tokea wakati huo Yesu alianza kuhubiri, na kusema, Tubuni; kwa maana ufalme wa mbinguni umekaribia.[#Mt 3:2]

Yesu awaita wanafunzi wa kwanza

¹⁸Naye alipokuwa akitembea kando ya bahari ya Galilaya, aliona ndugu wawili, Simoni aitwaye Petro, na Andrea nduguye, wakitupa jarife baharini; kwa maana walikuwa wavuvi.[#Mk 1:16-20; Lk 5:1-11; #Yn 1:40]

¹⁹Akawaambia, Nifuateni, nami nitawafanya kuwa wavuvi wa watu.[#Mt 13:47; Eze 47:10]

²⁰Mara wakaziacha nyavu zao, wakamfuata.[#Mt 19:27]

²¹Alipoendelea, akaona ndugu wengine wawili, Yakobo wa Zebedayo, na Yohana nduguye, ambao walikuwa katika mashua pamoja na Zebedayo baba yao, wakizitengeneza nyavu zao; akawaita.

²²Mara wakaiacha mashua na baba yao, wakamfuata.

Yesu awahudumia makundi ya watu

²³Naye alikuwa akizunguka katika Galilaya yote, akifundisha katika masinagogi yao, na kuihubiri Habari Njema ya ufalme, na kuponya kila ugonjwa na maradhi ya kila namna waliyokuwa nayo watu.[#Mt 9:35; Mk 1:39; Lk 4:15,44; Mdo 10:38]

²⁴Na habari zake zikaenea katika Shamu yote; wakamletea wote waliokuwa wagonjwa, walioshikwa na maradhi mbalimbali na mateso, wenye pepo, na wenye kifafa, na wenye kupooza; akawaponya.[#Mk 6:55]

²⁵Na makutano mengi wakamfuata, kutoka Galilaya, na Dekapoli, na Yerusalemu, na Yudea, na ng'ambo ya Yordani.[#Mk 3:7,8; Lk 6:17-19]