Maovu ya jamii yashutumiwa

¹Ole wao wakusudiao mambo maovu, na kutenda mabaya vitandani mwao! Kunapopambazuka asubuhi huyafanya, sababu wana uwezo mikononi mwao.[#Est 3:8,9; Isa 32:7; Zab 7:11-14; 36:4; Hos 7:6; Mwa 31:29]

²Nao hutamani mashamba, na kuyanyakua; na nyumba pia, nao huzichukua; nao humwonea mtu na nyumba yake, naam, mtu na urithi wake.

³Basi BWANA asema hivi, Angalia, nakusudia jambo baya juu ya jamaa hii, ambalo hamtazitoa shingo zenu, wala hamtakwenda kwa kiburi; kwa maana ni wakati mbaya.[#Yer 8:3]

⁴Siku hiyo watatunga mithali juu yenu, na kuomboleza kwa maombolezo ya huzuni nyingi, na kusema,

Sisi tumeangamizwa kabisa;

Yeye analibadili fungu la watu wangu;

Jinsi anavyoniondolea hilo!

Awagawia waasi mashamba yetu.

⁵Kwa hiyo hamtakuwa na mtu atakayeitupa kamba kwa kura katika mkutano wa BWANA.[#Kum 32:8,9]

⁶Msitabiri, ndivyo watabirivyo; wasiyatabiri mambo haya; lawama hazikomi.

⁷Je! Litasemwa neno hili, enyi nyumba ya Yakobo, Roho ya BWANA imepunguzwa? Je! Haya ni matendo yake? Je! Maneno yangu hayamfai yeye aendaye kwa unyofu?

⁸Lakini siku hizi mmeinuka kama adui za watu wangu; mnawapokonya joho lililo juu ya nguo za hao wapitao salama bila kutarajia vita.

⁹Wanawake wa watu wangu mnawatupa nje ya nyumba zao nzuri; watoto wao wachanga mnawanyang'anya utukufu wangu milele.

¹⁰Ondokeni, mwende zenu; maana hapa sipo mahali pa raha yenu; kwa sababu ya uchafu mtaangamizwa, naam, kwa maangamizo makubwa sana.[#Kum 12:9]

¹¹Mtu akienda kwa roho ya uongo, akinena maneno ya uongo, akisema, Nitakutabiria habari ya mvinyo na kileo; mtu huyu atakuwa nabii wao watu hawa.

Ahadi kwa mabaki wa Israeli

¹²Hakika nitakukusanya, Ee Yakobo, nyote pia;[#Isa 11:11; Mik 4:6,7; Sef 3:19]

Bila shaka nitawakusanya waliobaki wa Israeli;

Nitawaweka pamoja kama kondoo katika zizi;

Kama kundi la kondoo katika malisho yao;

Watafanya mvumo kwa wingi wa watu;

¹³Avunjaye amekwea juu mbele yao;

Wamebomoa mahali, wakapita mpaka langoni,

Wakatoka nje huko;

Mfalme wao naye amepita akiwatangulia,

Naye BWANA ametangulia mbele yao.