Kiburi cha Edomu kitashushwa

¹Maono yake Obadia.[#Isa 21:11; Eze 25:12-14; Yoe 3:19; Mal 1:3]

Ndivyo asemavyo Bwana MUNGU juu ya Edomu;

Tumepata habari kwa BWANA,

Na mjumbe ametumwa kati ya mataifa,

Akisema, Haya, inukeni ninyi;

Na tuinuke tupigane naye.

²Tazama, nimekufanya mdogo kati ya mataifa;

Umedharauliwa sana.

³Kiburi cha moyo wako kimekudanganya,[#2 Fal 14:7; 2 Nya 25:12; Isa 14:13; Ufu 18:7]

Wewe ukaaye katika pango za majabali,

Mwenye makao yako juu sana;

Asemaye moyoni, Ni nani atakayenishusha mimi?

⁴Ujapopanda juu kama tai,[#Ayu 20:6; Isa 14:14,15; Yer 49:16; Amo 9:2; Hab 2:9]

Ijapokuwa kiota chako kimewekwa kati ya nyota,

Nitakushusha kutoka huko; asema BWANA.

Ukatili wa Edomu walipizwa kwa uporaji na mauaji

⁵Kama wezi wangekujia, kama wanyang'anyi wangekujia usiku, (jinsi ulivyokatiliwa mbali!) Je! Wasingeiba kiasi cha kuwatosha? Kama wachumao zabibu wangekujia, je! Wasingeacha baadhi ya zabibu, ziokotwe?

⁶Jinsi watu wa Esau wanavyotafutwatafutwa! Jinsi hazina zake zilizofichwa zinavyoulizwaulizwa!

⁷Watu wote wa mapatano yako

Wamekufukuza, hadi mipakani;

Wale waliofanya amani nawe

Wamekudanganya, na kukushinda;

Walao mkate wako wameweka mtego chini yako;

Wala hana ufahamu wa hayo ndani yake.

⁸Siku hiyo, je! Sitawaangamiza watu wenye akili katika Edomu, na wenye ufahamu katika kilima cha Esau? Asema BWANA.

⁹Na mashujaa wako, Ee Temani, watafadhaika, hata iwe kila mtu akatiliwe mbali kwa kuuawa katika kilima cha Esau.[#Zab 76:5; Yer 49:22; Amo 2:16; Nah 3:13]

Edomu alimdhulumu nduguye

¹⁰Kwa sababu ya udhalimu aliotendwa ndugu yako Yakobo, aibu itakufunika, nawe utakatiliwa mbali hata milele.[#Mwa 47:21; Zab 137:7; Eze 35:5,15; Amo 1:11; Mal 1:4]

¹¹Siku ile uliposimama upande, siku ile wageni walipochukua mali zake, na watu wa kabila nyingine walipoingia katika malango yake, na kumpigia kura Yerusalemu, wewe nawe ulikuwa kama mmoja wao.[#Nah 3:10]

¹²Lakini usiitazame siku ya ndugu yako, siku ya mashaka yake, wala usisimange juu ya wana wa Yuda siku ya kuangamizwa kwao; wala usinene maneno ya kiburi katika siku ya shida yao.[#Mik 4:11; Mit 24:17]

¹³Usiingie katika lango la watu wangu, siku ya msiba wao; naam, usiyatazame mateso yao, siku ya msiba wao; wala usitie mikono yako juu ya mali zao, siku ya msiba wao.

¹⁴Wala usisimame penye njia panda, ili kuwakatilia mbali watu wake wakimbiao; wala usiwatoe watu wake waliosalia, katika siku ya dhiki.[#Isa 34:5-17; 63:1-6; Yer 49:7-22; Eze 25:12-14; 35:1-15; Amo 1:11-12; Mal 1:2-5]

¹⁵Kwa maana hiyo siku ya BWANA i karibu juu ya mataifa yote; kama ulivyotenda, ndivyo utakavyotendwa; malipo yako yatakurudia juu ya kichwa chako mwenyewe.[#Amu 1:7; Zab 137:8; Eze 35:15; Yoe 3:7,8]

¹⁶Kwa maana kama vile mlivyokunywa juu ya mlima wangu mtakatifu, ndivyo mataifa yote watakavyokunywa daima; naam, watakunywa na kuyumbayumba, nao watakuwa kana kwamba hawakuwa kamwe.

Ushindi wa mwisho wa Israeli

¹⁷Bali katika mlima Sayuni kutakuwa na watakaookoka, nao utakuwa mtakatifu; na nyumba ya Yakobo watamiliki tena milki zao.

¹⁸Na nyumba ya Yakobo itakuwa moto, na nyumba ya Yusufu itakuwa muali wa moto, na nyumba ya Esau itakuwa mabua makavu, nao watawaka kati yao, na kuwateketeza; wala hatasalia mtu awaye yote katika nyumba ya Esau; kwa kuwa BWANA amesema hayo.

¹⁹Na watu wa Negebu wataumiliki mlima wa Esau; na watu wa Shefela watawamiliki Wafilisti; nao wataimiliki nchi ya Efraimu, na nchi ya Samaria, na Benyamini atamiliki Gileadi.[#Sef 2:7]

²⁰Na watu wa jeshi hili la wana wa Israeli waliotekwa, walio kati ya Wakanaani, watamiliki mpaka Sarepta; na hao watu wa Yerusalemu waliotekwa, waliomo Sefaradi, wataimiliki miji ya Negebu.[#1 Fal 17:9]

²¹Tena waokoaji watakwea juu ya mlima Sayuni ili kuuhukumu mlima wa Esau; na huo ufalme utakuwa ni mali ya BWANA.[#Isa 19:20; Dan 2:24; Zek 14:9; Ufu 11:15]