Mawaidha ya vitendo

¹Mwanangu, kama umekuwa mdhamini wa rafiki yako,[#Mwa 43:9; Mit 27:13; Ebr 7:22; Ezr 10:19]

Ikiwa wewe na mgeni mmepeana mikono,

²Basi umetegwa kwa maneno ya kinywa chako,

Umekamatwa kwa maneno ya kinywa chako,

³Sasa, mwanangu, fanya hivi ukajiokoe,

Kwa kuwa umejitia mkononi mwa jirani yako;

Nenda ukanyenyekee, na kumsihi jirani yako.

⁴Usiache macho yako kupata usingizi,[#Rut 3:18]

Wala kope za macho yako kusinzia.

⁵Ujiponye kama paa na mkono wa mwindaji,

Na kama ndege katika mkono wa mtega mitego.

⁶Ewe mvivu, mwendee chungu,[#Ayu 12:7]

Zitafakari njia zake ukapate hekima.

⁷Kwa maana yeye hana kiongozi,

Wala msimamizi, wala mkuu,

⁸Lakini hujiwekea akiba ya chakula wakati wa jua;

Hukusanya chakula chake wakati wa mavuno.

⁹Ewe mvivu, utalala hadi lini?

Utaondoka lini katika usingizi wako?

¹⁰Bado kulala kidogo, kusinzia kidogo,[#Mit 24:33-34]

Bado kukunja mikono upate usingizi!

¹¹Hivyo umaskini wako huja kama mnyang'anyi,

Na uhitaji wako kama mtu mwenye silaha.

¹²Mtu asiyefaa kitu, mtu wa uovu;

Huenda njiani mwenye kinywa cha upotovu.

¹³Hukonyeza kwa macho, hunena kwa miguu,[#Zab 35:19; Mit 10:10]

Huwaashiria watu kwa vidole vyake.

¹⁴Mna upotovu moyoni mwake, hutunga uovu daima,[#Zab 36:4; Isa 32:7; Mik 2:1; Mt 26:4]

Hupanda mbegu za magomvi.

¹⁵Basi msiba utampata kwa ghafla;[#Yer 19:11]

Ghafla atavunjika, bila njia ya kupona.

¹⁶Kuna vitu sita anavyovichukia BWANA;

Naam, viko saba vilivyo chukizo kwake.

¹⁷Macho ya kiburi, ulimi wa uongo,[#Zab 5:6; Mit 12:22; Hos 4:1,2; Yn 8:44; Mit 1:11; Isa 1:15]

Na mikono imwagayo damu isiyo na hatia;

¹⁸Moyo uwazao mawazo mabaya;[#Mwa 6:5; Isa 59:7; Rum 3:15]

Miguu iliyo myepesi kukimbilia maovu;

¹⁹Shahidi wa uongo asemaye uongo;[#Zab 27:12]

Naye apandaye mbegu za fitina kati ya ndugu.

²⁰Mwanangu, shika maagizo ya baba yako,[#Efe 6:1]

Wala usiiache sheria ya mama yako.

²¹Yafunge hayo katika moyo wako daima;

Jivike hayo shingoni mwako.

²²Uendapo yatakuongoza, ulalapo yatakulinda,

Na uamkapo yatazungumza nawe.

²³Maana maagizo hayo ni taa, na sheria hiyo ni nuru,[#Zab 19:8]

Na maonyo ya kumwadilisha mtu ni njia ya uzima.

²⁴Yakulinde na mwanamke mwovu, asikupate,

Na kukuponya na ubembelezi wa mgeni.

²⁵Usiutamani uzuri wake moyoni mwako;[#2 Sam 11:2-5; Mt 5:28]

Wala usikubali akunase kwa kope za macho yake.

²⁶Maana kwa malaya mtu hutiwa katika hali ya kuhitaji kipande cha mkate;[#Mit 29:3; Eze 13:18]

Na kahaba humwinda mtu anase nafsi yake iliyo ya thamani

²⁷Je! Mtu aweza kuchukua moto kifuani pake,

Na nguo zake zisiteketezwe?

²⁸Je! Mtu aweza kukanyaga makaa ya moto,

Na nyayo zake zisiungue?

²⁹Ndivyo alivyo aingiaye kwa mke wa jirani yake;

Kila mtu amgusaye huyo atakuwa na hatia.

³⁰Watu hawamdharau mwizi,

Akiiba ili kujishibisha, iwapo aona njaa;

³¹Lakini akipatikana, atalipa mara saba;[#Kut 22:1,4]

Atatoa mali yote ya nyumba yake.

³²Mtu aziniye na mwanamke hana akili kabisa;[#Ayu 31:12; Ebr 13:4]

Afanya jambo litakalomwangamiza nafsi yake.

³³Atapata jeraha na kuvunjiwa heshima;

Wala fedheha yake haitafutika.

³⁴Maana wivu ni ghadhabu ya mtu;

Wala hatahurumia siku ya kujilipizia kisasi.

³⁵Hatakubali fidia yoyote;

Wala hatakuwa radhi, ujapomlipa vitu vingi.