Karamu ya hekima

¹Hekima ameijenga nyumba yake,[#Mt 16:18; Efe 2:20; 1 Tim 3:15; Ebr 3:3-6]

Amezichonga nguzo zake saba;

²Amechinja nyama zake, amechanganya divai yake,

Ameiandalia meza yake pia.

³Amewatuma wajakazi wake, analia,[#Mt 22:3,4,9; Lk 14:17; Rum 10:15]

Mahali pa mjini palipoinuka sana,

⁴Kila aliye mjinga na aingie humu.[#Mit 6:32; Mt 11:25]

Tena amwambia mtu aliyepungukiwa na akili,

⁵Njoo ule mkate wangu,[#Wim 5:1; Isa 55:1; Mt 26:26-28]

Ukanywe divai niliyoichanganya.

⁶Enyi wajinga, acheni ujinga, mkaishi,

Mkaende katika njia ya ufahamu.

⁷Amkemeaye mwenye dharau hujipatia fedheha;

Amkaripiaye mtu mbaya hujipatia aibu.

⁸Usimkaripie mwenye dharau, asije akakuchukia;[#Mt 7:6; Zab 141:5]

Mkaripie mwenye hekima, naye atakupenda.

⁹Mwelimishe mwenye hekima, naye atazidi kuwa na hekima;[#Mt 13:12]

Mfundishe mwenye haki, naye atazidi kuwa na elimu;

¹⁰Kumcha BWANA ni mwanzo wa hekima;[#Ayu 28:28; Zab 111:10; Mit 1:7]

Na kumjua Mtakatifu ni ufahamu.

¹¹Maana, kwa msaada wangu siku zako zitazidishwa;[#Mit 10:27]

Na miaka ya maisha yako itaongezwa.

¹²Kama una hekima, una hekima kwa nafsi yako;[#Ayu 35:6,7]

Na kama una dharau, utaichukua peke yako.

¹³Mwanamke mpumbavu hupiga kelele,

Ni mjinga, hajui kitu.

¹⁴Hukaa mlangoni pa nyumba yake,

Juu ya kiti mahali pa mjini palipoinuka,

¹⁵Apate kuwaita wapitao njiani,

Waendao moja kwa moja katika njia zao.

¹⁶Kila aliye mjinga na aingie humu.

Tena amwambia mtu aliyepungukiwa na akili,

¹⁷Maji yaliyoibiwa ni matamu,[#Mit 20:17]

Na mkate ulioliwa kwa siri hupendeza.

¹⁸Lakini huyo hajui ya kuwa wafu wamo humo;

Ya kuwa wageni wake wamo chini kuzimuni.