Shukrani kwa wema wa Mungu

¹Ee nafsi yangu, umhimidi BWANA.

Naam, vyote vilivyo ndani yangu

Vilihimidi jina lake takatifu.

²Ee nafsi yangu, umhimidi BWANA,

Wala usizisahau fadhili zake zote.

³Akusamehe maovu yako yote,[#Isa 33:24; Mt 9:2; Mk 2:5; Lk 7:47; Kut 15:26; Yer 17:14]

Akuponya magonjwa yako yote,

⁴Aukomboa uhai wako kutoka kwa kaburi,

Akutia taji la fadhili na rehema,

⁵Aushibisha mema uzee wako,

Ujana wako ukarejezwa kama tai;

⁶BWANA ndiye afanyaye mambo ya haki,

Na hukumu kwa wote wanaoonewa.

⁷Alimjulisha Musa njia zake,

Wana wa Israeli matendo yake.

⁸BWANA amejaa huruma na neema,[#Kut 34:6; Hes 14:18; Kum 5:10; Yak 5:11]

Haoni hasira upesi, ni mwingi wa fadhili.

⁹Yeye hatashutumu daima,[#Isa 57:16; Yer 3:5; Mik 7:18]

Wala hatashika hasira yake milele.

¹⁰Hakututenda kulingana na hatia zetu,[#Ezr 9:13]

Wala hakutulipa kwa kadiri ya maovu yetu.

¹¹Maana, kama mbingu zilivyoinuka juu ya nchi,

Ndivyo fadhili zake zilivyo kuu kwa wamchao.

¹²Kama mashariki ilivyo mbali na magharibi,[#Isa 43:25; Efe 1:7]

Ndivyo alivyoweka dhambi zetu mbali nasi.

¹³Kama vile baba awahurumiavyo watoto wake,[#Kum 8:5; Isa 63:15,16; Mal 3:17]

Ndivyo BWANA anavyowahurumia wamchao.

¹⁴Kwa maana Yeye anatujua umbo letu,

Na kukumbuka ya kuwa sisi tu mavumbi.

¹⁵Mwanadamu siku zake zi kama majani;

Kama ua la kondeni ndivyo anavyostawi.

¹⁶Maana upepo hupita juu yake, na kutoweka!

Lisionekane mahali lilipokuwa tena.

¹⁷Bali fadhili za BWANA ni kwa wamchao[#Kut 20:6]

Tangu milele hata milele,

Na haki yake ni kwa vizazi vyote;

¹⁸Kwa wale walishikao agano lake,[#Kum 7:9]

Na kuyakumbuka maagizo yake ili wayafanye.

¹⁹BWANA ameweka kiti chake cha enzi mbinguni,[#Zab 47:2]

Na ufalme wake unavitawala vitu vyote.

²⁰Mhimidini BWANA, enyi malaika zake,[#Mt 6:10]

Ninyi mlio hodari, mtendao neno lake,

Mkiisikiliza sauti ya neno lake.

²¹Mhimidini BWANA, enyi majeshi yake yote,[#Mwa 32:2; Dan 7:9]

Ninyi watumishi wake mfanyao mapenzi yake.

²²Mhimidini BWANA, enyi matendo yake yote,

Mahali pote pa milki yake.

Ee nafsi yangu, umhimidi BWANA.