Mungu muumba na atoaye

¹Ee nafsi yangu, umhimidi BWANA.

Wewe, BWANA, Mungu wangu,

Umejifanya mkuu sana;

Umejivika heshima na utukufu.

²Umejivika nuru kama vazi;

Umezitandika mbingu kama pazia;

³Na kuziweka nguzo za ghorofa zake majini.[#Amo 9:6; Isa 19:1]

Huyafanya mawingu kuwa gari lake,

Na kwenda juu ya mabawa ya upepo,

⁴Huwafanya malaika zake kuwa pepo,[#Ebr 1:7]

Na watumishi wake kuwa moto wa miali.

⁵Uliiweka nchi juu ya misingi yake,

Isitikisike milele.

⁶Uliifunika kwa vilindi kama kwa vazi,

Maji yalikuwa yakisimama juu ya milima.

⁷Kwa kukemea kwako yakakimbia,

Kwa sauti ya radi yako yakaenda zake kasi,

⁸Yakapanda milima, yakateremka mabondeni,[#Ayu 38:10]

Mpaka mahali ulipoyatengenezea.

⁹Umeweka mpaka yasiupite,[#Ayu 26:10; Zab 33:7; Yer 5:22; Mwa 9:11]

Wala yasirudi kuifunikiza nchi.

¹⁰Hupeleka chemchemi katika mabonde;

Zapita kati ya milima;

¹¹Zamnywesha kila mnyama wa porini;

Kwayo punda mwitu huzima kiu yao.

¹²Kandokando hukaa ndege wa angani;

Na kuimba wakiwa katika matawi.

¹³Huinywesha milima toka juu angani;

Nchi umeitosheleza kwa mazao ya kazi zako.

¹⁴Huyameesha majani kwa makundi,[#Mwa 1:29,30; Zab 147:8; 136:25; Ayu 28:5]

Na maboga kwa matumizi ya mwanadamu;

Ili atoe chakula katika nchi,

¹⁵Na divai imfurahishe mtu moyo wake.[#Amu 9:13; Mit 31:6,7; Mhu 10:19; Yer 31:12; Mit 14:23; Yn 2:9,10]

Aung'aze uso wake kwa mafuta,

Na mkate umburudishe mtu moyo wake.

¹⁶Miti ya BWANA nayo imetoshelezwa maji,[#Hes 24:6; Zab 29:5]

Mierezi ya Lebanoni aliyoipanda.

¹⁷Humo ndege hujenga viota vyao,

Korongo, anayo makao katika misonobari.

¹⁸Milima mirefu ndiko waliko mbuzi wa mwitu,[#Mit 30:26]

Na magenge ni kimbilio lao wibari.

¹⁹Aliufanya mwezi kwa ajili ya nyakati,[#Mwa 1:14; Ayu 38:12]

Jua latambua kuchwa kwake.

²⁰Wewe hufanya giza, kukawa usiku,[#Isa 45:7]

Ndipo atambaapo kila mnyama wa mwitu.

²¹Wanasimba hunguruma wakitaka mawindo,[#Ayu 38:39]

Wakitafuta chakula chao kutoka kwa Mungu.

²²Jua linapochomoza, wanakwenda zao,

Na kujilaza mapangoni mwao.

²³Mwanadamu atoka kwenda zake kazini,[#Mwa 3:19]

Na kwenye utumishi wake mpaka jioni.

²⁴Ee BWANA, jinsi yalivyo mengi matendo yako![#Mwa 1:20-22]

Kwa hekima umevifanya vyote pia.

Dunia imejaa viumbe wako.

²⁵Bahari iko kule, kubwa na upana,

Ndimo mlimo viendavyo visivyohesabika,

Viumbe hai wakubwa kwa wadogo.

²⁶Ndimo zipitamo merikebu,[#Ayu 41:1; Zab 74:14; Isa 27:1]

Ndimo alimo Lewiathani uliyemwumba acheze humo.

²⁷Hao wote wanakungoja Wewe,[#Rum 11:36]

Uwape chakula chao kwa wakati wake.

²⁸Wewe huwapa,

Wao wanakiokota;

Wewe waukunjua mkono wako,

Wao wanashiba mema;

²⁹Wewe wauficha uso wako,[#Mhu 12:7]

Wao wanafadhaika;

Waiondoa pumzi yao, wanakufa,

Na kuyarudia mavumbi yao,

³⁰Waituma roho yako, wanaumbwa,[#Isa 32:15]

Nawe waufanya upya uso wa nchi.

³¹Utukufu wa BWANA na udumu milele;

BWANA na ayafurahie matendo yake.

³²Aitazamaye nchi, ikatetemeka;[#Hab 3:10]

Aigusaye milima, ikatoka moshi.

³³Nitamwimbia BWANA maadamu ninaishi;

Nitamshangilia Mungu wangu nikiwa hai;

³⁴Kutafakari kwangu na kuwe kutamu kwake;

Maana furaha yangu hutoka kwa BWANA.

³⁵Wenye dhambi waangamizwe katika nchi,[#Mit 2:22]

Watendao ubaya wasiwepo tena.

Ee nafsi yangu, umhimidi BWANA.