Ungamo la dhambi za Israeli

¹Haleluya.[#1 Nya 16:34; 2 Nya 5:13; 7:3; Ezr 3:11; Zab 100:5; 107:1; 118:1; 136:1; Isa 63:7; Yer 33:11; Mt 19:17]

Mshukuruni BWANA kwa kuwa ni mwema,

Kwa maana fadhili zake ni za milele.

²Nani awezaye kuyanena matendo makuu ya BWANA,[#Zab 40:5]

Au kuzihubiri sifa zake zote?

³Heri washikao hukumu,[#Yer 22:15,16; Mt 22:37; Zab 15:2; Mdo 24:16; Gal 6:9]

Na kutenda haki sikuzote.

⁴Ee BWANA, unikumbuke mimi,

Kwa kibali ulicho nacho kwa watu wako.

Unijie kwa wokovu wako,

⁵Ili niuone wema wa wateule wako.

Nipate kuifurahia furaha ya taifa lako,

Na kujisifu pamoja na watu wako.

⁶Tumetenda dhambi pamoja na baba zetu,[#Law 26:40; 1 Fal 8:47; Dan 9:5]

Tumetenda maovu, tumefanya ubaya.

⁷Baba zetu katika Misri[#Kut 14:10-12]

Hawakuzingatia matendo yako ya ajabu;

Hawakukumbuka wingi wa fadhili zako;

Wakaasi penye bahari, Bahari ya Shamu.

⁸Lakini akawaokoa kwa ajili ya jina lake,[#Yos 7:9; Zab 143:11; Yer 14:7,21]

Ayadhihirishe matendo yake makuu.

⁹Akaikemea Bahari ya Shamu ikakauka,[#Kut 14:21-31; Nah 1:4; Isa 63:11]

Akawaongoza vilindini kana kwamba ni nchi kavu.

¹⁰Akawaokoa kutoka kwa mkono wa mtu adui, aliyewachukia,

Na kuwakomboa kutoka kwa mkono wa adui zao.

¹¹Maji yakawafunika watesi wao,

Hakusalia hata mmoja wao.

¹²Ndipo walipoyaamini maneno yake,[#Kut 15:1-21]

Waliziimba sifa zake.

¹³Lakini punde wakayasahau matendo yake,

Wakakosa kungojea ushauri wake.

¹⁴Bali walitamani sana nyikani,[#Hes 11:4-34]

Wakamjaribu Mungu jangwani.

¹⁵Akawapa walichomwomba,[#Isa 10:16]

Lakini akawatumia ugonjwa wa kuwakondesha.

¹⁶Wakamhusudu Musa kambini,[#Hes 16:1-35]

Na Haruni, mtakatifu wa BWANA.

¹⁷Nchi ikapasuka ikammeza Dathani,

Ikaufunika mkutano wa Abiramu.

¹⁸Moto ukawaka katika mkutano wao,

Miali yake ikawateketeza waovu.

¹⁹Walifanya ndama huko Horebu,[#Kut 32:1-14]

Wakaisujudia sanamu ya kusubu.

²⁰Wakaubadili utukufu wao[#Yer 2:11; Rum 1:23]

Kuwa mfano wa ng'ombe mla majani.

²¹Wakamsahau Mungu, mwokozi wao,

Aliyetenda makuu katika Misri.

²²Matendo ya ajabu katika nchi ya Hamu,

Mambo ya kutisha penye Bahari ya Shamu.

²³Akasema ya kuwa atawaangamiza[#Kut 32:10; Kum 9:19; Eze 13:5; 20:13]

Kama Musa, mteule wake, asingalisimama,

Mbele zake na kusimama palipobomoka,

Ili aigeuze hasira yake asije akawaangamiza.

²⁴Wakaidharau nchi ile ya kupendeza,[#Hes 14:1-35]

Wala hawakuliamini neno lake.

²⁵Bali wakanung'unika hemani mwao,

Wala hawakuisikiliza sauti ya BWANA.

²⁶Ndipo alipowainulia mkono wake na kuwaapia,

Ya kuwa atawaangamiza jangwani,

²⁷Na kuwatawanya wazao wao kati ya mataifa,[#Law 26:33]

Na kuwatapanya katika nchi mbali.

²⁸Wakamwabudu Baal-Peori,[#Hes 25:1-13; Kum 4:3; Hos 9:10; Ufu 2:14]

Wakazila dhabihu zilizotolewa kwa wafu.

²⁹Wakamkasirisha kwa matendo yao;

Tauni ikawashambulia.

³⁰Ndipo Finehasi akasimama akafanya hukumu;

Tauni ikazuiliwa.

³¹Akahesabiwa kuwa ana haki

Kizazi baada ya kizazi hata milele.

³²Wakamghadhabisha penye maji ya Meriba,[#Hes 20:2-13; Yak 3:2]

Hasara ikampata Musa kwa ajili yao,

³³Kwa sababu waliiasi roho yake,

Akasema yasiyofaa kwa midomo yake.

³⁴Hawakuwaangamiza watu wa nchi[#Amu 1:21; 2:1-3; 3:5-6; Kum 7:2]

Kama BWANA alivyowaambia;

³⁵Bali walijichanganya na mataifa,[#Amu 3:5; Isa 2:6]

Wakajifunza matendo yao.

³⁶Wakazitumikia sanamu zao,[#Kut 23:33; Kum 7:10; Amu 2:12; 2 Fal 17:8-11; 2 Nya 33:2-7]

Nazo zikawa mtego kwao.

³⁷Naam, walitoa wana wao na binti zao[#Kum 12:30,31; Isa 57:5; Eze 16:20; 2 Fal 17:17]

Kuwa dhabihu kwa mashetani.

³⁸Wakamwaga damu isiyo na hatia,[#Hes 35:33]

Damu ya wana wao na binti zao,

Waliowatoa dhabihu kwa sanamu za Kanaani;

Nchi ikatiwa unajisi kwa damu.

³⁹Ndivyo walivyotiwa uchafu kwa kazi zao,

Wakafanya uasherati kwa matendo yao.

⁴⁰Hasira ya BWANA ikawaka juu ya watu wake,[#Amu 2:14-18]

Akauchukia urithi wake.

⁴¹Akawatia mikononi mwa mataifa,[#Amu 2:14; Neh 9:27]

Nao waliowachukia wakawatawala.

⁴²Adui zao wakawaonea,

Wakatiishwa chini ya mkono wao.

⁴³Mara nyingi aliwaponya,

Bali walikuwa wakimwasi kwa mashauri yao,

Wakawa dhalili kwa uovu wao.

⁴⁴Lakini aliyaangalia mateso yao,[#Amu 10:10]

Aliposikia kilio chao.

⁴⁵Akawakumbukia agano lake;[#Law 26:41; Omb 3:32]

Akawahurumia kwa wingi wa fadhili zake;

⁴⁶Akawajalia kuhurumiwa[#Ezr 9:9; Yer 42:12]

Na watu wote waliowateka.

⁴⁷Ee BWANA, Mungu wetu, utuokoe,[#1 Nya 16:35-36; Lk 1:74; 2 Kor 5:15]

Utukusanye kwa kututoa katika mataifa,

Tulishukuru jina lako takatifu,

Tuzifanyie shangwe sifa zako.

⁴⁸Na ahimidiwe BWANA, Mungu wa Israeli,

Tangu milele hata milele.

Watu wote na waseme, Amina.

Haleluya.