Shukrani kwa kuponywa maradhi

¹Haleluya.

Nampenda BWANA kwa kuwa anaisikiliza

Sauti yangu na dua zangu.

²Kwa maana amenitegea sikio lake,

Kwa hiyo nitamwita siku zangu zote.

³Kamba za mauti zilinizunguka,

Shida za kuzimu zilinipata.

Nilipata dhiki na mateso;

⁴Nikaliitia jina la BWANA.

Ee BWANA, nakuomba sana,

Uniokoe nafsi yangu.

⁵BWANA ni mwenye neema na haki,[#Ezr 9:15; Neh 9:8; Zab 11:7; Yer 12:1; Omb 1:18; Ufu 16:5]

Naam, Mungu wetu ni mwenye rehema.

⁶BWANA huwalinda wasio na hila;

Nilidhilika, akaniokoa.

⁷Ee nafsi yangu, urudi pumzikoni mwako,[#Yer 6:16; Mt 11:29]

Kwa kuwa BWANA amekutendea ukarimu.

⁸Maana umeniponya nafsi yangu na mauti,

Macho yangu na machozi,

Na miguu yangu na kuanguka.

⁹Nitaenenda mbele za BWANA

Katika nchi za walio hai.

¹⁰Nilidumisha imani yangu, hata niliposema,[#2 Kor 4:13]

Mimi nateseka sana.

¹¹Nikiwa katika hangaiko langu nikasema,[#2 Fal 4:16; Yer 9:5; Rum 3:4]

Wanadamu wote ni waongo.

¹²Nimrudishie BWANA nini

Kwa ukarimu wake wote alionitendea?

¹³Nitakipokea kikombe cha wokovu;

Na kulitangaza jina la BWANA;

¹⁴Nitaziondoa nadhiri zangu kwa BWANA,[#Zab 22:25; Yon 2:6]

Naam, mbele ya watu wake wote.

¹⁵Kifo cha waaminifu wa Mungu,[#Ayu 5:26; Zab 72:14; Lk 16:22; Ufu 14:13]

kina thamani machoni pa BWANA.

¹⁶Ee BWANA, hakika mimi ni mtumishi wako,

Mtumishi wako, mwana wa mjakazi wako,

Umevifungua vifungo vyangu.

¹⁷Nitakutolea dhabihu ya kushukuru;

Na kulitangaza jina la BWANA;

¹⁸Nitaziondoa nadhiri zangu kwa BWANA,

Naam, mbele ya watu wake wote.

¹⁹Katika nyua za nyumba ya BWANA,

Ndani yako, Ee Yerusalemu.