Sifa kwa wema na ukuu wa Mungu

¹Haleluya.

Lisifuni jina la BWANA,

Enyi watumishi wa BWANA, sifuni.

²Ninyi msimamao nyumbani mwa BWANA,[#Lk 2:37]

Nyuani mwa nyumba ya Mungu wenu.

³Msifuni BWANA kwa kuwa BWANA ni mwema,

Liimbieni jina lake kwa maana lapendeza.

⁴Kwa sababu BWANA amejichagulia Yakobo,[#Kut 19:5; Kum 7:6,7]

Na Israeli, wawe watu wake hasa.

⁵Maana najua ya kuwa BWANA ni mkuu,

Na Bwana wetu yuko juu ya miungu yote.

⁶BWANA amefanya kila lililompendeza,

Katika mbingu na katika nchi,

Katika bahari na katika vilindi vyote.

⁷Ndiye apandishaye mvuke toka miisho ya nchi;[#Mwa 2:6; Ayu 5:10; Yer 10:13; Zek 10:1; Ayu 28:25; 38:22]

Huifanyia mvua umeme;

Hutoa upepo katika ghala zake.

⁸Aliwapiga wazaliwa wa kwanza wa Misri,

Wa wanadamu na wa wanyama.

⁹Alituma ishara na maajabu kati yako, Ee Misri,

Juu ya Farao na watumishi wake wote.

¹⁰Aliwapiga mataifa mengi,[#Hes 21:24]

Akawaua wafalme wenye nguvu;

¹¹Sihoni, mfalme wa Waamori,[#Yos 12:7]

Na Ogu, mfalme wa Bashani,

Na falme zote za Kanaani.

¹²Akaitoa nchi yao iwe urithi,[#Mwa 17:8]

Urithi wa Israeli watu wake.

¹³Ee BWANA, jina lako linadumu milele,[#Kut 3:15]

BWANA, sifa zako zitakumbukwa na vizazi vyote.

¹⁴Kwa kuwa BWANA atawaamua watu wake,[#Kum 32:36]

Na kuwahurumia watumishi wake.

¹⁵Sanamu za mataifa ni fedha na dhahabu,[#Zab 115:4-8; Ufu 9:20]

Kazi ya mikono ya wanadamu.

¹⁶Zina vinywa lakini hazisemi,

Zina macho lakini hazioni,

¹⁷Zina masikio lakini hazisikii,

Wala hamna pumzi vinywani mwake.

¹⁸Wazifanyao watafanana nazo,

Na kila mmoja anayezitumainia.

¹⁹Enyi mlango wa Israeli, mhimidini BWANA;

Enyi mlango wa Haruni, mhimidini BWANA;

²⁰Enyi mlango wa Lawi, mhimidini BWANA;

Ninyi mnaomcha BWANA, mhimidini BWANA.

²¹Na ahimidiwe BWANA toka Sayuni,

Akaaye Yerusalemu.

Haleluya.