Shukrani na sifa ya Daudi

¹Nitakushukuru kwa moyo wangu wote,[#Zab 119:46]

Mbele ya miungu nitakuimbia zaburi.

²Nitasujudu nikilikabili hekalu lako takatifu,[#1 Fal 8:29; Zab 5:7; Dan 6:10; Yon 2:7; Isa 42:21]

Nitalishukuru jina lako,

Kwa ajili ya fadhili zako na uaminifu wako,

Kwa maana umeikuza ahadi yako,

na jina lako juu ya vyote.

³Siku ile niliyokuita uliniitikia,[#2 Kor 12:9; Zek 10:12]

Ukanifariji nafsi kwa kunitia nguvu.

⁴Ee BWANA, wafalme wote wa dunia watakushukuru,

Watakapoyasikia maneno ya kinywa chako.

⁵Naam, wataziimba njia za BWANA,

Kwa maana utukufu wa BWANA ni mkuu.

⁶Ingawa BWANA yuko juu, anamjali mnyenyekevu,[#Mit 3:34; Yak 4:6]

Naye amjua mwenye kujivuna tokea mbali.

⁷Nijapopitia katika shida,[#Zab 23:3]

Unanilinda juu ya hasira ya adui zangu,

Unaunyosha mkono wako,

Na mkono wako wa kulia unaniokoa.

⁸BWANA atanitimizia malengo yake kwangu;[#Zab 57:2; Flp 1:6]

Ee BWANA, fadhili zako ni za milele;

Usiiache kazi ya mikono yako.