Mungu asiyeweza kukwepwa

¹Ee BWANA, umenichunguza na kunijua.[#Yer 12:3; Ufu 2:23]

²Wewe wajua kuketi kwangu na kusimama kwangu;[#2 Fal 19:27; Mt 9:4; Yn 2:24]

Umelifahamu wazo langu tokea mbali.

³Umepepeta kwenda kwangu na kulala kwangu,

Umeelewa na njia zangu zote.

⁴Maana hamna neno katika ulimini wangu[#Ebr 4:13]

Usilolijua kabisa, BWANA.

⁵Umenizingira nyuma na mbele,

Ukaniwekea mkono wako.

⁶Maarifa hayo ni ya ajabu, yanishinda mimi,

Hayadirikiki, siwezi kuyafikia.

⁷Niende wapi nijiepushe na roho yako?

Niende wapi niukimbie uso wako?

⁸Kama ningepanda mbinguni, Wewe uko;[#Mit 15:11]

Ningefanya kuzimu kitanda changu, Wewe uko.

⁹Ningezitwaa mbawa za asubuhi,

Na kukaa pande za mwisho za bahari;

¹⁰Huko nako mkono wako utaniongoza,

Na mkono wako wa kulia utanishika.

¹¹Kama nikisema, Hakika giza litanifunika,

Na nuru inizungukayo ingekuwa usiku;

¹²Giza nalo halikufichi kitu,

Bali usiku huangaza kama mchana;

Giza na mwanga kwako ni sawasawa.

¹³Maana Wewe ndiwe uliyeniumba mtima wangu,

Uliniunga tumboni mwa mama yangu.

¹⁴Nitakushukuru kwa kuwa nimeumbwa

Kwa njia ya ajabu ya kutisha.

Matendo yako ni ya ajabu,

Na nafsi yangu yajua sana,

¹⁵Mifupa yangu haikusitirika kwako,

Nilipoumbwa kwa siri,

Nilipoungwa kwa ustadi katika pande za chini za nchi;

¹⁶Macho yako yaliniona kabla sijakamilika;

Kitabuni mwako ziliandikwa zote pia,

Siku zilizoamriwa kabla hazijawa bado.

¹⁷Mawazo yako ni mazito sana kwangu;

Ee Mungu; nayo ni makuu sana.

¹⁸Kama ningeyahesabu ni mengi kuliko mchanga;

Niamkapo ningali pamoja nawe.

¹⁹Ee Mungu, laiti ungewaua waovu![#Isa 11:4]

Na laiti watu wa damu wangetoka kwangu;

²⁰Wale wanaokusema kwa ubaya,[#Ayu 21:14,15; Yud 1:15]

na kutenda maovu juu ya jina lako bure.

²¹Je! BWANA nisiwachukie wanaokuchukia?

Nisiudhike nao watu wanaokuasi?

²²Nawachukia kwa upepo wa chuki,

Wamekuwa adui kwangu.

²³Ee Mungu, unichunguze, uujue moyo wangu,[#Ayu 31:6]

Unijaribu, uyajue mawazo yangu;

²⁴Uone kama iko njia iletayo majuto ndani yangu,[#Mt 7:14; Yn 14:6]

Ukaniongoze katika njia ya milele.