Sifa kwa kupata msaada wa Mungu

¹Haleluya.[#146:1 maana yake ni, Msifuni BWANA.]

Ee nafsi yangu, umsifu BWANA.

²Nitamsifu BWANA muda ninaoishi,

Nitamwimbia Mungu wangu ningali ni hai.

³Msiwatumainie wakuu,[#Isa 2:22]

Wala binadamu ambaye hakuna wokovu kwake.

⁴Pumzi yake inapomtoka, anarudi katika udongo wake,[#Mhu 12:7; 1 Kor 2:6]

Siku iyo hiyo mipango yake hutoweka.

⁵Heri ambaye Mungu wa Yakobo ni msaada wake,[#Yer 17:7]

Na tumaini lake ni kwa BWANA, Mungu wake,

⁶Aliyezifanya mbingu na nchi,[#Mik 7:20; Mdo 4:24; 14:15; Ufu 14:7]

Bahari na vitu vyote vilivyomo.

Huishika kweli milele,

⁷Huwafanyia hukumu walioonewa,

Huwapa wenye njaa chakula;

BWANA hufungua waliofungwa;

⁸BWANA huwafumbua macho waliopofuka;

BWANA huwainua walioinama;

BWANA huwapenda wenye haki;

⁹BWANA huwahifadhi wageni;

Huwategemeza yatima na mjane;

Bali njia ya wasio haki huiharibu.

¹⁰BWANA atamiliki milele,

Mungu wako, Ee Sayuni, kwa vizazi vyote.

Haleluya.