Wimbo wa ushindi katika Bwana wa Daudi

¹BWANA ni nuru yangu na wokovu wangu,

Nimwogope nani?

BWANA ni ngome ya uzima wangu,

Nimhofu nani?

²Watenda mabaya waliponikaribia,

Wanile nyama yangu,

Watesi wangu na adui zangu,

Walijikwaa wakaanguka.

³Jeshi lijapojipanga kupigana nami,

Moyo wangu hautaogopa.

Vita vijaponitokea,

Hata hapo nitatumainia BWANA.

⁴Neno moja nimelitaka kwa BWANA,

Nalo ndilo nitakalolitafuta,

Nikae nyumbani mwa BWANA

Siku zote za maisha yangu,

Niutazame uzuri wa BWANA,

Na kutafakari hekaluni mwake.

⁵Maana atanisitiri bandani mwake siku ya mabaya,[#Mit 18:10; Isa 4:6; Kol 3:3]

Atanisitiri katika sitara ya hema yake,

Na kuniinua juu ya mwamba.

⁶Na sasa kichwa changu kitainuka

Juu ya adui zangu wanaonizunguka.

Nami nitatoa dhabihu za shangwe hemani mwake;

Nitaimba, naam, nitamhimidi BWANA.

⁷Ee BWANA, usikie, kwa sauti yangu ninalia,

Unifadhili, unijibu.

⁸Uliposema, “Nitafuteni uso wangu,”

Moyo wangu umekuambia,

BWANA, uso wako nitautafuta.

⁹Usinifiche uso wako,

Usimkatalie mtumishi wako kwa hasira.

Umekuwa msaada wangu, usinitupe,

Wala usiniache, Ee Mungu wa wokovu wangu.

¹⁰Hata baba yangu na mama yangu wakiniacha,[#Isa 49:15; Yn 16:32; 2 Tim 4:16-18]

Bali BWANA atanikaribisha kwake.

¹¹Ee BWANA, unifundishe njia yako,

Na kuniongoza katika njia iliyonyoka;

Kwa sababu yao wanaoniotea;

¹²Usinitie katika nia ya watesi wangu;[#1 Sam 22:9; Mt 26:59,60]

Maana mashahidi wa uongo wamenijia,

Nao watoao jeuri kama pumzi.

¹³Naamini ya kuwa nitauona wema wa BWANA[#Zab 112:7,8]

Katika nchi ya walio hai.

¹⁴Umtumainie BWANA, uwe imara,[#Zab 62:1,5; Isa 25:9; Hab 2:3]

Upige moyo konde, naam, umngoje BWANA.