Sala na sifa kwa kukombolewa kutoka kwa adui

¹Nimekukimbilia Wewe, BWANA,

Nisiaibike milele.

Kwa haki yako uniponye,

²Unitegee sikio lako, uniokoe hima.[#Zab 71:2; Mit 22:17]

Uwe kwangu mwamba wa nguvu,

Ngome thabiti ya kuniokoa.

³Ndiwe mwamba wangu na ngome yangu;[#Zab 23:3; Yer 14:7]

Kwa ajili ya jina lako uniongoze na unichunge.

⁴Utanitoa katika wavu walionitegea kwa siri,

Maana Wewe ndiwe ngome yangu.

⁵Mikononi mwako naiweka roho yangu;[#Lk 23:46; Mdo 7:59; 2 Tim 1:12; Ebr 6:18]

Umenikomboa, Ee BWANA, Mungu wa kweli.

⁶Nawachukia wao washikao yasiyofaa yenye uongo;

Bali mimi namtumainia BWANA.

⁷Na nishangilie, nizifurahie fadhili zako,[#Yn 10:27]

Kwa kuwa umeyaona mateso yangu.

Umeijua nafsi yangu taabuni,

⁸Wala hukunitia mikononi mwa adui;[#Zab 18:19]

Miguu yangu umeisimamisha mahali penye usalama.

⁹Ee BWANA, unifadhili, maana ni katika dhiki,

Jicho langu limenyauka kwa masumbufu,

Naam, mwili wangu na nafsi yangu.

¹⁰Maana maisha yangu yamekwisha kwa huzuni,

Na miaka yangu kwa maumivu.

Nguvu zangu zimeniishia kwa uovu wangu,

Na mifupa yangu imepooza.

¹¹Kwa sababu ya watesi wangu nimelaumiwa,[#Zab 88:8]

Naam, hasa kwa jirani zangu;

Na kitu cha kutisha kwa rafiki zangu;

Wanaoniona njiani wananikimbia.

¹²Nimesahauliwa kama mfu asiyekumbukwa;

Nimekuwa kama chombo kilichovunjika.

¹³Maana nimesikia wengi wakinong'onezana;[#Yer 20:3; Omb 2:22; Mt 27:1]

Hofu katika pande zote.

Waliposhauriana juu yangu,

Walipanga kunitoa uhai wangu.

¹⁴Lakini mimi nakutumaini Wewe, BWANA,

Nimesema, Wewe ndiwe Mungu wangu.

¹⁵Nyakati zangu zimo mikononi mwako;

Uniponye kutoka kwa adui zangu na wanaonifuatia.

¹⁶Umwangaze mtumishi wako[#Hes 6:25; Zab 4:6; Dan 9:17]

Kwa nuru ya uso wako;

Uniokoe kwa ajili ya fadhili zako.

¹⁷Ee BWANA, nisiaibishwe, maana nimekuita;[#Zab 25:2]

Waaibishwe wasio haki, wanyamaze kuzimuni.

¹⁸Midomo ya uongo iwe na ububu,[#Zab 12:3]

Imneneayo mwenye haki maneno ya kiburi,

Kwa majivuno na dharau.

¹⁹Jinsi zilivyo nyingi fadhili zako[#Isa 64:4; 1 Kor 2:9]

Ulizowawekea wakuchao;

Ulizowatendea wakukimbiliao

Mbele ya wanadamu!

²⁰Utawasitiri kutoka kwa fitina za watu[#Zab 27:5; Ayu 5:21]

Katika maficho ya kuwapo kwako;

Utawaficha katika hema

Na ushindani wa ndimi.

²¹BWANA ahimidiwe; kwa maana amenitendea

Fadhili za ajabu nilipozongwa kama mji wenye boma.

²²Nami nilisema kwa pupa yangu,

Nimekatiliwa mbali na macho yako;

Lakini ulisikia sauti ya kilio changu

Wakati nilipokulilia.

²³Mpendeni BWANA,[#1 Pet 1:5]

Ninyi nyote mlio watauwa wake.

BWANA huwahifadhi waaminifu,

Bali humlipiza mwenye kiburi ipasavyo.

²⁴Iweni hodari, na mpige moyo konde,

Ninyi nyote mnaomngoja BWANA.