Sala ya kutaka hekima na msamaha

¹Nilisema, Nitazitunza njia zangu[#1 Fal 2:4; Mit 4:26,27; Ebr 2:1; Kol 4:5]

Nisije nikakosa kwa ulimi wangu;

Nitajitia lijamu kinywani,

Maadamu mtu mbaya awapo mbele yangu.

²Nilikuwa sisemi, nilinyamaa kimya,

Sina faraja, maumivu yangu yakazidi.

³Moyo wangu ukawa moto ndani yangu,[#Yer 20:9]

Na katika kuwaza kwangu moto ukawaka;

Nilisema kwa ulimi wangu,

⁴BWANA, unijulishe mwisho wangu,

Na idadi ya siku zangu ni ngapi;

Nijue jinsi maisha yangu yalivyo mafupi.

⁵Tazama, umefanya siku zangu kuwa mashubiri;[#Zab 90:4]

Maisha yangu ni kama si kitu mbele zako.

Kila mwanadamu, ingawa amesitawi, ni ubatili.

⁶Kweli, watu wote hupita kama kivuli;

Wao hujisumbua bure tu;

Wanajirundikia mali wala hawajui ni nani atakayeirithi.

⁷Na sasa ninangoja nini, Ee Bwana?

Matumaini yangu ni kwako.

⁸Uniokoe kutoka kwa maasi yangu yote,

Usinifanye niwe wa kulaumiwa na mpumbavu.

⁹Nimenyamaza, sifumbui kinywa changu,

Maana Wewe ndiwe uliyeyafanya.

¹⁰Uniondolee pigo lako;

Kwa mapigo ya mkono wako nimeangamia.

¹¹Ukimrudi mtu kwa kumkemea kwa uovu wake,

Watowesha uzuri wake kama nondo.

Kila mwanadamu ni ubatili.

¹²Ee BWANA, usikie maombi yangu,[#Law 25:23; 1 Nya 29:15]

Utege sikio lako niliapo,

Usiyapuuze machozi yangu.

Kwa maana mimi ni mgeni wako,

Msafiri kama baba zangu wote.

¹³Uache kunitazama, ndio nipate kufurahi tena,[#Ayu 10:20,21]

Kabla sijafa na kutoweka kabisa.