Upumbavu wa kutegemea mali

¹Sikieni haya, enyi mataifa yote;

Sikilizeni, ninyi nyote mnaokaa duniani.

²Watu wakuu na watu wadogo wote pia,

Tajiri na maskini wote pamoja.

³Kinywa changu kitanena hekima,

Na fikira za moyo wangu zitakuwa za busara.

⁴Nitatega sikio langu nisikie mithali,[#Zab 78:2]

Na kufumbua fumbo langu kwa kinubi.

⁵Kwa nini niogope wakati wa shida,

Ubaya ukinizunguka miguuni pangu?

⁶Ambao wanazitumainia mali zao,

Na kujisifia wingi wa utajiri wao;

⁷Hakuna mtu awezaye kumkomboa ndugu yake,[#Mt 16:26]

Wala kumlipa Mungu fidia kwa ajili ya maisha yake,

⁸(Maana fidia ya nafsi zao ina gharama,[#Ayu 36:18]

Wala hawezi kuitoa hata milele;)

⁹ndipo aishi milele asilione kaburi.[#Ebr 9:27; Zab 89:48]

¹⁰Naam, ataliona, hata wenye hekima hufa;

Mpumbavu na mjinga hupotea pamoja,

Na kuwaachia wengine mali zao.

¹¹Makaburi ni nyumba zao hata milele,

Maskani zao vizazi hata vizazi.

Japo waliwahi kuyamiliki mashamba,

Kwa majina yao wenyewe.

¹²Lakini mwanadamu hadumu katika heshima,

Bali amefanana na wanyama wapoteao.

¹³Hiyo ndiyo njia yao, ujinga wao,

Nao walioko baada yao huyaridhia maneno yao.

¹⁴Kama kondoo wamewekwa kwenda kuzimu,[#Dan 7:22; Mal 4:3; Lk 22:30; 1 Kor 6:2; 2 Tim 2:12; Ufu 2:26]

Na kifo kitakuwa mchungaji wao;

Watu wanyofu watawamiliki asubuhi;

Miili yao itaoza, kao lao ni kuzimu.

¹⁵Bali Mungu atanikomboa nafsi yangu,[#Hos 13:14]

Atanitoa mkononi mwa kuzimu, maana atanipokea.

¹⁶Usiogope mtu atakapopata utajiri,

Na fahari ya nyumba yake itakapoongezeka.

¹⁷Maana atakapokufa hatachukua chochote;

Utukufu wake hautashuka ukimfuata.

¹⁸Ajapojibariki nafsi yake alipokuwa hai,

Na watu watakusifu ukijitendea mema,

¹⁹Atakwenda kwenye kizazi cha baba zake

Hawataona nuru hata milele.

²⁰Mwanadamu mwenye heshima, iwapo hana akili,[#Mhu 3:19-21]

Amefanana na wanyama wapoteao.