Sala ya kuponywa ugonjwa hatari

¹BWANA, usinikemee kwa hasira yako,[#Zab 38:1]

Wala usinirudi kwa ghadhabu yako.

²BWANA, unifadhili, maana ninanyauka;[#Hos 6:1]

BWANA, uniponye, mifupa yangu imefadhaika.

³Na nafsi yangu imefadhaika sana;[#Mit 18:14; Mt 26:38]

Na Wewe, BWANA, hadi lini?

⁴BWANA urudi, uniopoe nafsi yangu,

Uniokoe kwa ajili ya fadhili zako.

⁵Maana mautini hapana kumbukumbu lako;[#Zab 30:9]

Katika kuzimu ni nani atakayekushukuru?

⁶Nimechoka kwa kuugua kwangu;

Kila usiku nakibubujikia kitanda changu;

Nililowesha godoro langu kwa machozi yangu.

⁷Macho yangu yameharibika kwa masumbufu,

Na kuchakaa kwa sababu yao wanaoniudhi.

⁸Ondokeni kwangu, ninyi nyote mtendao uovu;[#Mt 7:23; Lk 13:27]

Kwa kuwa BWANA ameisikia sauti ya kilio changu.

⁹BWANA ameisikia dua yangu;[#Zab 3:4; 31:22; 40:1,2]

BWANA atayatakabali maombi yangu.

¹⁰Adui zangu wote wataaibika na kufadhaika,

Watarudi nyuma, kwa ghafla wataaibika.