Ombi la kutaka msaada wakati wa kushindwa

¹Ee Mungu, mbona umetutupa milele?[#Zab 95:7; Yer 23:1; Eze 34:8,31; Lk 12:32]

Kwa nini hasira yako inatoka moshi

Juu ya kondoo wa malisho yako?

²Ulikumbuke kusanyiko lako,

Ulilolinunua zamani.

Ulilolikomboa liwe kabila la urithi wako,

Mlima Sayuni ulioufanya maskani yako.

³Upite na kupaona palipoharibika milele;

Adui ameufanya kila ubaya katika patakatifu.

⁴Watesi wako wamenguruma kati ya kusanyiko lako;[#Dan 6:27]

Wameweka bendera zao ziwe alama.

⁵Wanaonekana kama watu wainuao mashoka,

Waikate miti ya msituni.

⁶Na sasa nakishi yake yote pia

Wanaivunjavunja kwa mashoka na nyundo.

⁷Wamepatia moto patakatifu pako;

Wamelinajisi kao la jina lako hata chini.

⁸Walisema mioyoni mwao,[#Zab 83:4]

Na tuwaangamize kabisa;

Mahali penye mikutano ya Mungu

Wamepachoma moto katika nchi pia.

⁹Hatuzioni ishara zetu, wala sasa hakuna nabii,[#1 Sam 3:1; Mik 3:6; Mt 16:4]

Wala kwetu hakuna ajuaye, hadi lini?

¹⁰Ee Mungu, mtesi atalaumu hata lini?

Adui alidharau jina lako hata milele?

¹¹Mbona unaurudisha mkono wako,

Naam, mkono wako wa kulia,

Uutoe kifuani mwako,

Ukawaangamize kabisa.

¹²Lakini Mungu ni mfalme wangu tokea zamani,[#Zab 44:4]

Afanyaye mambo ya wokovu katikati ya nchi.

¹³Wewe umeipasua bahari kwa nguvu zako,[#Kut 14:21; Isa 51:9]

Umevivunja vichwa vya nyangumi juu ya maji.

¹⁴Wewe ulivivunja vichwa vya Lewiathani,[#Kut 17:5,6; Hes 14:9; Hes 20:11; Ayu 41:1; Isa 11:16; Isa 27:1; Yos 3:13; Zab 72:9; Zab 104:26; Zab 105:41; Hab 3:9; Ufu 16:12]

Awe chakula cha watu wa jangwani.

¹⁵Wewe ulitokeza chemchemi na kijito;

Wewe ulikausha mito yenye maji sikuzote.

¹⁶Mchana ni wako, usiku nao ni wako,

Ndiwe uliyeufanya mwanga na jua.

¹⁷Wewe uliiweka mipaka yote ya dunia,[#Mdo 17:26]

Majira ya joto na ya baridi wewe uliyafanya.

¹⁸Ee BWANA, uyakumbuke hayo, adui amelaumu,[#Ufu 16:19]

Na watu wapumbavu wamelidharau jina lako.

¹⁹Usimpe mnyama mkali uhai wa njiwa wako;[#Wim 2:14; 4:1]

Usiwasahau milele watu wako walioonewa.

²⁰Ulitafakari agano lako;[#Mwa 17:7; Law 26:44; Yer 33:21]

Maana mahali kwenye giza katika nchi

Kumejaa makao ya ukatili.

²¹Aliyeonewa asirejee ametiwa haya,[#Zab 9:18]

Mnyonge na mhitaji na walisifu jina lako.

²²Ee Mungu, usimame, ujitetee mwenyewe,[#Isa 37:23]

Ukumbuke unavyotukanwa na mpumbavu mchana kutwa.

²³Usiisahau sauti ya watesi wako,

Ghasia yao wanaokupinga inapaa daima.