Sala ya hukumu juu ya adui wa Israeli

¹Ee Mungu, usistarehe,

Ee Mungu, usinyamae, wala usitulie.

²Maana adui zako wanafanya ghasia,[#Zab 2:1]

Nao wakuchukiao wameviinua vichwa vyao.

³Juu ya watu wako wanafanya hila,[#Zab 27:5; Kol 3:3]

Na kushauriana juu yao uliowaficha.

⁴Wamesema, Njoni, tuwakatilie mbali wasiwe taifa,[#2 Sam 10:6; 2 Nya 20:1]

Na jina la Israeli halitakumbukwa tena.

⁵Maana wanashauriana kwa moyo mmoja,

Juu yako wanafanyana agano.

⁶Hema za Edomu, na Waishmaeli,

Na Moabu, na Wahagari,

⁷Gebali, na Amoni, na Amaleki,

Na Filisti, nao wanaokaa Tiro,

⁸Ashuri naye amepatana nao,

Wamewasaidia wana wa Lutu.

⁹Uwatende kama ulivyowatenda Midiani, Sisera,[#Hes 31:7,8; Isa 9:4; Amu 4:6-22; 7:1-23]

Na Yabini, penye kijito cha Kishoni.

¹⁰Ambao waliangamizwa Endori;

Wakawa samadi juu ya nchi.

¹¹Uwafanye wakuu wao kama Orebu na Zeebu,[#Amu 7:25; 8:12]

Na wakuu wao wote kama Zeba na Zalmuna.

¹²Ambao Walisema,

Na tutamalaki makao ya Mungu.

¹³Ee Mungu, uwafanye kama mavumbi ya kisulisuli,

Kama ya makapi mbele ya upepo,

¹⁴Kama moto uteketezao msitu,

Kama miali ya moto iiwashayo milima,

¹⁵Ndivyo utakavyowafuatia kwa tufani yako,

Na kuwafadhaisha kwa dhoruba yako.

¹⁶Uzijaze nyuso zao fedheha;

Ili wapate kulitafuta jina lako, Ee BWANA.

¹⁷Waaibike, wafadhaike milele,

Naam, watahayarike na kupotea.

¹⁸Wajue ya kuwa Wewe, uitwaye jina lako YEHOVA,

Ndiwe peke yako Uliye Juu, juu ya nchi yote.