Sala ya kupata fadhili za Mungu tena

¹BWANA, umeiridhia nchi yako,[#Yer 30:18; Eze 39:25]

Umewarejesha mateka wa Yakobo.

²Umeusamehe uovu wa watu wako,

Umezisitiri hatia zao zote.

³Umeiondoa ghadhabu yako yote,

Umerudi na kuuacha ukali wa hasira yako.

⁴Mungu wa wokovu wetu, uturudishe,

Uikomeshe hasira uliyo nayo juu yetu.

⁵Je! Utatufanyia hasira hata milele?

Utadumisha ghadhabu kizazi hadi kizazi?

⁶Je! Hutaki kurudi na kutuhuisha,[#Hab 3:2]

Ili watu wako wakufurahie?

⁷Ee BWANA, utuoneshe rehema zako,

Utupe wokovu wako.

⁸Na nisikie atakavyosema Mungu BWANA,[#Hab 2:1; Zek 9:10; 2 Pet 2:20]

Maana atawaambia watu wake amani,

Naam, na watauwa wake pia,

Bali wasiurudie upumbavu tena.

⁹Hakika wokovu wake uko karibu na wamchao,

Ndipo utukufu wake ukae katika nchi yetu.

¹⁰Fadhili na kweli zitakutana,[#Mik 7:20; Yn 1:17; Zab 72:2,3; Isa 32:17; Lk 2:14; Yn 14:27]

Haki na amani zitakumbatiana.

¹¹Kweli itachipuka katika nchi,[#Isa 45:8; 2 Kor 5:14-21]

Haki itachungulia kutoka mbinguni.

¹²Naam, BWANA atatoa kilicho chema,[#Yak 1:17]

Na nchi yetu itatoa mazao yake.

¹³Haki itakwenda mbele zake,

Na kuzitayarishia hatua zake mapito.