Sifa kwa Mungu atoaye hukumu

¹Mwimbieni BWANA wimbo mpya,

Mwimbieni BWANA, nchi yote.

²Mwimbieni BWANA, lisifuni jina lake,

Tangazeni wokovu wake kila siku.

³Wahubirieni mataifa habari za utukufu wake,

Na watu wote habari za maajabu yake.

⁴Kwa kuwa BWANA ni mkuu mwenye kusifiwa sana.

Na wa kuhofiwa kuliko miungu yote.

⁵Maana miungu yote ya watu si kitu,[#Isa 41:24; Yer 10:11; Hab 2:18-20; Mdo 19:26; 1 Kor 8:4,5; Mwa 1:1; Isa 42:5; Yer 10:11]

Lakini BWANA ndiye aliyezifanya mbingu.

⁶Heshima na adhama ziko mbele zake,

Nguvu na uzuri zimo katika patakatifu pake.

⁷Mpeni BWANA, enyi jamaa za watu,[#Zab 29:1-2]

Mpeni BWANA utukufu na nguvu.

⁸Mpeni BWANA utukufu wa jina lake,

Leteni sadaka, na mwingie katika nyua zake.

⁹Mwabuduni BWANA kwa uzuri wa utakatifu,

Tetemekeni mbele zake, nchi yote.

¹⁰Semeni katika mataifa, BWANA ametamalaki;[#Ufu 11:15; Yn 5:22]

Naam, ulimwengu umethibitika usitikisike,

Atawahukumu watu kwa adili.

¹¹Mbingu na zifurahi, nchi na ishangilie,

Bahari na ivume na vyote viijazavyo,

¹²Mashamba na yashangilie, na vyote vilivyomo,

Ndipo miti yote ya mwituni iimbe kwa furaha;

¹³Mbele za BWANA, kwa maana anakuja,[#Ufu 19:11]

Kwa maana anakuja aihukumu nchi.

Atauhukumu ulimwengu kwa haki,

Na mataifa kwa uaminifu wake.