¹Ndugu zangu, nitakayo sana moyoni mwangu, na dua yangu nimwombayo Mungu, ni kwa ajili yao, ili waokolewe.[#Mdo 22:3]

²Kwa maana nawashuhudia kwamba wana juhudi kwa ajili ya Mungu, lakini si katika maarifa.

³Kwa maana, wakiwa hawaijui haki ya Mungu, na wakitaka kuithibitisha haki yao wenyewe, hawakujitia chini ya haki ya Mungu.[#Rum 9:31,32]

⁴Kwa maana Kristo ni mwisho wa sheria, ili kila aaminiye ahesabiwe haki.[#Mt 5:17; Yn 3:18; Ebr 8:13]

Wokovu ni kwa wote

⁵Kwa maana Musa aliandika juu ya haki itokayo kwa sheria, ya kuwa, Mtu afanyaye hiyo ataishi kwa hiyo.[#Law 18:5; Gal 3:12]

⁶Bali ile haki ipatikanayo kwa imani yanena hivi, Usiseme moyoni mwako, Ni nani atakayepanda kwenda mbinguni? (Yaani, kumleta Kristo chini),[#Kum 30:12-14]

⁷au, Ni nani atakayeshuka kwenda kuzimuni? (Yaani, ni kumleta Kristo juu, kutoka kwa wafu.)

⁸Lakini yanenaje? Lile neno liko karibu nawe, katika kinywa chako, na katika moyo wako; yaani, ni lile neno la imani tulihubirilo.[#Kum 30:14]

⁹Kwa sababu, ukimkiri Yesu kwa kinywa chako ya kuwa ni Bwana, na kuamini moyoni mwako ya kuwa Mungu alimfufua katika wafu, utaokoka.[#2 Kor 4:5]

¹⁰Kwa maana kwa moyo mtu huamini hata kupata haki, na kwa kinywa hukiri hata kupata wokovu.

¹¹Kwa maana andiko lanena, Kila amwaminiye hatatahayarika.[#Isa 28:16]

¹²Kwa maana hakuna tofauti ya Myahudi na Mgiriki; maana yeye yule ni Bwana wa wote, mwenye ukarimu mwingi kwa wote wamwitao;[#Mdo 10:34; 15:9; #10:12 Au ‘mwenye utajiri’.]

¹³kwa kuwa, Kila atakayeliitia Jina la Bwana ataokoka.[#Yoe 2:32]

¹⁴Basi wamwiteje yeye wasiyemwamini? Tena wamwaminije yeye wasiyemsikia? Tena wamsikieje pasipo mhubiri?

¹⁵Tena wahubirije, wasipopelekwa? Kama ilivyoandikwa, Ni mizuri kama nini miguu yao wahubirio habari ya mema![#Isa 52:7]

¹⁶Lakini si wote walioitii ile Habari Njema. Kwa maana Isaya asema, Bwana, ni nani aliyeziamini habari zetu?[#Isa 43:1]

¹⁷Basi imani, hutokana na kusikia; na kusikia huja kwa neno la Kristo.[#Yn 17:20]

¹⁸Lakini nasema, Je! Wao hawakusikia? Naam, wamesikia,[#Zab 19:4]

Sauti yao imeenea duniani kote,

Na maneno yao hadi katika miisho ya ulimwengu.

¹⁹Lakini nasema, Je! Waisraeli hawakufahamu? Kwanza Musa anena,[#Kum 32:21]

Nitawatia wivu kwa watu ambao si taifa,

Kwa taifa lisilo na fahamu nitawakasirisha.

²⁰Na Isaya anao ujasiri mwingi, asema,[#Isa 65:1]

Nilipatikana nao wasionitafuta,

Nilidhihirika kwao wasioniulizia.

²¹Lakini kwa Israeli asema, Mchana kutwa niliwanyoshea mikono watu wasiotii na wakaidi.[#Isa 65:2]