Familia ya Elimeleki yaenda Moabu

¹Hapo zamani Waamuzi walipokuwa wanatawala, njaa ilitokea katika nchi. Mtu mmoja wa Bethlehemu ya Yuda, akaondoka akaenda kukaa katika nchi ya Moabu, yeye na mkewe na wanawe wawili.[#Amu 2:16; Mwa 12:10; 26:1; Kum 28:38; 1 Fal 18:2; 2 Fal 8:1; Amu 17:8; Mik 5:2]

²Na jina la mtu huyo aliitwa Elimeleki, na jina la mkewe Naomi, na majina ya wanawe wawili Maloni na Kilioni, Waefrata wa Bethlehemu ya Yuda. Wakafika nchi ya Moabu, wakakaa huko.[#Mwa 35:19; Amu 3:30; #1:2 maana yake ni ‘Mungu ni Mfalme’.; #1:2 maana yake ni ‘Mwema’.; #1:2 maana yake ni ‘Ugonjwa’.; #1:2 maana yake ni ‘Upotevu’.]

³Akafa Elimeleki, mumewe Naomi; na yule mwanamke akasalia na wanawe wawili.

⁴Nao wakaoa wanawake wa Kimoabu, jina la mmoja aliitwa Orpa, na jina la wa pili Ruthu. Baada ya kukakaa huko miaka kumi hivi,

⁵wote wawili Maloni na Kilioni wakafa; na huyo mwanamke akawa amefiwa na wanawe wawili, na mumewe pia.

Naomi na wakweze Wamoabi

⁶Ndipo alipoondoka, yeye na wakweze, ili kurudi kutoka nchi ya Moabu; maana akiwa katika nchi ya Moabu alipata habari kuwa BWANA alikuwa amewajia watu wake na kuwapa chakula.[#Kut 4:31; Zab 80:14; Yer 29:10; Sef 2:7; Zek 10:3; Lk 1:68; 7:16; Mwa 28:20; 48:15; Kut 16:4,6; Zab 104:14,16; Mit 30:8; Isa 55:10; Mt 6:11]

⁷Basi akatoka pale alipokuwa akiishi, na wakweze wawili pamoja naye; wakashika njia ili kurudi mpaka nchi ya Yuda.

⁸Kisha Naomi akawaambia wakweze wawili, Nendeni sasa mkarejee kila mmoja nyumbani kwa mamaye; BWANA na awatendee mema ninyi, kama ninyi mlivyowatendea mema hao waliofariki na mimi pia.[#Yos 24:15; 2 Tim 1:16]

⁹BWANA na awajalie kuona raha kila mmoja nyumbani kwa mumewe. Kisha akawabusu; nao wakapaza sauti zao wakalia.[#Rut 3:1]

¹⁰Wakamwambia, La, sivyo; lakini tutarudi pamoja nawe kwa watu wako.

¹¹Naye Naomi akasema, Enyi wanangu, rudini; kwa nini mfuatane nami? Je! Mimi ninao watoto wa kiume tena tumboni mwangu, hata wawe waume zenu?[#Mwa 38:11; Kum 25:5]

¹²Enyi wanangu, mrejee; nendeni zenu; kwa kuwa mimi ni mzee, siwezi kupata mume tena. Kama ningesema, Natumaini; kama ningepata mume hata usiku huu, na kuzaa watoto wa kiume;

¹³je! Mngesubiri hata watakapokuwa watu wazima? Mngejizuia msiwe na waume? La, sivyo, wanangu; maana ni vigumu kwangu kuliko kwenu, kwa sababu mkono wa BWANA umetoka juu yangu.[#Amu 2:15; Ayu 19:21; Zab 32:4; 38:2]

¹⁴Nao wakapaza sauti zao, wakalia tena, na Orpa akambusu mkwewe, lakini Ruthu akaambatana naye.[#Kum 4:4; 10:20; Mit 17:17; 18:24; Yn 6:66-69; Ebr 10:39]

¹⁵Naye akasema, Tazama, dada yako amerudi kwa watu wake, na kwa mungu wake; basi urudi nawe ukamfuate dada yako.[#Yos 24:15-21; Amu 11:24]

¹⁶Naye Ruthu akasema,

Usinisihi nikuache,

Nirudi nisifuatane nawe;

Maana wewe uendako nitakwenda,

Na wewe ukaapo nitakaa.

Watu wako watakuwa watu wangu,

Na Mungu wako atakuwa Mungu wangu;

¹⁷Pale utakapofia ndipo nitakufa nami,[#1 Sam 3:17; 25:25; 2 Fal 6:31]

Na papo hapo nitazikwa;

BWANA anitende vivyo hivyo na kuzidi,

Ila kufa tu kutatutenga wewe nami.

¹⁸Basi alipomwona kuwa amekata shauri kufuatana naye, aliacha kumshawishi.[#Mdo 21:14]

¹⁹Hivyo hao wakaendelea wote wawili hadi walipofika Bethlehemu. Na ikawa walipofika Bethlehemu, mji wote uliwaajabia. Nao wanawake wakasema, Je! Huyu ni Naomi?[#Mt 21:10; Isa 23:7; Omb 2:15]

²⁰Akawaambia, Msiniite Naomi, niiteni Mara kwa sababu Mwenyezi Mungu amenitenda mambo machungu sana.[#1:20 Tazama Rut 1:2.; #1:20 maana yake ni, ‘Uchungu’.]

²¹Mimi nilitoka nikiwa nimejaa, naye BWANA amenirudisha sina kitu, kwani kuniita Naomi, ikiwa BWANA ameshuhudia juu yangu, na Mwenyezi Mungu amenitesa?[#1 Sam 2:7,8; Ayu 1:21]

²²Basi Naomi akarudi; pamoja na Ruthu Mmoabi, mkwewe; ambao walirudi kutoka nchi ya Moabu; nao wakafika Bethlehemu mwanzo wa mavuno ya shayiri.[#Kut 9:31; 2 Sam 21:9]