Uchangamfu wa Mwonekano

¹Basi, hekima ya mnyonge itamwinulia kichwa chake, na kuketisha katikati ya wakuu.

²Usimsifu mtu kwa ajili ya uzuri wa uso, wala usimbeze kwa sababu ya sura yake.

³Nyuki ni mdogo katika warukao, bali matunda yake hupita tamutamu.

⁴Wala usione fahari juu ya mavazi yako, ukajikweza roho yako siku ya kuheshimiwa. Viumbe vyote vya BWANA vina ajabu, tena matendo yake yamefichwa na wanadamu;

⁵wafalme wengi wamekaa chini, naye yule asiyefikiriwa amevaa taji;

⁶mashujaa nao wamefedheheka, na watu mashuhuri wamesalitiwa.

Taamuli na Hadhari

⁷Usikaripie kabla hujachunguza;

Ufahamu kwanza, kisha ukemee.

⁸Usijibu kabla hujasikiliza;

Wala usijidukize kati ya usemi.

⁹Usilitetee jambo lisilo lako;

Wakosaji wakiamua usisimame.

¹⁰Mwanangu, mbona unazidi kujishughulisha na kazi nyingi? Afanyaye haraka kuongeza mali hataepuka hatia. Ukijihimiza kufuata utajiri hutapata, wala ukiutafuta hutauona.

¹¹Kuna mtu ajitahidiye, na kufanya kazi, na kujihimiza; walakini kwa kadiri iyo hiyo huenda nyuma.

Kumtegemea Mungu peke yake

¹²Kuna aendaye polepole, na kuhitaji msaada, na kukosa nguvu, naye yu maskini kabisa; walakini macho ya BWANA yamemtazama kwa hisani, akampandisha kutoka unyonge wake,

¹³akamwinua kichwa chake na kumkweza, nao wengi wakastaajabu kwa kumwona.

¹⁴Mema na mabaya, uzima na mauti, umaskini na utajiri, hayo

^15-16yote yatoka kwa BWANA.

¹⁷Ukarimu wa BWANA hukaa pamoja na mwenye haki, na hisani yake itamfanikisha daima.

¹⁸Kuna ajitajirishaye kwa werevu na kujinyima, na hii ndiyo sehemu ya thawabu yake;[#Zab 49:10; Lk 12:16-21]

¹⁹asemapo, Nimeona raha na sasa nitakula mapato yangu, yeye hajui baada ya siku ngapi atawapisha wengine na kufa.

²⁰Usimame thabiti katika agano lako, ujizoeze nalo, ili udumu katika kazi yako hata uzeeni.

²¹Usisituke kwa kuona matendo ya mkosefu, bali umtumaini BWANA, na kudumu katika kazi yako; kwa maana ni vyepesi machoni pa BWANA ghafla kumfanya maskini kuwa tajiri.

²²Baraka ya BWANA ni thawabu ya mwenye akili, na katika saa moja ijayo upesi huisitawisha baraka yake.

²³Usiseme, Ninafaa nini, na tangu sasa mema yangu yatatoka wapi?

²⁴Usiseme, Nimetoshewa, na tangu sasa mabaya gani yawezayo kunitukia?

²⁵Siku ya mema mabaya husahauliwa, vile vile siku ya mabaya mtu hakumbuki mema.

²⁶Ni vyepesi machoni pa BWANA kumjazi mtu siku ya kufa kwake sawasawa na mwenendo wake.

²⁷Tena taabu ya saa moja huleta usahaulifu wa furaha; na mwisho wa mtu ndio ulio ufunuo wa habari zake.

²⁸Usimwite mtu heri kabla ya kufa kwake; aidha, mtu hujulikana kwa kuwatazama watoto wake.

Uangalifu katika Kuchagua Marafiki

²⁹Usimwingize kila mtu nyumbani mwako; kwa maana msingiziaji anayo mashauri mengi.

³⁰Kama kware wa mwindaji katika tundu, ndivyo ulivyo moyo wa mwenye kiburi; na mfano wa mpelelezi atakutazamia kuanguka kwako.

³¹Maana yake huotea ili kugeuza mema kuwa mabaya, na yale yastahiliyo kusifiwa atayalaumu.

³²Cheche ya moto huwasha chungu nzima ya makaa; na mtu wa dhambi kuvizia damu.

³³Ujihadhari na mtu mwovu, ambaye hutunga maovu; asije akaleta lawama juu yako hata milele.

³⁴Ukimpokea aliye mgeni nyumbani mwako, atakutia wasiwasi kwa makelele yake, hata kukufarikisha nao walio wako.