Kuhusu Kukopa na Kukopesha

¹Mwenye kurehemu atamkopesha jirani yake; naye mwenye kumnafisisha mwenzake huzishika amri.[#Kut 22:25; Law 25:35-38]

²Umkopeshe jirani yako alipo ana haja; pia umlipe jirani yako wakati ukiwadia.

³Thibitisha neno lako, na uwe mwaminifu kwake; nawe utapata mahitaji yako kila wakati.

⁴Kuna wengi waliouona ukopi kuwa ni pato la bahati, wakawasumbua sana waliowasaidia.

⁵Hata apokee, huyo atabusu mikono, na kuinyenyekeza kauli yake, kwa ajili ya fedha za mwenzake; la! Wakati wa kulipa ataongeza siku, na kusikitika, na kulalamikia majira.

⁶Yule akidiriki, atapata nusu tu kwa shida, ataihesabia ni bahati yake; la! Sivyo, amenyimwa fedha zake, pia na kupata adui bure. Naye huyo, kulipa atalipa kwa laana na ufidhuli, atamrudishia mzaha badala ya heshima.

⁷Hivyo wengi wamegeuka upande, si kwa sababu ya ubahili, ila hawataki kuhadaiwa bure.

Sadaka

⁸Walakini kwa habari ya mtu maskini uwe mvumilivu, na kumwongezea siku kwa huruma.

⁹Umsaidie maskini kwa ajili ya amri; na kadiri ulivyo ukata wake usimfukuze mikono mitupu.

¹⁰Poteza fedha zako kwa ajili ya ndugu yako na rafiki yako, zisiharibike kwa kutu chini ya jiwe.

¹¹Toa hazina yako sawasawa na amri zake Aliye Juu, itakufaidia kuliko dhahabu.

¹²Ujiwekee sadaka katika hazina yako, itakuokoa katika kila taabu;

¹³itakupigania juu ya yule adui kuliko ngao kubwa na mkuki wenye nguvu.

Udhamini

¹⁴Mtu aliye mwema atamdhamini mwenzake; wala huyo hatamkimbia isipokuwa amepotewa na haya.

¹⁵Wala usisahau fadhili zake mdhamini wako, ambaye amekutolea maisha yake.

¹⁶Mkosefu aweza kuiharibu hali njema ya mdhamini wake, na mwenye nia mbovu atamfilisisha yeye aliyemwokoa.

¹⁷Kweli udhamini umewapoteza wengi waliofanikiwa, na kuwatikisa kama wimbi la bahari;

¹⁸naam, kuna matajiri waliofukuzwa nyumbani, na kutangatanga katika nchi za kigeni.

¹⁹Basi, mkosaji akitumbukia udhamini kwa kutodiriki mikataba ya kazi, ataanguka hukumuni.

²⁰Hivyo, umsaidie jirani yako kadiri uwezavyo, lakini ujiangalie nafsi yako usije ukaangamia.

Nyumba na Ukarimu

²¹Katika maisha ya mwanadamu neno kubwa ni maji, na chakula, nguo, na nyumba ya kujifichia humo.

²²Afadhali maisha ya maskini katika kibanda cha miti, kuliko kula anasa katika nyumba ya mwingine.

²³Kwamba una kidogo au kwamba una wingi uwe radhi, maana ni maisha ya taabu kwenda toka nyumba hata nyumba;

²⁴ukaapo, nawe u mgeni, wewe hutathubutu kufumbua kinywa chako.

²⁵Utaandaa meza, na kupitisha vileo, na kukosa shukrani; pamoja na hayo utasikia maneno mengi ya uchungu.

²⁶Njoo hapa, mgeni,

Andaa meza;

Una kitu mkononi?

Nilishe nacho.

²⁷Ondoka, mgeni,

Kutoka kwa heshima;

Ndugu yangu amekuja;

Nataka nyumba yangu.

²⁸Haya ni magumu kwa mwenye ufahamu;

Makaripio, na riba, na ukopi.