Mwelekeo Mwema kuhusu Mali

¹Kuzilinda mali kwadhoofisha mwili, na kuzisumbukia kwaondoa usingizi.

²Pia kuzisumbukia riziki hufukuza usingizi zaidi ya ugonjwa mbaya unaomzuia mtu asilale unono.

³Mtu aliye tajiri hufanya kazi katika kukusanya mali, naye anapopumzika amejaa anasa zake;

⁴mtu aliye maskini hufanya kazi katika upungufu wa riziki, na yeye anapopumzika ameingia uhitaji.

⁵Mpenda dhahabu hatahakikishwa, naye aifuataye faida atapoteza njia.

⁶Watu wengi wameangamia kwa ajili ya dhahabu, na upotevu wao utawakuta uso kwa uso.

⁷Ndiyo kikwazo kwa wale wanaoitamani, na kila mpumbavu atanaswa nayo.

⁸Yu heri tajiri aliyeonekana hana ila,

Hakuifuata dhahabu wala kuitamani fedha.

⁹Ni nani huyu?

Nasi tutamwita heri;

Ametenda mambo ya ajabu kati ya watu.

¹⁰Nani aliyejaribiwa,

Akaonekana amekamilika?

Ajisifie hasa maisha ya amani maridhawa.

Nani aliyeweza kuasi,

Wala yeye hakuasi?

Aliyeweza kutenda mabaya.

Wala yeye hakuyatenda?

¹¹Mapato yake yatathibitishwa kwake;

Na kusanyiko watangaza sadaka zake.

Meza ya Kiungwana

¹²Mwanangu, ikiwa umeketi mezani pa mkuu, usiwe na choyo pale pale, wala usiseme, Aha! Vyakula vingi hapa.

¹³Fikiri ya kuwa kijicho ni uovu. Hakuna kitu kilichoumbwa kibaya kuliko jicho, kwa hiyo latoka machozi kwa kila sababu.

¹⁴Usiunyoshe mkono wako kila utazamapo, wala kujisongeza pamoja nao kwenye sahani.

¹⁵Fikiri apendavyo jirani yako, na kwa vitu vile usivyopenda tumia busara.

¹⁶Kula vitu vile vilivyowekwa mbele yako kama impasavyo mtu mzima, ila usile kwa pupa usije ukachukiwa.

¹⁷Uwe wa kwanza wa kuacha kula, kwa ajili ya adabu, tena usiwe mlafi usije ukachukiza.

¹⁸Na iwapo unakula pamoja na wengi, usiunyoshe mkono wako mbele ya jirani yako.

¹⁹Mtu mwenye adabu aweza kushiba kwa chakula kidogo tu, wala hatapiki kitandani pake.

²⁰Maumivu na kukosa usingizi, na msokoto, na tumbo, humpata asiyetosheleka. Usingizi wenye afya hutoka katika kula kwa kiasi; mtu huondoka mapema na akili zake anazo.

²¹Iwapo umeshawishika kula sana, uondoke katikati nawe utapata raha.

²²Mwanangu, unisikilize, usinidharau, mwishowe utaona maneno yangu ni kweli. Katika matendo yako yote uwe na kiasi, dhara lisikujie.

²³Aliye mkarimu wa chakula midomo itamsifu,

Na ushuhuda wa wema wake utathibitika;

²⁴Aliye bahili wa chakula mji utamzomea,

Na ushuhuda wa ubahili wake utathibitika.

Kiasi katika Kunywa Mvinyo

²⁵Usijioneshe kuwa hodari wa kunywa kileo, yaani, mvinyo imewaangamiza wengi.

²⁶Tanuri hujaribu kazi ya mhunzi, na mvinyo mioyo ya watu, katika ugomvi wa wenye kiburi.

²⁷Kwa wanadamu mvinyo ni kama maji ya uzima, ukinywa kwa kiasi; je! Anao uzima gani mtu asiye na mvinyo? Nayo imeumbwa ili kuwafurahisha wanadamu.

²⁸Mvinyo ni furaha ya moyo na changamko ya roho, ikinywewa kwa wakati wake na ya kutosha.

²⁹Lakini kunywa mno ni uchungu wa roho, na fedheha, na ugomvi.

³⁰Kileo humzidishia mpumbavu mitego ya kumletea hasara; hupunguza nguvu, na zaidi huleta jeraha.

³¹Usimkaripie jirani yako penye karamu ya mvinyo, wala usimdhihaki anapocheka; wala usimwambie neno la shutumu, wala usimsumbue kwa kutaka alipe deni.