Kuhusu Mganga na Afya

¹Umheshimu tabibu kwa kadiri ulivyo na haja naye, na kwa heshima iliyo haki yake, kwa kuwa BWANA amemwinua kweli kweli.

²Kwa maana ni kutoka kwake Aliye Juu tabibu alivyoupata ufundi wake, hata na kwa mfalme atapokea ada.

³Maarifa yake tabibu yatamwinua kichwa chake, naye atasimama ni mkuu machoni pa wakuu.

⁴BWANA ameyaotesha madawa katika nchi, wala mwenye busara hatayadharau.

⁵Je! Maji hayakutiwa utamu kwa mti, ili Mungu awaonyshe watu wote uweza wake?[#Kut 15:23-25]

⁶Naye amewapa wanadamu maarifa, ili atukuzwe mwenyewe kwa ajili ya miujiza yake.

⁷Kwa hayo mponya watu huwatulizia wote maumivu yao; kwa hayo mfanyiza dawa huyafanya machanganyiko yake;

⁸ili isikome kazi ya Mungu, wala siha njema isibatilike katikati ya wanadamu.

⁹Basi, mwanangu, ugonjwani usiwe mfidhuli; lakini umwombe Mungu na Yeye atakuponya.

¹⁰Ujitenge na dhambi, na kujitengeneza moyo, na kujisafisha mikono na kila namna ya uovu.

¹¹Toa sadaka ya unga, na kumbukumbu, na dhabihu ya vinono, kwa kadiri ya mali ulizo nazo.

¹²Kisha mpishe tabibu, wala asiondoke kwako, kwa maana una haja naye.

¹³Kwa kuwa pengine kuna muda na hali njema imo hasa mikononi mwao.

¹⁴Maana hao nao humsihi BWANA, kwamba awafanikishe katika kuuyakinisha ugonjwa, na kuwapatia watu nafuu, na kuuhifadhi uhai wenyewe.

¹⁵Na mtu yeyote atendaye dhambi mbele za Mola wake, ni afadhali sana aanguke katika mikono ya tabibu.

Kuombolezea Aliyekufa

¹⁶Mwanangu, machozi yako yadondoke juu yake aliyefariki, na katika uchungu wa roho yako ufanye maombolezo; umfunge sanda mwili wake kama ilivyo haki yake, wala usijifiche wakati wa kumzika.[#Sira 22:11-12]

¹⁷Fanya kilio kwa huzuni, na maombolezo makuu; na matanga yake yawe sawasawa na stahili zake, siku moja au mbili, usije ukaona fedheha; hivyo uburudike moyo wako katika huzuni yako.

¹⁸Kwa maana huzuni izidiyo huleta mauti, na uchungu wa rohoni hula nguvu.

¹⁹Atakapochukuliwa maiti ni afadhali huzuni ipite, mradi maisha ya kusikitika yaweza kuudhuru moyo.

²⁰Usiweke huzuni moyoni mwako, uiweke mbali nawe ukiukumbuka mwisho wako;

²¹usisahau ya kwamba hakuna kurudi tena; hutamfaidia yeye, nawe utajidhuru mwenyewe.

²²Uikumbuke amri iliyo juu yake, nayo ni juu yako pia; jana kwake na kesho kwako.

²³Basi atakapostarehe yeye aliyefariki, na ukae ukumbusho wake; roho yake ikiisha kuondoka, ujiburudishe moyo wako kwa ajili yake.

Biashara na Kazi za Mikono

²⁴Hekima ya mwandishi hurejea wasaa wa faragha, naye mwenye shughuli haba ndiye atakayepata hekima.

²⁵Bali ataipata wapi mtu yule ashikaye plau, na kuona fahari juu ya mti wa mchokoo, na kuswaga ng'ombe, na kujishughulisha nao, na kuzungumza nasaba ya mafahali?

²⁶Huyo atautia moyo wake katika kuifudikiza mifuo yake, na nadhari yake ni kuwapa ndama zake malisho.

²⁷Ndivyo alivyo kila aliye msanii mwenye ufundi, ashikaye kazi usiku na mchana. Anayechora nakshi ya mhuri hufanya bidii ya kutofautisha namna nyingi mbalimbali; na kuutia moyo wake katika kuuhifadhi ulingano akichora sanamu, na hadhari yake ni kuimaliza kazi yake.

²⁸Mhunzi naye hukaa penye fuawe, na kuifikiri sana chuma kitupu; ufukuto wa moto utatokeza malengelenge, naye atashindana na joto la tanuri; sauti ya nyundo itamfanya kiziwi, na macho yake ameyakaza juu ya umbo la chombo. Huyo atautia moyo wake katika kuikamilisha kazi yake, na hadhari yake ni kuipamba kwa ustadi.

²⁹Na mfinyanzi naye ni vile vile, huketi kazini, na kuizungusha gurudumu kwa miguu; sikuzote huisumbukia kazi yake, kwa kuwa maishilio yake yote ni kwa jumla ya vyombo vyake;

³⁰huumba udongo kwa mikono yake, na kuukanda mbele ya miguu yake. Huyo atautia moyo wake katika kumaliza kupaka rangi, na hadhari yake ni kusafisha joko.

³¹Hao wote huitegemea mikono yao, na kila mmoja huchuma ufundi wa kazi yake.

³²Pasipo hao mji hauwezi kukaliwa na watu, wala hao hawatakosa riziki wakaapo pote.

³³Kweli hao hawatatafutwa katika mkutano wa wakuu, wala katika baraza hawatapanda juu, wala kuketi katika kiti cha hakimu, wala kuelewa na agano la hukumu.

³⁴Hata na elimu na maagizo ya hekima hawatayatangaza, wala kuonekana miongoni mwao wasemao kwa mithali. Bali hata hivyo ndio hao wanaodumisha maumbile ya ulimwengu, na kazi yao stadi ndiyo sala yao.