Yosia na Wastahiki wengine

¹Ukumbusho wa Yosia ni kama ubani[#2 Fal 22:1,11-13; 23:3,25]

Uliochanganywa kwa kazi ya fundi;

Ni tamu kama asali kinywani,

Kama wimbo kwenye karamu ya mvinyo.

²Akawa adili katika kuwaongoza watu,

Akayakomesha machukizo ya ubatili;

³Akaweka moyo wake sawa kama BWANA,

Siku za uovu akashindisha utauwa.

Wafalme na manabii wa mwisho

⁴Isipokuwa ni Daudi na Hezekia na Yosia, wote walifanya kukosa; kwa maana waliiacha sheria yake Aliye Juu; naam, wale wafalme wa Yuda wote pia.

⁵Wakawapa wengine nguvu zao, na kuutoa utukufu wao kwa taifa la wageni.

⁶Mji mtakatifu wakaufanya kuchomwa moto, na njia zake kuwa ganjo,[#Yer 1:4-10; 39:8]

⁷kama ilivyoandikwa kwa mkono wake Yeremia. Na huyo naye walimtenda mabaya, ingawa alitakaswa tumboni ili awe nabii, kung'oa, na kutesa, na kuangamiza, kadhalika na kujenga, na kupanda.

⁸Ndiye Ezekieli aliyeona njozi ya utukufu, akaeleza namna ya gari la makerubi.[#Eze 1:3-15; 14:14-20]

⁹Tena nitamtaja Ayubu, nabii aliyezishika njia zote za haki.

¹⁰Pia na Manabii Kumi na Wawili, kumbukumbu lao na libarikiwe; hata na mifupa yao ifanikiwe panapo makao yao. Kwa kuwa walimrudishia Yakobo afya yake, na kuwaokoa watu kwa sabiki ya uthabiti wa taraja lao.

Zerubabeli na Yeshua

¹¹Twawezaje kumwadhimisha Zerubabeli? Mradi alikuwa kama mhuri wa pete juu ya mkono wa kuume;[#Ezr 3:2; Hag 2:23]

¹²kadhalika naye pia Yeshua mwana wa Yesedeki; ambao hao wawili katika siku zao waliijenga nyumba, wakaliinua hekalu takatifu kwa BWANA, lililowekewa utukufu wa daima.[#Hag 1:1,12]

Nehemia

¹³Naye Nehemia, ukumbusho wake ni mtukufu; alituinulia kuta zilizobomolewa, akatujengea tena nyumba zetu, akayasimamisha malango na makomeo.[#Neh 6:15]

Kumbukumbu ya Zamani

¹⁴Hakika yake ni wachache ulimwenguni walioumbwa mfano wa Henoko; ambaye yeye naye alichukuliwa juu aingie mbele za uso wa Mungu.

¹⁵Wala hakuzaliwa mtu mfano wa Yusufu; naam, mifupa yake ilihifadhiwa.

¹⁶Shemu na Sethi wametukuzwa katika wanadamu; na juu ya kila kilicho hai ni utukufu wake Adamu.