Mashauri kuhusu Wanawake

¹Usimwonee wivu mkeo akaaye kifuani pako, ukamfundisha fundisho baya juu yako mwenyewe.[#Hes 5:12-15]

²Usimpe mwanamke yeyote uhai wako, hata azikanyage nguvu zako.

³Usimlaki mwanamke mgeni, usije ukanaswa naye kwa nasibu.

⁴Usiandamane na mwanamke aliye malenga, ama yamkini utategwa kwa hila zake.

⁵Usimkodolee macho msichana, ama utatatanishwa katika madai yake.

⁶Usiwape malaya uhai wako, usije ukapotewa na urithi wako.

⁷Usitazame huku na huku katika njia za mji, wala usitembee ndani yake panapo ukiwa.

⁸Jicho lako uligeuzie mbali na mwanamke mrembo, wala usiukazie macho uzuri wa mwingine; wengi wamepotoshwa kwa uzuri wa wanawake, na kwa huo ashiki huwashwa kama moto.

⁹Usiketi sebuleni pamoja na yeye aliyeolewa, wala usiende mandari naye kwenye mvinyo; moyo wako usije ukamgeukia, na roho ikateremkia upotevu.

Uchaguzi wa Marafiki

¹⁰Rafiki wa zamani usimwache, madhali rafiki mpya hatalingana naye; rafiki mpya afanana na divai mpya, iwapo imekomaa utainywa kwa furaha.

¹¹Usihusudu fahari yake mwenye dhambi, mradi hujui ni nini itakayomwangusha.

¹²Usiyafurahie mema yao wasio haki; kumbuka ya kwamba hawatashuka kaburini bila adhabu.

¹³Ukae mbali naye mwenye amri ya kuua, hivyo hutaionja hofu ya kuuawa; aidha, ukiwa umemjia, usifanye kosa asije akakufisha; uwe macho kwamba unakwenda katikati ya matanzi, na mfano wa kukanyaga buruji za ngome.

¹⁴Kadiri uwezavyo uwakisie jirani zako, na kushauriana na wataalamu;

¹⁵maongezi yako na yawe kwao walio na akili, na mazungumzo yako katika sheria yake Aliye Juu.

¹⁶Wenye haki na wawe waizungukao meza yao; na kujisifu kwako kuwe katika kumcha BWANA.

Kuhusu Watawala

¹⁷Kazi ya mikono itasifiwa kwa ustadi wa mafundi; na mwenye kutawala watu atahesabiwa hekima kwa usemi wake.

¹⁸Mwenye maneno mengi ni hatari katika mji, naye anenaye bila kufikiri ndiye atakayechukiwa.