Tobiti ampa Tobia mawaidha

¹Siku ile Tobiti aliikumbuka ile fedha aliyoiweka amana kwa Gabaeli huko Rage, mji wa Umedi.

²Akasema nafsini mwake, Nimetaka kufa; mbona nisimwite mwanangu Tobia, ili nimwarifu habari za ile fedha kabla sijafa.

³Alipomwita akamwambia, Mwanangu, nitakapokufa unizike; tena usimdharau mama yako; bali umheshimu siku zote za maisha yako, ukayatende yampendezayo, wala usimhuzunishe.

⁴Mwanangu, ukumbuke ya kuwa alipatwa na hatari nyingi kwa ajili yako, ulipokuwamo tumboni mwake. Naye akiisha kufa, umzike pamoja nami katika kaburi moja.

⁵Mwanangu, umkumbuke BWANA, Mungu wetu, siku zako zote; wala usikaze nia yako kutenda dhambi, wala kuzivunja amri zake; utende kwa unyofu maisha yako yote, wala usizifuate njia za uovu.

⁶Kwa maana ukitenda kwa kweli matendo yako utakufanikiwa, nao wote watendao kwa haki watafanikiwa.

⁷Toa sadaka katika mali zako; wala utoapo sadaka jicho lako lisiwe na choyo; wala usiugeuzie uso wako mbali na mtu maskini, nawe hutageuziwa mbali uso wa Mungu.[#Kum 15:7-8; Mit 19:17; Sira 3:30—4:6; 1 Yoh 3:17]

⁸Ukiwa na wingi utoe sawasawa na wingi wako; ukiwa na kidogo tu usiogope kutoa sawasawa na kidogo hicho.

⁹Kwa maana wajiwekea hazina bora kwa siku ya dhiki.

¹⁰Madhali sadaka huokoa na mauti, wala hazimwachi mtu afike gizani.

¹¹Sadaka ndizo thawabu bora kwao wote wazitoazo usoni pake Aliye Juu.

¹²Mwanangu, ujihadhari na ukahaba; na zaidi ya hayo ujitwalie mke katika uzao wa baba zako; wala usijitwalie mwanamke mgeni asiye wa kabila ya baba yako. Maana sisi tu wana wa manabii. Mwanangu, ukumbuke; Nuhu, Abrahamu, Isaka, Yakobo, baba zetu tangu mwanzo; wote walioa watu wa jamaa zao wenyewe; wakabarikiwa katika watoto wao; na uzao wao utairithi nchi.

¹³Basi sasa, mwanangu, uwapende ndugu zako, kwa kumchukua mke aliye wa kwao; wala moyoni mwako usiwadharau ndugu zako, wana na binti za watu wako. Maana katika dharau kuna uharibifu na udhia mwingi, na katika upotovu kuna upunguo na uhitaji mwingi; mradi upotovu huzaa njaa.

¹⁴Mshahara wa mtu yeyote aliyekufanyia kazi usikae nao, bali umpe mara; maana wewe ukimtumikia Mungu, Yeye atakulipa. Mwanagu, uwe na hadhari katika matendo yako yote, pia uwe na busara katika mwenendo wako.

¹⁵Na yale uyachukiayo mwenyewe usimtende mtu yeyote kama yale. Usijilevye kwa mvinyo, wala mlevi asifuatane nawe katika njia yako.

¹⁶Wenye njaa uwape baadhi ya chakula chako, na walio uchi uwape baadhi ya nguo zako; sawasawa na wingi wako utoe sadaka; wala utoapo sadaka jicho lako lisiwe na choyo.

¹⁷Utoe chakula kwa ukarimu kwenye maziko ya wenye haki; lakini waovu usiwape kitu.[#Kum 26:14]

¹⁸Utake shauri kwa kila mtu aliye na hekima, wala usilidharau shauri la kufaa lenye njia.

¹⁹Umhimidi BWANA, Mungu wako, siku zote. Umwombe Yeye ili njia zako zinyoshwe, na mapito yako yote na mashauri yako yote yafanikiwe; maana katika mataifa hakuna lenye shauri; bali BWANA mwenyewe ndiye atoaye mema yote, naye humdhili yeyote atakaye na kama atakavyo. Basi, mwanangu, uyakumbuke mausia yangu, wala usiyaache kufutika katika nia yako.

Fedha zilizoachwa kwa Gabaeli

²⁰Na sasa nakuarifu habari ya kuwa nilimkabidhi Gabaeli mwana wa Gabria talanta kumi huko Rage, mji wa Umedi.

²¹Wala usihofu, mwanangu, ya kuwa tumekuwa maskini; maana una mali nyingi, huku ukimcha Mungu, na kujiepusha na dhambi zote, na kutenda mambo yale yampendezayo machoni pake.[#1 Tim 6:6-8]